Issues
Editor
Settings
Versions
Select Version
Bhāsāṭīkā-ဘာသာဋီကာ
မြန်မာဘာသာ
Bhikkhunīvibhaṅgavaṇṇanā
Bhikkhunīvibhaṅgavaṇṇanā

3. Naggavaggo

Author： _System_Pali_VRI_ @ Administrator

3. Naggavaggo

1. Paṭhamasikkhāpadavaṇṇanā

883-6.
NaggavaggassaP4.929M0.205 paṭhamasikkhāpade – brahmacariyaṃ ciṇṇenāti brahmacariyena ciṇṇena ;
atha vā brahmacariyassa caraṇenāti ;
evaṃ karaṇatthe vā sāmiatthe vā upayogavacanaṃ veditabbaṃ .
Acchinnacīvarikāyāti idaṃ udakasāṭikaṃ sandhāya vuttaṃ , na aññaṃ cīvaraṃ .
Tasmā udakasāṭikāya acchinnāya vā naṭṭhāya vā naggāya nhāyantiyā anāpatti .
Sacepi udakasāṭikacīvaraṃ mahagghaṃ hoti , na sakkā nivāsetvā bahi gantuṃ , evampi naggāya nhāyituṃ vaṭṭati .
Sesamettha uttānameva .
EḷakalomasamuṭṭhānaṃV0.195 – kiriyaṃ , nosaññāvimokkhaṃ , acittakaṃ , paṇṇattivajjaṃ , kāyakammaṃ , ticittaṃ , tivedananti .
Paṭhamasikkhāpadaṃ .

2. Dutiyasikkhāpadavaṇṇanā

887. Dutiye – sabbaṃ uttānameva .
Chasamuṭṭhānaṃ – kiriyaṃ , nosaññāvimokkhaṃ , acittakaṃ , paṇṇattivajjaṃ , kāyakammaṃ , vacīkammaṃ , ticittaṃ , tivedananti .
Dutiyasikkhāpadaṃ .

3. Tatiyasikkhāpadavaṇṇanā

893-4.
Tatiye – anantarāyikinīti dasasu antarāyesu ekenapi antarāyena anantarāyā .
Dhuraṃ nikkhittamatteti dhuraṃ nikkhipitvā sacepi pacchā sibbati , āpattiyevāti attho .
Sesaṃ uttānameva .
Dhuranikkhepasamuṭṭhānaṃ – akiriyaṃ , saññāvimokkhaṃ , sacittakaṃ , lokavajjaṃ , kāyakammaṃ , vacīkammaṃ , akusalacittaṃ , dukkhavedananti .
Tatiyasikkhāpadaṃ .

4. Catutthasikkhāpadavaṇṇanā

898-9.
CatuttheM0.206 – pañca ahāni pañcāhaṃ , pañcāhameva pañcāhikaṃ .
Saṅghāṭīnaṃ cāro saṅghāṭicāro ;
paribhogavasena vā otāpanavasena vā saṅghaṭitaṭṭhena saṅghāṭīti laddhanāmānaṃ pañcannaṃ cīvarānaṃ parivattananti attho .
Tasmāyeva padabhājane ‘‘ pañcamaṃ divasaṃ pañca cīvarānī ’’ tiādimāha .
Āpatti pācittiyassāti ettha ca ekasmiṃ cīvare ekā āpatti ;
pañcasu pañca .
900. ĀpadāsūtiV0.196 mahagghaṃ cīvaraṃ , na sakkā hoti corabhayādīsu paribhuñjituṃ ;
evarūpe upaddave anāpatti .
Sesaṃ uttānameva .
KathinasamuṭṭhānaṃP4.930 – akiriyaṃ , nosaññāvimokkhaṃ , acittakaṃ , paṇṇattivajjaṃ , kāyakammaṃ , vacīkammaṃ , ticittaṃ , tivedananti .
Catutthasikkhāpadaṃ .

5. Pañcamasikkhāpadavaṇṇanā

903. Pañcame – cīvarasaṅkamanīyan ti saṅkametabbaṃ cīvaraṃ ;
aññissā santakaṃ anāpucchā gahitaṃ puna paṭidātabbacīvaranti attho .
906. Āpadāsūti sace apārutaṃ vā anivatthaṃ vā corā haranti , evarūpāsu āpadāsu dhārentiyā anāpatti .
Sesaṃ uttānameva .
Kathinasamuṭṭhānaṃ – kiriyākiriyaṃ , nosaññāvimokkhaṃ , acittakaṃ , paṇṇattivajjaṃ , kāyakammaṃ , vacīkammaṃ , ticittaṃ , tivedananti .
Pañcamasikkhāpadaṃ .

