Bhikkhunīvibhaṅgo
170.
Bhikkhūnaṃ pāṭavatthāya , vinayassa vinicchaye ;
Bhikkhunīnaṃ vibhaṅgopi , kiñcimattaṃ bhaṇāmahaṃ .
171.
Avassutassa
V0.284 posassa , bhikkhunīpi avassutā ;Nandantī kāyasaṃsaggaṃ , kati āpattiyo phuse ;
172.
Tisso āpattiyo ubbha-jāṇussādhakkhakassa ca ;
Hoti pārājikaṃ tassā , gahaṇaṃ sādiyantiyā .
173.
Ubbhakkhakaṃ adhojāṇu-gahaṇaṃ sādiyantiyā ;
Thullaccayaṃ siyā , kāya-paṭibaddhe tu dukkaṭaṃ .
174.
Chādentī bhikkhunī vajjaṃ , tisso āpattiyo phuse ;
Jānaṃ pārājikaṃ dhammaṃ , chādentī sā parājikā .
175.
Thullaccayaṃ
M0.322 vematikā , paṭicchādeti ce pana ;Athācāravipattiṃ ce , paṭicchādeti dukkaṭaṃ .
176.
Nissajjantī na taṃ laddhiṃ , ukkhittassānuvattikā ;
Samanubhāsanāyeva , tisso āpattiyo phuse .
177.
Ñattiyā dukkaṭaṃ , dvīhi , kammavācāhi thullatā ;
Kammavācāya osāne , pārājikamudīritaṃ .
178.
Pūrentī aṭṭhamaṃ vatthuṃ , tisso āpattiyo phuse ;
Purisenidhāgacchāti , vuttāgacchati dukkaṭaṃ .
179.
Thullaccayaṃ tu posassa , hatthapāsappavesane ;
Pūrentī aṭṭhamaṃ vatthuṃ , samaṇī sā parājitā .
Pārājikakathā .