7. Sunikkhittavaggo

1. Cittalatāvimānavatthu

1114.

‘‘ YathāM0.103V0.75P0.111 vanaṃ cittalataṃ pabhāsati , uyyānaseṭṭhaṃ tidasānamuttamaṃ ;

Tathūpamaṃ tuyhamidaṃ vimānaṃ , obhāsayaṃ tiṭṭhati antalikkhe .

1115.

‘‘ Deviddhipattosi mahānubhāvo , manussabhūto kimakāsi puññaṃ ;

Kenāsi evaṃ jalitānubhāvo , vaṇṇo ca te sabbadisā pabhāsatī ’’ ti .

1116.

So devaputto attamano … pe …T0.127 yassa kammassidaṃ phalaṃ .

1117.

‘‘ Ahaṃ manussesu manussabhūto , daliddo atāṇo kapaṇo kammakaro ahosiṃ ;

Jiṇṇe ca mātāpitaro abhāriṃ [ abhariṃ ( sī . syā .)], piyā ca me sīlavanto ahesuṃ ;

Annañca pānañca pasannacitto , sakkacca dānaṃ vipulaṃ adāsi .

1118.

‘‘ Tena metādiso vaṇṇo … pe … vaṇṇo ca me sabbadisā pabhāsatī ’’ ti .

Cittalatāvimānaṃ paṭhamaṃ .

2. Nandanavimānavatthu

1120.

‘‘ YathāP0.112 vanaṃ nandanaṃ [ nandanaṃ cittalataṃ ( sī . syā . ka .), nandavanaṃ ( ka .)] pabhāsati , uyyānaseṭṭhaṃ tidasānamuttamaṃ ;

Tathūpamaṃ tuyhamidaṃ vimānaṃ , obhāsayaṃ tiṭṭhati antalikkhe .

1121.

‘‘ DeviddhipattosiM0.104 mahānubhāvo , manussabhūto kimakāsi puññaṃ ;

Kenāsi evaṃ jalitānubhāvo , vaṇṇo ca te sabbadisā pabhāsatī ’’ ti .

1122.

So devaputto attamano … pe …T0.128 yassa kammassidaṃ phalaṃ .

1123.

‘‘ Ahaṃ manussesu manussabhūto , daliddo atāṇo kapaṇo kammakaro ahosiṃ ;

Jiṇṇe ca mātāpitaro abhāriṃ , piyā ca me sīlavanto ahesuṃ ;

Annañca pānañca pasannacitto , sakkacca dānaṃ vipulaṃ adāsiṃ .

1124.

‘‘ TenaV0.76 metādiso vaṇṇo … pe … vaṇṇo ca me sabbadisā pabhāsatī ’’ ti .

Nandanavimānaṃ dutiyaṃ .

3. Maṇithūṇavimānavatthu

1126.

‘‘ UccamidaṃP0.113 maṇithūṇaṃ vimānaṃ , samantato dvādasa yojanāni ;

Kūṭāgārā sattasatā uḷārā , veḷuriyathambhā rucakatthatā subhā .

1127.

‘‘ Tatthacchasi pivasi khādasi ca , dibbā ca vīṇā pavadanti vagguṃ ;

Dibbā rasā kāmaguṇettha pañca , nāriyo ca naccanti suvaṇṇachannā .

1128.

‘‘ Kena tetādiso vaṇṇo … pe … vaṇṇo ca te sabbadisā pabhāsatī ’’ ti .

1130.

SoT0.129 devaputto attamano … pe … yassa kammassidaṃ phalaṃ .

1131.

‘‘ AhaṃM0.105 manussesu manussabhūto , vivane pathe saṅkamanaṃ [ caṅkamanaṃ ( sī .), caṅkamaṃ ( syā .), samakaṃ ( ka . sī .)] akāsiṃ ;

Ārāmarukkhāni ca ropayissaṃ , piyā ca me sīlavanto ahesuṃ ;

Annañca pānañca pasannacitto , sakkacca dānaṃ vipulaṃ adāsiṃ .

