Tattha uddānagāthā
Paṭhamo nandiyāvaṭṭo , dutiyo ca tipukkhalo ;
Sīhavikkīḷito nāma , tatiyo hoti so nayo .
Disālocanamāhaṃsu , catuttho nayalañjako ;
Pañcamo aṅkuso nāma [ pañcamaṃ aṅkusaṃ āhu ( pī . ka .)], sabbe pañca nayā gatā .
6. Tattha katamāni aṭṭhārasa mūlapadāni ?
Avijjā
P0.4 taṇhā lobho doso moho subhasaññā sukhasaññā niccasaññā attasaññā samathoV0.168 vipassanā alobho adoso amoho asubhasaññā dukkhasaññā aniccasaññā anattasaññā , imāni aṭṭhārasa mūlapadāni .Tattha nava padāni akusalāni yattha sabbaṃ akusalaṃ samosarati .
Nava padāni kusalāni yattha sabbaṃ kusalaṃ samosarati .
Katamāni nava padāni akusalāni yattha sabbaṃ akusalaṃ samosarati ?
Avijjā yāva attasaññā , imāni nava padāni akusalāni , yattha sabbaṃ akusalaṃ samosarati .
Katamāni nava padāni kusalāni yattha sabbaṃ kusalaṃ samosarati ?
Samatho yāva anattasaññā , imāni nava padāni kusalāni yattha sabbaṃ kusalaṃ samosarati .
Imāni aṭṭhārasa mūlapadāni .