3. Amūḷhavinayo

Author： _System_Pali_VRI_ @ Administrator

3. Amūḷhavinayo

196. TenaM0.199 kho pana samayena gaggo bhikkhu ummattako hoti , cittavipariyāsakato .

Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ .

Bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codenti –

‘‘ saratāyasmā evarūpiṃ āpattiṃ āpajjitā ’’ ti ?

So evaṃ vadeti –

‘‘ ahaṃ kho , āvusoP2.81 , ummattako ahosiṃ cittavipariyāsakato .

Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ .

Nāhaṃ taṃ sarāmi .

Mūḷhena me etaṃ katan ’’ ti .

Evampi naṃ vuccamānā codenteva –

‘‘ saratāyasmā evarūpiṃ āpattiṃ āpajjitā ’’ ti ?

Ye te bhikkhū appicchā .

pe … te ujjhāyanti khiyyanti vipācenti –

‘‘ kathañhi nāma bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codessanti –

‘‘ saratāyasmā evarūpiṃ āpattiṃ āpajjitā ’ ti !

So evaṃ vadetiT1.316 –

‘ ahaṃ kho , āvuso , ummattako ahosiṃ cittavipariyāsakato .

Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ .

Nāhaṃ taṃ sarāmi .

Mūḷhena me etaṃ katan ’ ti .

Evampi naṃ vuccamānā codenteva –

‘‘ saratāyasmā evarūpiṃ āpattiṃ āpajjitā ’’ ti ?

Atha kho te bhikkhū bhagavato etamatthaṃ ārocesuṃ … pe …‘‘ saccaṃ kira , bhikkhave … pe … saccaṃ bhagavā ’’ ti … pe … vigarahitvā … pe … dhammiṃ kathaṃ katvā bhikkhū āmantesi –

‘‘ Tena hi , bhikkhave , saṅgho gaggassa bhikkhuno amūḷhassa amūḷhavinayaṃ detu .

EvañcaV0.184 pana , bhikkhave , dātabbo –

‘‘ tena , bhikkhave , gaggena bhikkhunā saṅghaṃ upasaṅkamitvā , ekaṃsaṃ uttarāsaṅgaṃ karitvā , vuḍḍhānaṃ bhikkhūnaṃ pāde vanditvā , ukkuṭikaṃ nisīditvā , añjaliṃ paggahetvā , evamassa vacanīyo –

‘ ahaṃ , bhante , ummattako ahosiṃ cittavipariyāsakato .

Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ .

Maṃ bhikkhū ummattakena cittavipariyāsakatena ajjhāciṇṇena āpattiyā codenti –

‘ saratāyasmā evarūpiṃ āpattiṃ āpajjitā ’ ti ?

Tyāhaṃ evaṃ vadāmi –

‘ ahaṃ kho , āvuso , ummattako ahosiṃ cittavipariyāsakato .

Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ .

Nāhaṃ taṃ sarāmi .

Mūḷhena me etaṃ katan ’ ti .

Evampi maṃ vuccamānā codentevaM0.200 –

‘ saratāyasmā evarūpiṃ āpattiṃ āpajjitā ’ ti ?

SohaṃT1.317 , bhante , amūḷho saṅghaṃ amūḷhavinayaṃ yācāmī ’ ti .

Dutiyampi yācitabbo .

Tatiyampi yācitabbo –

‘ ahaṃ , bhante , ummattako ahosiṃ cittavipariyāsakato .

Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ .

Maṃ bhikkhū ummattakena cittavipariyāsakatena ajjhāciṇṇena āpattiyā codenti –

‘ saratāyasmā evarūpiṃ āpattiṃ āpajjitā ’ ti ?

Tyāhaṃ evaṃ vadāmi –

‘ ahaṃ kho , āvuso , ummattako ahosiṃ cittavipariyāsakato .

Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ .

Nāhaṃ taṃ sarāmi mūḷhena me etaṃ katan ’ ti .

Evampi maṃ vuccamānā codenteva –

‘ saratāyasmā evarūpiṃ āpattiṃ āpajjitā ’ ti ?

Sohaṃ amūḷho [ sohaṃ bhante amūḷho ( ka .)] tatiyampi , bhante , saṅghaṃ amūḷhavinayaṃ yācāmī ’ ti .

Byattena bhikkhunā paṭibalena saṅgho ñāpetabbo –

197.‘‘ Suṇātu me , bhante , saṅgho .

Ayaṃ gaggo bhikkhu ummattako ahosi cittavipariyāsakato .

Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ .

Bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codenti –

‘ saratāyasmā evarūpiṃ āpattiṃ āpajjitā ’ ti ?

So evaṃ vadeti –

‘ ahaṃ kho , āvuso , ummattako ahosiṃ cittavipariyāsakato .

Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃT1.318 bhāsitaparikkantaṃ .

Nāhaṃ taṃ sarāmi , mūḷhenaP2.82 me etaṃ katan ’ ti .

Evampi naṃ vuccamānā codenteva –

‘ saratāyasmā evarūpiṃ āpattiṃ āpajjitā ’ ti ?

So amūḷho saṅghaṃ amūḷhavinayaṃ yācati .

Yadi saṅghassa pattakallaṃ , saṅgho gaggassa bhikkhuno amūḷhassa amūḷhavinayaṃ dadeyya .

Esā ñatti .

‘‘ SuṇātuV0.185 me , bhante , saṅgho .

Ayaṃ gaggo bhikkhu ummattako ahosi cittavipariyāsakato .

Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ .

Bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codenti –

‘ saratāyasmā evarūpiṃ āpattiṃ āpajjitā ’ ti ?

