12. Dvayatānupassanāsuttaṃ

Evaṃ me sutaṃ – ekaṃ samayaṃ bhagavā sāvatthiyaṃ viharati pubbārāme migāramātupāsāde .

Tena kho pana samayena bhagavā tadahuposathe pannaraseM0.391 puṇṇāya puṇṇamāya rattiyā bhikkhusaṅghaparivuto abbhokāse nisinno hotiP0.140 .

Atha kho bhagavā tuṇhībhūtaṃ tuṇhībhūtaṃ bhikkhusaṅghaṃ anuviloketvā bhikkhū āmantesi –

‘‘‘ Ye te , bhikkhave , kusalā dhammā ariyā niyyānikā sambodhagāmino , tesaṃ vo , bhikkhave , kusalānaṃ dhammānaṃ ariyānaṃ niyyānikānaṃ sambodhagāmīnaṃ kā upanisā savanāyā ’ ti iti ce , bhikkhave , pucchitāro assu , te evamassu vacanīyā –

‘ yāvadeva dvayatānaṃ dhammānaṃ yathābhūtaṃ ñāṇāyā ’ ti .

Kiñca dvayataṃ vadetha ?

(1)‘‘ Idaṃ dukkhaṃ , ayaṃ dukkhasamudayoti ayamekānupassanā .

Ayaṃ dukkhanirodho , ayaṃ dukkhanirodhagāminī paṭipadāti , ayaṃ dutiyānupassanā .

Evaṃ sammā dvayatānupassino kho , bhikkhave , bhikkhuno appamattassa ātāpino pahitattassa viharato dvinnaṃ phalānaṃ aññataraṃ phalaṃ pāṭikaṅkhaṃ – diṭṭheva dhamme aññā , sati vāT0.474 upādisese anāgāmitā ’’ ti .

Idamavoca bhagavā .

Idaṃ vatvāna sugato athāparaṃ etadavoca satthā –

729.

‘‘ Ye dukkhaṃ nappajānanti , atho dukkhassa sambhavaṃ ;

Yattha ca sabbaso dukkhaṃ , asesaṃ uparujjhati ;

Tañca maggaṃ na jānanti , dukkhūpasamagāminaṃ .

730.

‘‘ Cetovimuttihīnā te , atho paññāvimuttiyā ;

Abhabbā te antakiriyāya , te ve jātijarūpagā .

731.

‘‘ YeV0.191 ca dukkhaṃ pajānanti , atho dukkhassa sambhavaṃ ;

Yattha ca sabbaso dukkhaṃ , asesaṃ uparujjhati ;

TañcaP0.141 maggaṃ pajānanti , dukkhūpasamagāminaṃ .

732.

‘‘ Cetovimuttisampannā , atho paññāvimuttiyā ;

Bhabbā te antakiriyāya , na te jātijarūpagā ’’ ti .

(2)‘‘‘ Siyā aññenapi pariyāyena sammā dvayatānupassanā ’ ti , iti ce , bhikkhave , pucchitāro assu ;

‘ siyā ’ tissu vacanīyā .

Kathañca siyā ?

Yaṃ kiñci dukkhaṃ sambhoti sabbaṃ upadhipaccayāti , ayamekānupassanā .

UpadhīnaṃM0.392 tveva asesavirāganirodhā natthi dukkhassa sambhavoti , ayaṃ dutiyānupassanā .

Evaṃ sammā … pe … athāparaṃ etadavoca satthā –

733.

‘‘ Upadhinidānā pabhavanti dukkhā , yeT0.475 keci lokasmimanekarūpā ;

Yo ve avidvā upadhiṃ karoti , punappunaṃ dukkhamupeti mando ;

Tasmā pajānaṃ upadhiṃ na kayirā , dukkhassa jātippabhavānupassī ’’ ti .

(3)‘‘‘ Siyā aññenapi pariyāyena sammā dvayatānupassanā ’ ti , iti ce , bhikkhave , pucchitāro assu ;

‘ siyā ’ tissu vacanīyā .

Kathañca siyā ?

