1. Mātuposakacariyā
1.
‘‘ Yadā
T2.568M2.399V2.385P0.84 ahosiṃ pavane , kuñjaro mātuposako ;Na tadā atthi mahiyā , guṇena mama sādiso .
2.
‘‘ Pavane disvā vanacaro , rañño maṃ paṭivedayi ;
‘ Tavānucchavo mahārāja , gajo vasati kānane .
3.
‘‘‘ Na tassa parikkhāyattho , napi āḷakakāsuyā ;
Saha gahite [ samaṃ gahite ( sī .)] soṇḍāya , sayameva idhehi ’ ti .
4.
‘‘ Tassa taṃ vacanaṃ sutvā , rājāpi tuṭṭhamānaso ;
Pesesi hatthidamakaṃ , chekācariyaṃ susikkhitaṃ .
5.
‘‘ Gantvā so hatthidamako , addasa padumassare ;
Bhisamuḷālaṃ [ bhisamūlaṃ ( ka .)] uddharantaṃ , yāpanatthāya mātuyā .
6.
‘‘ Viññāya me sīlaguṇaṃ , lakkhaṇaṃ upadhārayi ;
‘ Ehi puttā ’ ti patvāna , mama soṇḍāya aggahi .
7.
‘‘ Yaṃ me tadā pākatikaṃ , sarīrānugataṃ balaṃ ;
Ajja nāgasahassānaṃ , balena samasādisaṃ .
8.
‘‘ Yadihaṃ tesaṃ pakuppeyyaṃ , upetānaṃ gahaṇāya maṃ ;
Paṭibalo bhave tesaṃ , yāva rajjampi mānusaṃ .
9.
‘‘ Api
T2.569 cāhaṃ sīlarakkhāya , sīlapāramipūriyā ;Na karomi citte aññathattaṃ , pakkhipantaṃ mamāḷake .
10.
‘‘ Yadi te maṃ tattha koṭṭeyyuṃ , pharasūhi tomarehi ca ;
Neva tesaṃ pakuppeyyaṃ , sīlakhaṇḍabhayā mamā ’’ ti .
Mātuposakacariyaṃ paṭhamaṃ .