3. Tatiyabhāṇavāro
319. Tena
P2.168 kho pana samayena āyasmā upanando sakyaputto sāvatthiyaṃ senāsanaṃ gahetvā aññataraṃ gāmakāvāsaṃ agamāsi .Tatthapi senāsanaṃ aggahesi .
Atha kho tesaṃ bhikkhūnaṃ etadahosi –
‘‘ ayaṃ , āvuso , āyasmā upanando sakyaputto bhaṇḍanakārako kalahakārako vivādakārako bhassakārako saṅghe adhikaraṇakārako .
Sacāyaṃ idha vassaṃ vasissati , sabbeva mayaṃ na phāsu bhavissāma .
Handa naṃ pucchāmā ’’ ti .
Atha kho te bhikkhū āyasmantaṃ
V0.298 upanandaṃ sakyaputtaṃ etadavocuṃ –‘‘ nanu tayā , āvuso upananda , sāvatthiyaṃ senāsanaṃ gahitan ’’ ti ?
‘‘ Evamāvuso ’’ ti .
‘‘ Kiṃ pana tvaṃ , āvuso upananda , eko dve paṭibāhasī ’’ ti ?
‘‘ Idhadānāhaṃ āvuso , muñcāmi ;
tattha gaṇhāmī ’’ ti .
Ye te bhikkhū appicchā … pe … te ujjhāyanti
T2.129 khiyyanti vipācenti –‘‘ kathañhi nāma āyasmā upanando sakyaputto
M0.319 eko dve paṭibāhessatī ’’ ti !Bhagavato etamatthaṃ ārocesuṃ … pe …‘‘ saccaṃ kira tvaṃ , upananda , eko dve paṭibāhasī ’’ ti ?
‘‘ Saccaṃ bhagavā ’’ ti .
Vigarahi buddho bhagavā … pe …‘‘ kathañhi nāma tvaṃ , moghapurisa , eko dve paṭibāhissasi ?
Tattha tayā , moghapurisa , gahitaṃ idha muttaṃ , idha tayā gahitaṃ tatra muttaṃ .
Evaṃ kho tvaṃ , moghapurisa , ubhayattha paribāhiro .
Netaṃ , moghapurisa , appasannānaṃ vā pasādāya … pe … vigarahitvā … pe … dhammiṃ kathaṃ katvā bhikkhū āmantesi –
‘‘ na , bhikkhave , ekena dve paṭibāhetabbā .
Yo paṭibāheyya , āpatti dukkaṭassā ’’ ti .
320.[ pāci .438] Tena kho pana samayena bhagavā bhikkhūnaṃ anekapariyāyena vinayakathaṃ katheti , vinayassa vaṇṇaṃ bhāsati , vinayapariyattiyā vaṇṇaṃ bhāsati , ādissa ādissa āyasmato upālissa vaṇṇaṃ bhāsati .
Bhikkhūnaṃ etadahosi –
‘‘ bhagavā kho anekapariyāyena vinayakathaṃ katheti , vinayassa vaṇṇaṃ bhāsati , vinayapariyattiyā vaṇṇaṃ bhāsati , ādissa ādissa āyasmato upālissa vaṇṇaṃ bhāsati .
Handa mayaṃ , āvuso , āyasmato upālissa santike vinayaṃ pariyāpuṇāmā ’’ ti .
Tedha [ te ca ( syā . ka .)] bahū bhikkhū therā ca navā ca majjhimā ca āyasmato upālissa
T2.130 santike vinayaṃ pariyāpuṇanti .Āyasmā upāli ṭhitakova uddisati therānaṃ bhikkhūnaṃ gāravena .
Therāpi bhikkhū ṭhitakāva uddisāpenti dhammagāravena .
Tattha therā ceva bhikkhū kilamanti , āyasmā ca upāli kilamati .
Bhagavato etamatthaṃ ārocesuṃ .
‘‘ Anujānāmi , bhikkhave , navakena bhikkhunā
P2.169 uddisantena samake vā āsane nisīdituṃ , uccatare vā dhammagāravena ;therena bhikkhunā uddisāpentena samake vā āsane nisīdituṃ , nīcatare vā dhammagāravenā ’’ ti .