Yaṃ kiñci dukkhaṃ sambhoti sabbaṃ avijjāpaccayāti , ayamekānupassanā .

Avijjāya tveva asesavirāganirodhā natthi dukkhassa sambhavoti , ayaṃ dutiyānupassanā .

Evaṃ sammā … pe … athāparaṃ etadavoca satthā –

734.

‘‘ JātimaraṇasaṃsāraṃP0.142 , ye vajanti punappunaṃ ;

Itthabhāvaññathābhāvaṃ , avijjāyeva sā gati .

735.

‘‘ Avijjā hāyaṃ mahāmoho , yenidaṃ saṃsitaṃ ciraṃ ;

Vijjāgatā ca ye sattā , na te gacchanti [ nāgacchanti ( sī . pī .)] punabbhavan ’’ ti .

(4)‘‘ Siyā aññenapi … pe … kathañca siyā ?

Yaṃ kiñci dukkhaṃ sambhoti sabbaṃ saṅkhārapaccayāti , ayamekānupassanā .

Saṅkhārānaṃ tveva asesavirāganirodhā natthi dukkhassa sambhavoti , ayaṃ dutiyānupassanā .

Evaṃ sammā … pe … athāparaṃ etadavoca satthā –

736.

‘‘ YaṃV0.192T0.476 kiñci dukkhaṃ sambhoti , sabbaṃ saṅkhārapaccayā ;

Saṅkhārānaṃ nirodhena , natthi dukkhassa sambhavo .

737.

‘‘ Etamādīnavaṃ ñatvā , dukkhaṃ saṅkhārapaccayā ;

Sabbasaṅkhārasamathā , saññānaṃ uparodhanā ;

Evaṃ dukkhakkhayo hoti , etaṃ ñatvā yathātathaṃ .

738.

‘‘ Sammaddasā vedaguno , sammadaññāya paṇḍitā ;

Abhibhuyya mārasaṃyogaṃ , na gacchanti [ nāgacchanti ( sī . pī .)] punabbhavan ’’ ti .

(5)‘‘ SiyāM0.393P0.143 aññenapi … pe … kathañca siyā ?

Yaṃ kiñci dukkhaṃ sambhoti sabbaṃ viññāṇapaccayāti , ayamekānupassanā .

Viññāṇassa tveva asesavirāganirodhā natthi dukkhassa sambhavoti , ayaṃ dutiyānupassanā .

Evaṃ sammā … pe … athāparaṃ etadavoca satthā –

739.

‘‘ Yaṃ kiñci dukkhaṃ sambhoti , sabbaṃ viññāṇapaccayā ;

Viññāṇassa nirodhena , natthi dukkhassa sambhavo .

740.

‘‘ Etamādīnavaṃ ñatvā , dukkhaṃ viññāṇapaccayā ;

Viññāṇūpasamā bhikkhu , nicchāto parinibbuto ’’ ti .

(6)‘‘ Siyā aññenapi … pe … kathañca siyā ?

Yaṃ kiñci dukkhaṃ sambhoti sabbaṃ phassapaccayāti , ayamekānupassanā .

Phassassa tveva asesavirāganirodhā natthi dukkhassa sambhavoti , ayaṃ dutiyānupassanā .

Evaṃ sammā … pe … athāparaṃ etadavocaT0.477 satthā –

741.

‘‘ Tesaṃ phassaparetānaṃ , bhavasotānusārinaṃ ;

Kummaggapaṭipannānaṃ , ārā saṃyojanakkhayo .

742.

‘‘ Ye ca phassaṃ pariññāya , aññāyupasame [ paññāya upasame ( syā .)] ratā ;

Te ve phassābhisamayā , nicchātā parinibbutā ’’ ti .

(7)‘‘ SiyāV0.193 aññenapi … pe … kathañca siyā ?

Yaṃ kiñci dukkhaṃ sambhoti sabbaṃ vedanāpaccayāti , ayamekānupassanā .

Vedanānaṃ tveva asesavirāganirodhā natthi dukkhassa sambhavoti , ayaṃ dutiyānupassanā .