1132.

‘‘ Tena metādiso vaṇṇo … pe … vaṇṇo ca me sabbadisā pabhāsatī ’’ ti .

Maṇithūṇavimānaṃ tatiyaṃ .

4. Suvaṇṇavimānavatthu

1134.

‘‘ SovaṇṇamayeP0.114 pabbatasmiṃ , vimānaṃ sabbatopabhaṃ ;

Hemajālapaṭicchannaṃ [ hemajālakapacchannaṃ ( sī .)], kiṅkiṇi [ kiṅkaṇika ( syā . ka .), kiṅkiṇika ( pī .)] jālakappitaṃ .

1135.

‘‘ Aṭṭhaṃsā sukatā thambhā , sabbe veḷuriyāmayā ;

Ekamekāya aṃsiyā , ratanā satta nimmitā .

1136.

‘‘ Veḷuriyasuvaṇṇassa , phalikā rūpiyassa ca ;

Masāragallamuttāhi , lohitaṅgamaṇīhi ca .

1137.

‘‘ Citrā manoramā bhūmi , na tatthuddhaṃsatī rajo ;

Gopāṇasīgaṇā pītā , kūṭaṃ dhārenti nimmitā .

1138.

‘‘ SopāṇāniV0.77 ca cattāri , nimmitā caturo disā ;

NānāratanagabbhehiT0.130 , ādiccova virocati .

1139.

‘‘ Vediyā catasso tattha , vibhattā bhāgaso mitā ;

Daddallamānā ābhanti , samantā caturo disā .

1140.

‘‘ Tasmiṃ vimāne pavare , devaputto mahappabho ;

Atirocasi vaṇṇena , udayantova bhāṇumā .

1141.

‘‘ DānassaM0.106 te idaṃ phalaṃ , atho sīlassa vā pana ;

Atho añjalikammassa , taṃ me akkhāhi pucchito ’’.

1142.

So devaputto attamano … pe … yassa kammassidaṃ phalaṃ .

1143.

‘‘ Ahaṃ andhakavindasmiṃ , buddhassādiccabandhuno ;

Vihāraṃ satthu kāresiṃ , pasanno sehi pāṇibhi .

1144.

‘‘ Tattha gandhañca mālañca , paccayañca [ paccaggañca ( sī .), paccagghañca (?)] vilepanaṃ ;

Vihāraṃ satthu adāsiṃ , vippasannena cetasā ;

Tena mayhaṃ idaṃ laddhaṃ , vasaṃ vattemi nandane .

1145.

‘‘ Nandane ca vane [ nandane pavane ( sī . syā .)] ramme , nānādijagaṇāyute ;

Ramāmi naccagītehi , accharāhi purakkhato ’’ ti .

Suvaṇṇavimānaṃ catutthaṃ .

5. Ambavimānavatthu

1146.

‘‘ UccamidaṃP0.115 maṇithūṇaṃ vimānaṃ , samantato dvādasa yojanāni ;

KūṭāgārāT0.131 sattasatā uḷārā , veḷuriyathambhā rucakatthatā subhā .

1147.

‘‘ Tatthacchasi pivasi khādasi ca , dibbā ca vīṇā pavadanti vagguṃ ;

Dibbā rasā kāmaguṇettha pañca , nāriyo ca naccanti suvaṇṇachannā .

1148.

‘‘ Kena tetādiso vaṇṇo … pe … vaṇṇo ca te sabbadisā pabhāsatī ’’ ti .

1150.

So devaputto attamano … pe … yassa kammassidaṃ phalaṃ .

1151.

‘‘ GimhānaṃM0.107 pacchime māse , patapante [ patāpante ( syā .), patāpente ( ka .)] divaṅkare ;

Paresaṃ bhatako poso , ambārāmamasiñcati .

