(26-27) Cattālīsaaviraḷadantalakkhaṇāni
234.‘‘ Yampi , bhikkhave tathāgato purimaṃ jātiṃ purimaṃ bhavaṃ purimaṃ niketaṃ pubbe manussabhūto samāno pisuṇaṃ vācaṃ pahāya pisuṇāya vācāya paṭivirato ahosi .
Ito sutvā na amutra akkhātā imesaṃ bhedāya , amutra vā sutvā na imesaṃ akkhātā amūsaṃ bhedāya
M3.140 , iti bhinnānaṃ vā sandhātā , sahitānaṃP3.172 vā anuppadātā , samaggārāmo samaggarato samagganandī samaggakaraṇiṃ vācaṃ bhāsitā ahosi .So tassa kammassa kaṭattā … pe … so tato cuto itthattaṃ āgato samāno imāni dve mahāpurisalakkhaṇāni paṭilabhati .
Cattālīsadanto ca hoti aviraḷadanto ca .
‘‘ So tehi lakkhaṇehi samannāgato sace agāraṃ ajjhāvasati , rājā hoti cakkavattī … pe … rājā samāno kiṃ labhati ?
Abhejjapariso hoti , abhejjāssa honti parisā , brāhmaṇagahapatikā negamajānapadā gaṇakamahāmattā anīkaṭṭhā dovārikā amaccā pārisajjā rājāno bhogiyā kumārā .
Rājā samāno idaṃ labhati
T3.187 … buddho samāno kiṃ labhati ?Abhejjapariso hoti , abhejjāssa honti parisā , bhikkhū bhikkhuniyo upāsakā upāsikāyo devā manussā asurā nāgā gandhabbā .
Buddho samāno idaṃ labhati ’’.
Etamatthaṃ bhagavā avoca .
235. Tatthetaṃ
V3.130 vuccati –‘‘ Vebhūtiyaṃ sahitabhedakāriṃ ,
Bhedappavaḍḍhanavivādakāriṃ ;
Kalahappavaḍḍhanaākiccakāriṃ ,
Sahitānaṃ bhedajananiṃ na bhaṇi .
‘‘ Avivādavaḍḍhanakariṃ sugiraṃ ,
Bhinnānusandhijananiṃ abhaṇi ;
Kalahaṃ
P3.173 janassa panudī samaṅgī ,Sahitehi nandati pamodati ca .
‘‘ Sugatīsu so phalavipākaṃ ,
Anubhavati tattha modati ;
Dantā idha honti aviraḷā sahitā ,
Caturo dasassa mukhajā susaṇṭhitā .
‘‘ Yadi
M3.141 khattiyo bhavati bhūmipati ,Avibhediyāssa parisā bhavati ;
Samaṇo ca hoti virajo vimalo ,
Parisāssa hoti anugatā acalā ’’ ti .