6. Chaṭṭhasikkhāpadavaṇṇanā

909-10.
Chaṭṭhe – aññaṃ parikkhāran ti yaṃkiñci thālakādīnaṃ vā sappitelādīnaṃ vā aññataraṃ .
Ānisaṃsan ti ‘‘ kittakaṃ agghanakaṃ dātukāmatthā ’’ ti pucchati ,‘‘ ettakaṃ nāmā ’’ ti vadanti ,‘‘ āgametha tāva , idāni vatthaṃ mahagghaṃ , katipāhena kappāse āgate samagghaṃ bhavissatī ’’ ti evaṃ vatvā nivārentiyā anāpatti .
Sesaṃ uttānameva .
TisamuṭṭhānaṃM0.207 – kiriyaṃ , saññāvimokkhaṃ , sacittakaṃ , lokavajjaṃ , kāyakammaṃ , vacīkammaṃ , akusalacittaṃ , tivedananti .
Chaṭṭhasikkhāpadaṃ .

7. Sattamasikkhāpadavaṇṇanā

911. SattameV0.197 – pakkamiṃsūti aññāsampi āgamanaṃ āgamentī ‘‘ addhā amhākampi āgamessatī ’’ ti tattha tattha agamaṃsu .
Paṭibāheyyāti paṭisedheyya .
915. Ānisaṃsan ti ‘‘ ekissā ekaṃ sāṭakaṃ nappahoti , āgametha tāva , katipāhena uppajjissati , tato bhājessāmī ’’ ti evaṃ ānisaṃsaṃ dassetvā paṭibāhantiyā anāpatti .
Sesaṃ uttānameva .
Tisamuṭṭhānaṃ – kiriyaṃ , saññāvimokkhaṃ , sacittakaṃ , paṇṇattivajjaṃ , kāyakammaṃ , vacīkammaṃ , ticittaṃ , tivedananti .
Sattamasikkhāpadaṃ .

8. Aṭṭhamasikkhāpadavaṇṇanā

916-8.
AṭṭhameP4.931 – naṭā nāma ye nāṭakaṃ nāṭenti .
Naṭakā nāma ye naccanti .
Laṅghakā nāma ye vaṃsavarattādīsu laṅghanakammaṃ karonti .
Sokajjhāyikā nāma māyākārā .
Kumbhathūṇikā nāma ghaṭakena kīḷanakā ;
bimbisakavādakātipi vadanti .
Deti āpatti pācittiyassāti ettha cīvaragaṇanāya āpattiyo veditabbā .
Sesaṃ uttānameva .
Chasamuṭṭhānaṃ – kiriyaṃ , nosaññāvimokkhaṃ , acittakaṃ , paṇṇattivajjaṃ , kāyakammaṃ , vacīkammaṃ , ticittaṃ , tivedananti .
Aṭṭhamasikkhāpadaṃ .

9. Navamasikkhāpadavaṇṇanā

921-4.
NavameM0.208 – dubbalacīvarapaccāsāyāti dubbalāya cīvarapaccāsāya .
Ānisaṃsan ti kiñcāpi ‘‘ na mayaṃ ayye sakkomā ’’ ti vadanti ,‘‘ idāni pana tesaṃ kappāso āgamissatiV0.198 , saddho pasanno puriso āgamissati , addhā dassatī ’’ ti evaṃ ānisaṃsaṃ dassetvā nivārentiyā anāpatti .
Sesaṃ uttānameva .
Tisamuṭṭhānaṃ – kiriyaṃ , saññāvimokkhaṃ , sacittakaṃ , lokavajjaṃ , kāyakammaṃ , vacīkammaṃ , akusalacittaṃ , tivedananti .
Navamasikkhāpadaṃ .

10. Dasamasikkhāpadavaṇṇanā

927. Dasame – kathinuddhāraṃ na dassantīti kīdiso kathinuddhāro dātabbo , kīdiso na dātabboti ?
Yassa atthāramūlako ānisaṃso mahā , ubbhāramūlako appo , evarūpo na dātabbo .
Yassa pana atthāramūlako ānisaṃso appo , ubbhāramūlako mahā , evarūpo dātabbo .
Samānisaṃsopi saddhāparipālanatthaṃ dātabbova .
931. Ānisaṃsan ti bhikkhunisaṅgho jiṇṇacīvaro , kathinānisaṃsamūlako mahālābhotiP4.932 evarūpaṃ ānisaṃsaṃ dassetvā paṭibāhantiyā anāpatti .
Sesaṃ uttānameva .
Tisamuṭṭhānaṃ – kiriyaṃ , saññāvimokkhaṃ , sacittakaṃ , lokavajjaṃ , kāyakammaṃ , vacīkammaṃ , akusalacittaṃ , tivedananti .
Dasamasikkhāpadaṃ .
Naggavaggo tatiyo .