1152.

‘‘ AthaV0.78 tenāgamā bhikkhu , sāriputtoti vissuto ;

Kilantarūpo kāyena , akilantova cetasā .

1153.

‘‘ TañcaP0.116 disvāna āyantaṃ , avocaṃ ambasiñcako ;

Sādhu taṃ [ sādhukaṃ ( ka .)] bhante nhāpeyyaṃ , yaṃ mamassa sukhāvahaṃ .

1154.

‘‘ Tassa me anukampāya , nikkhipi pattacīvaraṃ ;

Nisīdi rukkhamūlasmiṃ , chāyāya ekacīvaro .

1155.

‘‘ Tañca acchena vārinā , pasannamānaso naro ;

Nhāpayī rukkhamūlasmiṃ , chāyāya ekacīvaraṃ .

1156.

‘‘ AmboT0.132 ca sitto samaṇo ca nhāpito , mayā ca puññaṃ pasutaṃ anappakaṃ ;

Iti so pītiyā kāyaṃ , sabbaṃ pharati attano .

1157.

‘‘ Tadeva ettakaṃ kammaṃ , akāsiṃ tāya jātiyā ;

Pahāya mānusaṃ dehaṃ , upapannomhi nandanaṃ .

1158.

‘‘ Nandane ca vane ramme , nānādijagaṇāyute ;

Ramāmi naccagītehi , accharāhi purakkhato ’’ ti .

Ambavimānaṃ pañcamaṃ .

6. Gopālavimānavatthu

1159.

‘‘ Disvāna devaṃ paṭipucchi bhikkhu , ucce vimānamhi ciraṭṭhitike ;

Āmuttahatthābharaṇaṃ yasassiṃ [ āmuttahatthābharaṇo yasassī ( syā . pī . ka .)], dibbe vimānamhi yathāpi candimā .

1160.

‘‘ AlaṅkatoM0.108P0.117 malyadharo [ mālabhārī ( sī .), māladharī ( ka .)] suvattho , sukuṇḍalī kappitakesamassu ;

Āmuttahatthābharaṇo yasassī , dibbe vimānamhi yathāpi candimā .

1161.

‘‘ Dibbā ca vīṇā pavadanti vagguṃ , aṭṭhaṭṭhakā sikkhitā sādhurūpā ;

Dibbā ca kaññā tidasacarā uḷārā , naccanti gāyanti pamodayanti .

1162.

‘‘ Deviddhipattosi mahānubhāvo , manussabhūto kimakāsi puññaṃ ;

Kenāsi evaṃ jalitānubhāvo , vaṇṇo ca te sabbadisā pabhāsatī ’’ ti .

1163.

SoT0.133 devaputto attamano … pe … yassa kammassidaṃ phalaṃ .

1164.

‘‘ Ahaṃ manussesu manussabhūto , saṅgamma rakkhissaṃ paresaṃ dhenuyo ;

Tato ca āgā samaṇo mamantike gāvo ca māse agamaṃsu khādituṃ .

1165.

‘‘ DvayajjaV0.79 kiccaṃ ubhayañca kāriyaṃ , iccevahaṃ [ iccevaṃ ( ka .)] bhante tadā vicintayiṃ ;

Tato ca saññaṃ paṭiladdhayoniso , dadāmi bhanteti khipiṃ anantakaṃ .

1166.

‘‘ So māsakhettaṃ turito avāsariṃ , purā ayaṃ bhañjati yassidaṃ dhanaṃ ;

Tato ca kaṇho urago mahāviso , aḍaṃsi pāde turitassa me sato .

1167.

‘‘ SvāhaṃM0.109 aṭṭomhi dukkhena pīḷito , bhikkhu ca taṃ sāmaṃ muñcitvānantakaṃ [ muñcitva nantakaṃ ( sī .), muñcitvā anantakaṃ ( syā .)];

Ahāsi kummāsaṃ mamānukampayā [ mamānukampiyā ( pī . ka .), mamānukampāya ( syā .)], tato cuto kālakatomhi devatā .