Tena kho pana samayena bahū bhikkhū āyasmato upālissa santike ṭhitakā uddesaṃ paṭimānentā kilamanti .
Bhagavato etamatthaṃ ārocesuṃ .
‘‘ Anujānāmi , bhikkhave , samānāsanikehi saha nisīditun ’’ ti .
Atha kho bhikkhūnaṃ etadahosi –
‘‘ kittāvatā nu kho samānāsaniko hotī ’’ ti ?
Bhagavato etamatthaṃ ārocesuṃ –
‘‘ anujānāmi , bhikkhave , tivassantarena saha nisīditun ’’ ti .
Tena
M0.320V0.299 kho pana samayena sambahulā bhikkhū samānāsanikā mañce [ ekamañce ( syā .)] nisīditvā mañcaṃ bhindiṃsu , pīṭhe [ ekapīṭhe ( syā .)] nisīditvā pīṭhaṃ bhindiṃsu .Bhagavato etamatthaṃ ārocesuṃ .
‘‘ Anujānāmi , bhikkhave , tivaggassa
T2.131 mañcaṃ , tivaggassa pīṭhan ’’ ti .Tivaggopi mañce nisīditvā mañcaṃ bhindi , pīṭhe nisīditvā pīṭhaṃ bhindi … pe …‘‘ anujānāmi , bhikkhave , duvaggassa mañcaṃ , duvaggassa pīṭhan ’’ ti .
Tena kho pana samayena bhikkhū asamānāsanikehi saha dīghāsane nisīdituṃ kukkuccāyanti .
Bhagavato etamatthaṃ ārocesuṃ .
‘‘ Anujānāmi , bhikkhave , ṭhapetvā paṇḍakaṃ , mātugāmaṃ , ubhatobyañjanakaṃ , asamānāsanikehi saha dīghāsane nisīditun ’’ ti .
Atha kho bhikkhūnaṃ etadahosi –
‘‘ kittakaṃ pacchimaṃ nu kho dīghāsanaṃ hotī ’’ ti ?
Bhagavato etamatthaṃ ārocesuṃ .
‘‘ Anujānāmi , bhikkhave , yaṃ tiṇṇaṃ pahoti , ettakaṃ pacchimaṃ dīghāsanan ’’ ti .
Tena kho pana samayena visākhā migāramātā saṅghassa atthāya sāḷindaṃ pāsādaṃ kārāpetukāmā hoti hatthinakhakaṃ .
Atha kho bhikkhūnaṃ etadahosi –
‘‘ kiṃ nu kho bhagavatā pāsādaparibhogo anuññāto kiṃ ananuññāto ’’ ti ?
Bhagavato etamatthaṃ ārocesuṃ .
‘‘ Anujānāmi , bhikkhave , sabbaṃ pāsādaparibhogan ’’ ti .
Tena kho pana samayena rañño pasenadissa kosalassa ayyikā kālaṅkatā hoti .
Tassa kālaṅkiriyāya saṅghassa bahuṃ akappiyabhaṇḍaṃ uppannaṃ hoti , seyyathidaṃ – āsandi , pallaṅko , gonako
T2.132 , cittako , paṭikā , paṭalikā , tūlikā , vikatikā , uddalomī , ekantalomī , kaṭṭissaṃ , koseyyaṃ , kuttakaṃ , hatthattharaṃ , assattharaṃ , rathattharaṃ , ajinappaveṇi , kadalimigappavarapaccattharaṇaṃ , sauttaracchadaṃ , ubhatolohitakūpadhānaṃ .Bhagavato etamatthaṃ ārocesuṃ .
‘‘ Anujānāmi , bhikkhave , āsandiyā pāde chinditvā
P2.170 paribhuñjituṃ , pallaṅkassa vāḷe bhinditvā paribhuñjituṃ , tūlikaṃ vijaṭetvā bibbohanaṃ kātuṃ , avasesaṃ bhūmattharaṇaṃ [ summattharaṇaṃ ( sī . syā .)] kātun ’’ ti .