Evaṃ sammā … pe … athāparaṃ etadavoca satthā –

743.

‘‘ SukhaṃP0.144 vā yadi vā dukkhaṃ , adukkhamasukhaṃ saha ;

Ajjhattañca bahiddhā ca , yaṃ kiñci atthi veditaṃ .

744.

‘‘ Etaṃ dukkhanti ñatvāna , mosadhammaṃ palokinaṃ [ palokitaṃ ( sī .)];

Phussa phussa vayaṃ passaṃ , evaṃ tattha vijānati [ virajjati ( ka . sī .)];

Vedanānaṃ khayā bhikkhu , nicchāto parinibbuto ’’ ti .

(8)‘‘ SiyāM0.394 aññenapi … pe … kathañca siyā ?

Yaṃ kiñci dukkhaṃ sambhoti sabbaṃ taṇhāpaccayāti , ayamekānupassanā .

Taṇhāya tveva asesavirāganirodhā natthi dukkhassa sambhavoti , ayaṃ dutiyānupassanā .

Evaṃ sammā … pe … athāparaṃ etadavoca satthā –

745.

‘‘ TaṇhādutiyoT0.478 puriso , dīghamaddhāna saṃsaraṃ ;

Itthabhāvaññathābhāvaṃ , saṃsāraṃ nātivattati .

746.

‘‘ Etamādīnavaṃ ñatvā , taṇhaṃ [ taṇhā ( bahūsu ) itivuttake 15 passitabbaṃ ] dukkhassa sambhavaṃ ;

Vītataṇho anādāno , sato bhikkhu paribbaje ’’ ti .

(9)‘‘ Siyā aññenapi … pe … kathañca siyā ?

Yaṃ kiñci dukkhaṃ sambhoti sabbaṃ upādānapaccayāti , ayamekānupassanā .

Upādānānaṃ [ upādānassa ( syā . ka .)] tveva asesavirāganirodhā natthi dukkhassa sambhavoti , ayaṃ dutiyānupassanā .

Evaṃ sammā … pe … athāparaṃ etadavoca satthā –

747.

‘‘ Upādānapaccayā bhavo , bhūto dukkhaṃ nigacchati ;

Jātassa maraṇaṃ hoti , eso dukkhassa sambhavo .

748.

‘‘ Tasmā upādānakkhayā , sammadaññāya paṇḍitā ;

Jātikkhayaṃ abhiññāya , na gacchanti punabbhavan ’’ ti .

(10)‘‘ SiyāV0.194P0.145 aññenapi … pe … kathañca siyā ?

Yaṃ kiñci dukkhaṃ sambhoti sabbaṃ ārambhapaccayāti , ayamekānupassanā .

Ārambhānaṃ tveva asesavirāganirodhā natthi dukkhassa sambhavoti , ayaṃ dutiyānupassanā .

Evaṃ sammā … pe … athāparaṃ etadavoca satthā –

749.

‘‘ Yaṃ kiñci dukkhaṃ sambhoti , sabbaṃ ārambhapaccayā ;

Ārambhānaṃ nirodhena , natthi dukkhassa sambhavo .

750.

‘‘ EtamādīnavaṃT0.479 ñatvā , dukkhaṃ ārambhapaccayā ;

Sabbārambhaṃ paṭinissajja , anārambhe vimuttino .

751.

‘‘ Ucchinnabhavataṇhassa , santacittassa bhikkhuno ;

Vikkhīṇo [ vitiṇṇo ( sī .)] jātisaṃsāro , natthi tassa punabbhavo ’’ ti .

(11)‘‘ SiyāM0.395 aññenapi … pe … kathañca siyā ?

Yaṃ kiñci dukkhaṃ sambhoti sabbaṃ āhārapaccayāti , ayamekānupassanā .

Āhārānaṃ tveva asesavirāganirodhā natthi dukkhassa sambhavoti , ayaṃ dutiyānupassanā .

Evaṃ sammā … pe … athāparaṃ etadavoca satthā –

752.