1168.

‘‘ TadevaT0.134 kammaṃ kusalaṃ kataṃ mayā , sukhañca kammaṃ anubhomi attanā ;

Tayā hi bhante anukampito bhusaṃ , kataññutāya abhipādayāmi taṃ .

1169.

‘‘ Sadevake loke samārake ca , añño muni natthi tayānukampako ;

Tayā hi bhante anukampito bhusaṃ , kataññutāya abhivādayāmi taṃ .

1170.

‘‘ ImasmiṃP0.118 loke parasmiṃ vā pana , añño munī natthi tayānukampako ;

Tayā hi bhante anukampito bhusaṃ , kataññutāya abhivādayāmi tan ’’ ti .

Gopālavimānaṃ chaṭṭhaṃ .

7. Kaṇḍakavimānavatthu

1171.

‘‘ Puṇṇamāse yathā cando , nakkhattaparivārito ;

Samantā anupariyāti , tārakādhipatī sasī .

1172.

‘‘ Tathūpamaṃ idaṃ byamhaṃ , dibbaṃ devapuramhi ca ;

Atirocati vaṇṇena , udayantova raṃsimā .

1173.

‘‘ Veḷuriyasuvaṇṇassa , phalikā rūpiyassa ca ;

Masāragallamuttāhi , lohitaṅgamaṇīhi ca .

1174.

‘‘ Citrā manoramā bhūmi , veḷūriyassa santhatā ;

KūṭāgārāT0.135 subhā rammā , pāsādo te sumāpito .

1175.

‘‘ RammāM0.110P0.119 ca te pokkharaṇī , puthulomanisevitā ;

Acchodakā vippasannā , sovaṇṇavālukasanthatā .

1176.

‘‘ Nānāpadumasañchannā , puṇḍarīkasamotatā [ samotthatā ( ka .), samogatā ( syā .)];

Surabhiṃ sampavāyanti , manuññā māluteritā .

1177.

‘‘ TassāV0.80 te ubhato passe , vanagumbā sumāpitā ;

Upetā puppharukkhehi , phalarukkhehi cūbhayaṃ .

1178.

‘‘ Sovaṇṇapāde pallaṅke , muduke goṇakatthate [ colasanthate ( sī .)];

Nisinnaṃ devarājaṃva , upatiṭṭhanti accharā .

1179.

‘‘ Sabbābharaṇasañchannā , nānāmālāvibhūsitā ;

Ramenti taṃ mahiddhikaṃ , vasavattīva modasi .

1180.

‘‘ Bherisaṅkhamudiṅgāhi , vīṇāhi paṇavehi ca ;

Ramasi ratisampanno , naccagīte suvādite .

1181.

‘‘ Dibbā te vividhā rūpā , dibbā saddā atho rasā ;

Gandhā ca te adhippetā , phoṭṭhabbā ca manoramā .

1182.

‘‘ Tasmiṃ vimāne pavare , devaputta mahappabho ;

Atirocasi vaṇṇena , udayantova bhāṇumā .

1183.

‘‘ Dānassa te idaṃ phalaṃ , atho sīlassa vā pana ;

Atho añjalikammassa , taṃ me akkhāhi pucchito ’’.

1184.

SoT0.136 devaputto attamano … pe … yassa kammassidaṃ phalaṃ .

1185.

‘‘ Ahaṃ kapilavatthusmiṃ , sākiyānaṃ puruttame ;

Suddhodanassa puttassa , kaṇḍako sahajo ahaṃ .

1186.

‘‘ Yadā so aḍḍharattāyaṃ , bodhāya mabhinikkhami ;

So maṃ mudūhi pāṇīhi , jāli [ jāla ( sī .)] tambanakhehi ca .

1187.

