2. Uddesavāro
1. Tattha katame soḷasa hārā ?
Desanā vicayo yutti padaṭṭhāno lakkhaṇo catubyūho āvaṭṭo vibhatti parivattano vevacano paññatti
M0.2 otaraṇo sodhano adhiṭṭhāno parikkhāro samāropano iti .Tassānugīti
Desanā
P0.2 vicayo yutti , padaṭṭhāno ca lakkhaṇo ;Catubyūho ca āvaṭṭo , vibhatti parivattano .
Vevacano ca paññatti , otaraṇo ca sodhano ;
Adhiṭṭhāno parikkhāro , samāropano soḷaso [ soḷasa ( sī .)].
Ete soḷasa hārā , pakittitā atthato asaṃkiṇṇā ;
Etesañceva bhavati , vitthāratayā nayavibhattīti .
2. Tattha katame pañca nayā ?
Nandiyāvaṭṭo tipukkhalo sīhavikkīḷito disālocano aṅkuso iti .
Tassānugīti
Paṭhamo nandiyāvaṭṭo , dutiyo ca tipukkhalo ;
Sīhavikkīḷito nāma , tatiyo nayalañjako [ nayalañchako ( sī .)].
Disālocanamāhaṃsu
V0.3 , catutthaṃ nayamuttamaṃ ;Pañcamo aṅkuso nāma , sabbe pañca nayā gatāti .
3. Tattha katamāni aṭṭhārasa mūlapadāni ?
Nava padāni kusalāni nava padāni akusalāni .
Tattha katamāni nava padāni akusalāni , taṇhā avijjā lobho doso moho subhasaññā sukhasaññā niccasaññā attasaññāti , imāni nava padāni akusalāni , yattha sabbo akusalapakkho saṅgahaṃ samosaraṇaṃ gacchati .
Tattha katamāni nava padāni kusalāni ?
Samatho vipassanā alobho adoso amoho asubhasaññā dukkhasaññā aniccasaññā anattasaññāti , imāni nava padāni kusalāni , yattha sabbo kusalapakkho saṅgahaṃ samosaraṇaṃ gacchati .
Tatridaṃ uddānaṃ
Taṇhā
M0.3 ca avijjāpi ca , lobho doso tatheva moho ca ;Caturo ca vipallāsā , kilesabhūmī nava padāni .
Samatho
P0.3 ca vipassanā ca , kusalāni ca yāni tīṇi mūlāni ;Caturo satipaṭṭhānā , indriyabhūmī nava padāni .
Navahi ca padehi kusalā , navahi ca yujjanti akusalapakkhā ;
Ete kho mūlapadā , bhavanti aṭṭhārasa padānīti .
Uddesavāro .