‘‘ Yaṃ kiñci dukkhaṃ sambhoti , sabbaṃ āhārapaccayā ;

Āhārānaṃ nirodhena , natthi dukkhassa sambhavo .

753.

‘‘ Etamādīnavaṃ ñatvā , dukkhaṃ āhārapaccayā ;

Sabbāhāraṃ pariññāya , sabbāhāramanissito .

754.

‘‘ ĀrogyaṃP0.146 sammadaññāya , āsavānaṃ parikkhayā ;

Saṅkhāya sevī dhammaṭṭho , saṅkhyaṃ [ saṅkhaṃ ( sī . pī .)] nopeti vedagū ’’ ti .

(12)‘‘ Siyā aññenapi … pe … kathañca siyā ?

Yaṃ kiñci dukkhaṃ sambhoti sabbaṃ iñjitapaccayāti , ayamekānupassanā .

Iñjitānaṃ tveva asesavirāganirodhā natthi dukkhassa sambhavoti , ayaṃ dutiyānupassanā .

Evaṃ sammā … pe … athāparaṃ etadavoca satthā –

755.

‘‘ YaṃV0.195T0.480 kiñci dukkhaṃ sambhoti , sabbaṃ iñjitapaccayā ;

Iñjitānaṃ nirodhena , natthi dukkhassa sambhavo .

756.

‘‘ Etamādīnavaṃ ñatvā , dukkhaṃ iñjitapaccayā ;

Tasmā hi ejaṃ vossajja , saṅkhāre uparundhiya ;

Anejo anupādāno , sato bhikkhu paribbaje ’’ ti .

(13)‘‘ Siyā aññenapi … pe … kathañca siyā ?

Nissitassa calitaṃ hotīti , ayamekānupassanā .

Anissito na calatīti , ayaṃ dutiyānupassanā .

Evaṃ sammā … pe … athāparaṃ etadavoca satthā –

757.

‘‘ Anissito na calati , nissito ca upādiyaṃ ;

Itthabhāvaññathābhāvaṃ , saṃsāraṃ nātivattati .

758.

‘‘ Etamādīnavaṃ ñatvā , nissayesu mahabbhayaṃ ;

Anissito anupādāno , sato bhikkhu paribbaje ’’ ti .

(14)‘‘ SiyāM0.396 aññenapi … pe … kathañca siyā ?

Rūpehi , bhikkhave , arūpā [ āruppā ( sī . pī .)] santatarāti , ayamekānupassanā .

ArūpehiP0.147 nirodho santataroti , ayaṃ dutiyānupassanā .

Evaṃ sammā … pe … athāparaṃ etadavoca satthā –

759.

‘‘ Ye ca rūpūpagā sattā , ye ca arūpaṭṭhāyino [ āruppavāsino ( sī . pī .)];

Nirodhaṃ appajānantā , āgantāro punabbhavaṃ .

760.

‘‘ Ye ca rūpe pariññāya , arūpesu asaṇṭhitā [ susaṇṭhitā ( sī . syā . pī .)];

NirodheT0.481 ye vimuccanti , te janā maccuhāyino ’’ ti .

(15)‘‘ Siyā aññenapi … pe … kathañca siyā ?

Yaṃ , bhikkhave , sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya idaṃ saccanti upanijjhāyitaṃ tadamariyānaṃ etaṃ musāti yathābhūtaṃ sammappaññāya sudiṭṭhaṃ , ayamekānupassanā .

YaṃV0.196 , bhikkhave , sadevakassa … pe … sadevamanussāya idaṃ musāti upanijjhāyitaṃ , tadamariyānaṃ etaṃ saccanti yathābhūtaṃ sammappaññāya sudiṭṭhaṃ , ayaṃ dutiyānupassanā .

Evaṃ sammā … pe … athāparaṃ etadavoca satthā –

761.

‘‘ Anattani attamāniṃ [ attamānī ( syā .), attamānaṃ ( pī . ka .)], passa lokaṃ sadevakaṃ ;

Niviṭṭhaṃ nāmarūpasmiṃ , idaṃ saccanti maññati .

762.