‘‘ Satthiṃ ākoṭayitvāna , vaha sammāti cabravi ;

Ahaṃ lokaṃ tārayissaṃ , patto sambodhimuttamaṃ .

1188.

‘‘ TaṃM0.111 me giraṃ suṇantassa , hāso me vipulo ahu ;

Udaggacitto sumano , abhisīsiṃ [ abhisiṃsiṃ ( sī .), abhisīsi ( pī .)] tadā ahaṃ .

1189.

‘‘ Abhirūḷhañca maṃ ñatvā , sakyaputtaṃ mahāyasaṃ ;

Udaggacitto mudito , vahissaṃ purisuttamaṃ .

1190.

‘‘ Paresaṃ vijitaṃ gantvā , uggatasmiṃ divākare [ divaṅkare ( syā . ka .)];

Mamaṃ channañca ohāya , anapekkho so apakkami .

1191.

‘‘ TassaP0.120 tambanakhe pāde , jivhāya parilehisaṃ ;

Gacchantañca mahāvīraṃ , rudamāno udikkhisaṃ .

1192.

‘‘ AdassanenahaṃV0.81 tassa , sakyaputtassa sirīmato ;

Alatthaṃ garukābādhaṃ , khippaṃ me maraṇaṃ ahu .

1193.

‘‘ Tasseva ānubhāvena , vimānaṃ āvasāmidaṃ ;

SabbakāmaguṇopetaṃT0.137 , dibbaṃ devapuramhi ca .

1194.

‘‘ Yañca me ahuvā hāso , saddaṃ sutvāna bodhiyā ;

Teneva kusalamūlena , phusissaṃ āsavakkhayaṃ .

1195.

‘‘ Sace hi bhante gaccheyyāsi , satthu buddhassa santike ;

Mamāpi naṃ vacanena , sirasā vajjāsi vandanaṃ .

1196.

‘‘ Ahampi daṭṭhuṃ gacchissaṃ , jinaṃ appaṭipuggalaṃ ;

Dullabhaṃ dassanaṃ hoti , lokanāthāna tādinan ’’ ti .

1197.

So kataññū katavedī , satthāraṃ upasaṅkami ;

Sutvā giraṃ cakkhumato , dhammacakkhuṃ visodhayi .

1198.

Visodhetvā diṭṭhigataṃ , vicikicchaṃ vatāni ca ;

Vanditvā satthuno pāde , tatthevantaradhāyathāti [ tatthevantaradhāyatīti ( ka .)].

Kaṇḍakavimānaṃ sattamaṃ .

8. Anekavaṇṇavimānavatthu

1199.

‘‘ AnekavaṇṇaṃM0.112P0.121 darasokanāsanaṃ , vimānamāruyha anekacittaṃ ;

Parivārito accharāsaṅgaṇena , sunimmito bhūtapatīva modasi .

1200.

‘‘ Samassamo natthi kuto panuttaro [ uttari ( ka .)], yasena puññena ca iddhiyā ca ;

Sabbe ca devā tidasagaṇā samecca , taṃT0.138 taṃ namassanti sasiṃva devā ;

Imā ca te accharāyo samantato , naccanti gāyanti pamodayanti .

1201.

‘‘ DeviddhipattosiP0.122 mahānubhāvo , manussabhūto kimakāsi puññaṃ ;

Kenāsi evaṃ jalitānubhāvo , vaṇṇo ca te sabbadisā pabhāsatī ’’ ti .

1202.

So devaputto attamano … pe … yassa kammassidaṃ phalaṃ .

1203.

‘‘ Ahaṃ bhadante ahuvāsi pubbe , sumedhanāmassa jinassa sāvako ;

Puthujjano ananubodhohamasmi [ anavabodhohamasmiṃ ( sī .), ananubodhohamāsiṃ (?)], so satta vassāni paribbajissahaṃ [ pabbajissahaṃ ( syā . ka .), pabbajisāhaṃ ( pī .)].