So evaṃ vadeti –

‘ ahaṃ kho , āvuso , ummattako ahosiṃ cittavipariyāsakato .

Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃM0.201 bhāsitaparikkantaṃ .

Nāhaṃ taṃ sarāmi mūḷhena me etaṃ katan ’ ti .

Evampi naṃ vuccamānā codenteva –

‘ saratāyasmā evarūpiṃ āpattiṃ āpajjitā ’ ti ?

So amūḷho saṅghaṃ amūḷhavinayaṃ yācati .

Saṅgho gaggassa bhikkhuno amūḷhassa amūḷhavinayaṃ deti .

Yassāyasmato khamati gaggassa bhikkhuno amūḷhassa amūḷhavinayassa dānaṃ , so tuṇhassa ;

yassa nakkhamati , so bhāseyya .

‘‘ Dutiyampi etamatthaṃ vadāmi … pe … tatiyampi etamatthaṃ vadāmi … pe ….

‘‘ Dinno saṅghena gaggassa bhikkhuno amūḷhassa amūḷhavinayo .

Khamati saṅghassa , tasmā tuṇhīT1.319 , evametaṃ dhārayāmī ’’ ti .

198.‘‘ Tīṇimāni , bhikkhave , adhammikāni amūḷhavinayassa dānāni , tīṇi dhammikāni .

Kammāni tīṇi adhammikāni amūḷhavinayassa dānāni ?

‘‘ Idha pana , bhikkhave , bhikkhu āpattiṃ āpanno hoti .

Tamenaṃ codeti saṅgho vā , sambahulā vā , ekapuggalo vā –

‘ saratāyasmā evarūpiṃ āpattiṃ āpajjitā ’ ti ?

So saramānova evaṃ vadeti –

‘ na kho ahaṃ , āvuso , sarāmi evarūpiṃ āpattiṃ āpajjitā ’ ti .

Tassa saṅgho amūḷhavinayaṃ deti .

Adhammikaṃ amūḷhavinayassa dānaṃ .

‘‘ Idha pana , bhikkhave , bhikkhu āpattiṃ āpanno hoti .

Tamenaṃ codeti saṅgho vā , sambahulā vā , ekapuggalo vā –

‘ saratāyasmā evarūpiṃ āpattiṃ āpajjitā ’ ti ?

So saramānova evaṃ vadeti –

‘ sarāmi kho ahaṃ , āvuso , yathāsupinantenā ’ ti .

Tassa saṅgho amūḷhavinayaṃ deti .

Adhammikaṃ amūḷhavinayassa dānaṃ .

‘‘ Idha pana , bhikkhave , bhikkhu āpattiṃ āpanno hoti .

Tamenaṃ codeti saṅgho vā , sambahulāV0.186 vā , ekapuggalo vā –

‘ saratāyasmā evarūpiṃ āpattiṃ āpajjitā ’ ti ?

So anummattako ummattakālayaṃ karoti –

‘ ahampi kho evaṃ karomi .

Tumhepi evaṃ karotha .

Mayhampi etaṃ kappati .

Tumhākampetaṃ kappatī ’ ti .

Tassa saṅgho amūḷhavinayaṃ deti .

Adhammikaṃ amūḷhavinayassa dānaṃ .

Imāni tīṇi adhammikāni amūḷhavinayassa dānāni .

199.‘‘ KatamāniT1.320M0.202 tīṇi dhammikāni amūḷhavinayassa dānāni ?

‘‘ Idha pana , bhikkhave , bhikkhu ummattako hoti cittavipariyāsakato .

Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ .

Tamenaṃ codeti saṅgho vā , sambahulā vā , ekapuggalo vā –

‘ saratāyasmā evarūpiṃ āpattiṃ āpajjitā ’ ti ?

So assaramānova evaṃ vadeti –

‘ na kho ahaṃ , āvuso , sarāmi evarūpiṃ āpattiṃ āpajjitā ’ ti .

Tassa saṅgho amūḷhavinayaṃ deti .

Dhammikaṃ amūḷhavinayassa dānaṃ .

‘‘ Idha pana , bhikkhave , bhikkhu ummattako hoti cittavipariyāsakato .

Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ .

Tamenaṃ codeti saṅgho vā , sambahulā vā , ekapuggalo vā –

‘ saratāyasmā evarūpiṃ āpattiṃ āpajjitā ’ tiP2.83 ?

So assaramānova evaṃ vadeti –

‘ sarāmi kho ahaṃ , āvuso , yathā supinantenā ’ ti .

Tassa saṅgho amūḷhavinayaṃ deti .

Dhammikaṃ amūḷhavinayassa dānaṃ .

‘‘ Idha pana , bhikkhave , bhikkhu ummattako hoti cittavipariyāsakato .

Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ .

Tamenaṃ codeti saṅgho vā , sambahulā vā , ekapuggalo vā –

‘ saratāyasmā evarūpiṃ āpattiṃ āpajjitā ’ ti ?

So ummattako ummattakālayaṃ karoti –

‘ ahampi evaṃT1.321 karomi .

Tumhepi evaṃ karotha .

Mayhampi etaṃ kappati .

Tumhākampetaṃ kappatī ’ ti .

Tassa saṅgho amūḷhavinayaṃ deti .

Dhammikaṃ amūḷhavinayassa dānaṃ .

‘‘ Imāni tīṇi dhammikāni amūḷhavinayassa dānānī ’’ ti .

Issues

Select Version

Cūḷavaggapāḷi

Cūḷavaggapāḷi