‘‘ Yena yena hi maññanti , tato taṃ hoti aññathā ;

Tañhi tassa musā hoti , mosadhammañhi ittaraṃ .

763.

‘‘ AmosadhammaṃP0.148 nibbānaṃ , tadariyā saccato vidū ;

Te ve saccābhisamayā , nicchātā parinibbutā ’’ ti .

(16)‘‘‘ Siyā aññenapi pariyāyena sammā dvayatānupassanā ’ ti , iti ce , bhikkhave , pucchitāro assu ;

‘ siyā ’ tissu vacanīyā .

Kathañca siyā ?

Yaṃ , bhikkhave , sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya idaṃ sukhanti upanijjhāyitaṃ , tadamariyānaṃ etaṃ dukkhanti yathābhūtaṃ sammappaññāya sudiṭṭhaṃ , ayamekānupassanāT0.482 .

Yaṃ , bhikkhave , sadevakassa … pe … sadevamanussāya idaṃ dukkhanti upanijjhāyitaṃ tadamariyānaṃ etaṃ sukhanti yathābhūtaṃ sammappaññāya sudiṭṭhaṃ , ayaṃM0.397 dutiyānupassanā .

Idamavoca bhagavā .

Idaṃ vatvāna sugato athāparaṃ etadavoca satthā –

764.

‘‘ Rūpā saddā rasā gandhā , phassā dhammā ca kevalā ;

Iṭṭhā kantā manāpā ca , yāvatatthīti vuccati .

765.

‘‘ Sadevakassa lokassa , ete vo sukhasammatā ;

Yattha cete nirujjhanti , taṃ nesaṃ dukkhasammataṃ .

766.

‘‘ SukhantiV0.197 diṭṭhamariyehi , sakkāyassuparodhanaṃ ;

Paccanīkamidaṃ hoti , sabbalokena passataṃ .

767.

‘‘ YaṃP0.149 pare sukhato āhu , tadariyā āhu dukkhato ;

Yaṃ pare dukkhato āhu , tadariyā sukhato vidū .

768.

‘‘ Passa dhammaṃ durājānaṃ , sampamūḷhetthaviddasu [ sampamūḷhettha aviddasu ( sī . pī .), sammūḷhettha aviddasu (?)];

Nivutānaṃ tamo hoti , andhakāro apassataṃ .

769.

‘‘ Satañca vivaṭaṃ hoti , āloko passatāmiva ;

Santike na vijānanti , maggā dhammassa kovidā .

770.

‘‘ BhavarāgaparetehiT0.483 , bhavasotānusāribhi ;

Māradheyyānupannehi , nāyaṃ dhammo susambudho .

771.

‘‘ Ko nu aññatramariyehi , padaṃ sambuddhumarahati ;

Yaṃ padaṃ sammadaññāya , parinibbanti anāsavā ’’ ti .

Idamavoca bhagavā .

Attamanā te bhikkhū bhagavato bhāsitaṃ abhinandunti .

Imasmiṃ ca [ imasmiṃ kho ( sī .)] pana veyyākaraṇasmiṃ bhaññamāne saṭṭhimattānaṃ bhikkhūnaṃ anupādāya āsavehi cittāni vimucciṃsūti .

Dvayatānupassanāsuttaṃ dvādasamaṃ niṭṭhitaṃ .

TassuddānaṃP0.150 –

SaccaṃM0.398 upadhi avijjā ca , saṅkhāre viññāṇapañcamaṃ ;

Phassavedaniyā taṇhā , upādānārambhaāhārā ;

Iñjitaṃ calitaṃ rūpaṃ , saccaṃ dukkhena soḷasāti .

Mahāvaggo tatiyo niṭṭhito .

TassuddānaṃV0.198 –

Pabbajjā ca padhānañca , subhāsitañca sundari ;

Māghasuttaṃ sabhiyo ca , selo sallañca vuccati .

Vāseṭṭho cāpi kokāli , nālako dvayatānupassanā ;

Dvādasetāni suttāni , mahāvaggoti vuccatīti .

Issues

選擇版本

Suttanipātapāḷi

Suttanipātapāḷi