1204.

‘‘ SohaṃV0.82 sumedhassa jinassa satthuno , parinibbutassoghatiṇṇassa tādino ;

Ratanuccayaṃ hemajālena channaṃ , vanditvā thūpasmiṃ manaṃ pasādayiṃ .

1205.

‘‘ NaM0.113 māsi dānaṃ na ca matthi dātuṃ , pare ca kho tattha samādapesiṃ ;

Pūjetha naṃ pūjanīyassa [ pūjaneyyassa ( syā . ka .)] dhātuṃ , evaṃT0.139 kira saggamito gamissatha .

1206.

‘‘ Tadeva kammaṃ kusalaṃ kataṃ mayā , sukhañca dibbaṃ anubhomi attanā ;

Modāmahaṃ tidasagaṇassa majjhe , na tassa puññassa khayampi ajjhagan ’’ ti .

Anekavaṇṇavimānaṃ aṭṭhamaṃ .

9. Maṭṭhakuṇḍalīvimānavatthu

1207.

[ pe . va .186]‘‘ AlaṅkatoP0.123 maṭṭhakuṇḍalī [ maṭṭakuṇḍalī ( sī .)], māladhārī haricandanussado ;

Bāhā paggayha kandasi , vanamajjhe kiṃ dukkhito tuvan ’’ ti .

1208.

‘‘ Sovaṇṇamayo pabhassaro , uppanno rathapañjaro mama ;

Tassa cakkayugaṃ na vindāmi , tena dukkhena jahāmi [ jahissaṃ ( sī .), jahissāmi ( syā . pī .)] jīvitan ’’ ti .

1209.

‘‘ Sovaṇṇamayaṃ maṇimayaṃ , lohitakamayaṃ [ lohitaṅgamayaṃ ( syā .), lohitaṅkamayaṃ ( sī .), lohamayaṃ ( katthaci )] atha rūpiyamayaṃ ;

Ācikkha [ ācikkhatha ( ka .)] me bhaddamāṇava , cakkayugaṃ paṭipādayāmi te ’’ ti .

1210.

SoT0.140 māṇavo tassa pāvadi ,‘‘ candimasūriyā ubhayettha dissare ;

Sovaṇṇamayo ratho mama , tena cakkayugena sobhatī ’’ ti .

1211.

‘‘ BāloM0.114 kho tvaṃ asi māṇava , yo tvaṃ patthayase apatthiyaṃ ;

Maññāmi tuvaṃ marissasi , na hi tvaṃ lacchasi candimasūriye ’’ ti .

1212.

‘‘ Gamanāgamanampi dissati , vaṇṇadhātu ubhayattha vīthiyā ;

Peto [ peto pana ( sī . syā .)] kālakato na dissati , ko nidha kandataṃ bālyataro ’’ ti .

1213.

‘‘ Saccaṃ kho vadesi māṇava , ahameva kandataṃ bālyataro ;

Candaṃ viya dārako rudaṃ , petaṃ kālakatābhipatthayin ’’ ti .

1214.

‘‘ Ādittaṃ vata maṃ santaṃ , ghatasittaṃva pāvakaṃ ;

Vārinā viya osiñcaṃ , sabbaṃ nibbāpaye daraṃ .

1215.

‘‘ AbbahīT0.141 [ abbūḷha ( pī .), abbūḷhaṃ ( syā . ka .)] vata me sallaṃ , sokaṃ hadayanissitaṃ ;

Yo me sokaparetassa , puttasokaṃ apānudi .

1216.

‘‘ SvāhaṃV0.83P0.124 abbūḷhasallosmi , sītibhūtosmi nibbuto ;

Na socāmi na rodāmi , vata sutvāna māṇavāti .

1217.

‘‘ Devatā nusi gandhabbo , adu [ ādu ( sī . syā .)] sakko purindado ;

Ko vā tvaṃ kassa vā putto , kathaṃ jānemu taṃ mayan ’’ ti .

