1. Paṭhamasikkhāpadavaṇṇanā
978. Cittāgāravaggassa
M0.212V0.202 paṭhamasikkhāpade – rājāgāran ti rañño kīḷanagharaṃ .Cittāgāran ti kīḷanacittasālaṃ .
Ārāman ti kīḷanaupavanaṃ .
Uyyānan ti kīḷanuyyānaṃ .
Pokkharaṇīn ti kīḷanapokkharaṇiṃ .
Tasmāyeva padabhājane ‘‘ yattha katthaci rañño kīḷitun ’’ tiādi vuttaṃ .
Dassanāya gacchati āpatti dukkaṭassāti ettha padavāragaṇanāya dukkaṭaṃ .
Yattha ṭhitā passatīti ettha pana sace ekasmiṃyeva ṭhāne ṭhitā padaṃ anuddharamānā pañcapi passati , ekameva pācittiyaṃ .
Taṃ taṃ disābhāgaṃ oloketvā passantiyā pana pāṭekkā āpattiyo .
Bhikkhussa pana sabbattha dukkaṭaṃ .
981. Ārāme ṭhitāti ajjhārāme rājāgārādīni karonti , tāni passantiyā anāpatti .
Gacchantī vā āgacchantī vāti piṇḍapātādīnaṃ atthāya gacchantiyā maggo hoti , tāni passati , anāpatti .
Sati karaṇīye gantvāti rañño santikaṃ kenaci karaṇīyena gantvā passati , anāpatti .
Āpadāsūti kenaci upaddutā pavisitvā passati , anāpatti .
Sesaṃ uttānameva .
Eḷakalomasamuṭṭhānaṃ – kiriyaṃ , nosaññāvimokkhaṃ , acittakaṃ , lokavajjaṃ , kāyakammaṃ , akusalacittaṃ , tivedananti .
Paṭhamasikkhāpadaṃ .