1218.

‘‘ Yañca [ yaṃ ( ka .)] kandasi yañca rodasi , puttaṃ āḷāhane sayaṃ dahitvā ;

Svāhaṃ kusalaṃ karitvā kammaṃ , tidasānaṃ sahabyataṃ gato ’’ ti [ pattoti ( sī . syā . pī .)].

1219.

‘‘ AppaṃM0.115 vā bahuṃ vā nāddasāma , dānaṃ dadantassa sake agāre ;

Uposathakammaṃ vā [ uposathakammañca ( ka .)] tādisaṃ , kena kammena gatosi devalokan ’’ ti .

1220.

‘‘ Ābādhikohaṃ dukkhito gilāno , āturarūpomhi sake nivesane ;

Buddhaṃ vigatarajaṃ vitiṇṇakaṅkhaṃ , addakkhiṃ sugataṃ anomapaññaṃ .

1221.

‘‘ Svāhaṃ muditamano pasannacitto , añjaliṃT0.142 akariṃ tathāgatassa ;

Tāhaṃ kusalaṃ karitvāna kammaṃ , tidasānaṃ sahabyataṃ gato ’’ ti .

1222.

‘‘ Acchariyaṃ vata abbhutaṃ vata , añjalikammassa ayamīdiso vipāko ;

Ahampi muditamano pasannacitto , ajjeva buddhaṃ saraṇaṃ vajāmī ’’ ti .

1223.

‘‘ Ajjeva buddhaṃ saraṇaṃ vajāhi , dhammañca saṅghañca pasannacitto ;

Tatheva sikkhāya padāni pañca , akhaṇḍaphullāni samādiyassu .

1224.

‘‘ Pāṇātipātā viramassu khippaṃ , loke adinnaṃ parivajjayassu ;

Amajjapo mā ca musā bhaṇāhi , sakena dārena ca hohi tuṭṭho ’’ ti .

1225.

‘‘ Atthakāmosi me yakkha , hitakāmosi devate ;

Karomi tuyhaṃ vacanaṃ , tvaṃsi ācariyo mamāti .

1226.

‘‘ Upemi saraṇaṃ buddhaṃ , dhammañcāpi anuttaraṃ ;

Saṅghañca naradevassa , gacchāmi saraṇaṃ ahaṃ .

1227.

‘‘ PāṇātipātāM0.116P0.125 viramāmi khippaṃ , lokeT0.143 adinnaṃ parivajjayāmi ;

Amajjapo no ca musā bhaṇāmi , sakena dārena ca homi tuṭṭho ’’ ti .

Maṭṭhakuṇḍalīvimānaṃ navamaṃ .

10. Serīsakavimānavatthu

1228.

[ pe . va .604] SuṇothaV0.84P0.126 yakkhassa ca vāṇijāna ca , samāgamo yattha tadā ahosi ;

Yathā kathaṃ itaritarena cāpi , subhāsitaṃ tañca suṇātha sabbe .

1229.

‘‘ Yo so ahu rājā pāyāsi nāma [ nāmo ( sī .)], bhummānaṃ sahabyagato yasassī ;

So modamānova sake vimāne , amānuso mānuse ajjhabhāsīti .

1230.

‘‘ Vaṅke araññe amanussaṭṭhāne , kantāre appodake appabhakkhe ;

Suduggame vaṇṇupathassa majjhe , vaṅkaṃ bhayā [ dhaṅkaṃbhayā ( ka .)] naṭṭhamanā manussā .

1231.

‘‘ Nayidha phalā mūlamayā ca santi , upādānaṃ natthi kutodha bhakkho ;

Aññatra paṃsūhi ca vālukāhi ca , tatāhiT0.144 uṇhāhi ca dāruṇāhi ca .

1232.

‘‘ Ujjaṅgalaṃ tattamivaṃ kapālaṃ , anāyasaṃ paralokena tulyaṃ ;

Luddānamāvāsamidaṃ purāṇaṃ , bhūmippadeso abhisattarūpo .

1233.

‘‘ AthaM0.117 tumhe kena [ kena nu ( syā . ka .)] vaṇṇena , kimāsamānā imaṃ padesaṃ hi ;

Anupaviṭṭhā sahasā samecca , lobhā bhayā atha vā sampamūḷhā ’’ ti .

1234.

‘‘ Magadhesu aṅgesu ca satthavāhā , āropayitvā paṇiyaṃ puthuttaṃ ;

Te yāmase sindhusovīrabhūmiṃ , dhanatthikā uddayaṃ patthayānā .

1235.

‘‘ DivāP0.127 pipāsaṃ nadhivāsayantā , yoggānukampañca samekkhamānā ,

Etena vegena āyāma sabbe [ sabbe te ( ka .)], rattiṃ maggaṃ paṭipannā vikāle .

1236.

‘‘ Te duppayātā aparaddhamaggā , andhākulā vippanaṭṭhā araññe ;

SuduggameT0.145 vaṇṇupathassa majjhe , disaṃ na jānāma pamūḷhacittā .

1237.

‘‘ Idañca disvāna adiṭṭhapubbaṃ , vimānaseṭṭhañca tavañca yakkha ;

Tatuttariṃ jīvitamāsamānā , disvā patītā sumanā udaggā ’’ ti .

1238.

‘‘ Pāraṃ samuddassa imañca vaṇṇuṃ [ vanaṃ ( syā .), vaṇṇaṃ ( ka .)], vettācaraṃ [ vettaṃ paraṃ ( syā .), vettācāraṃ ( ka .)] saṅkupathañca maggaṃ ;

Nadiyo pana pabbatānañca duggā , puthuddisā gacchatha bhogahetu .

1239.

‘‘ Pakkhandiyāna vijitaṃ paresaṃ , verajjake mānuse pekkhamānā ;

Yaṃ vo sutaṃ vā atha vāpi diṭṭhaṃ , accherakaṃ taṃ vo suṇoma tātā ’’ ti .

1240.

‘‘ ItopiM0.118 accherataraṃ kumāra , na to sutaṃ vā atha vāpi diṭṭhaṃ ;

Atītamānussakameva sabbaṃ , disvāna tappāma anomavaṇṇaṃ .

1241.

‘‘ Vehāyasaṃ pokkharañño savanti , pahūtamalyāT0.146 [ pahūtamālyā ( syā .)] bahupuṇḍarīkā ;

Dumā cime [ dumā ca te ( syā . ka .)] niccaphalūpapannā , atīva gandhā surabhiṃ pavāyanti .

1242.

‘‘ VeḷūriyathambhāV0.85 satamussitāse , silāpavāḷassa ca āyataṃsā ;

Masāragallā sahalohitaṅgā , thambhā ime jotirasāmayāse .

1243.

‘‘ Sahassathambhaṃ atulānubhāvaṃ , tesūpari sādhumidaṃ vimānaṃ ;

Ratanantaraṃ kañcanavedimissaṃ , tapanīyapaṭṭehi ca sādhuchannaṃ .

1244.

‘‘ Jambonaduttattamidaṃ sumaṭṭho , pāsādasopāṇaphalūpapanno ;

Daḷho ca vaggu ca susaṅgato ca [ vaggu sumukho susaṅgato ( sī .)], atīva nijjhānakhamo manuñño .

1245.

‘‘ RatanantarasmiṃP0.128 bahuannapānaṃ , parivārito accharāsaṅgaṇena ;

Murajaālambaratūriyaghuṭṭho , abhivanditosi thutivandanāya .

1246.

‘‘ SoT0.147 modasi nārigaṇappabodhano , vimānapāsādavare manorame ;

Acintiyo sabbaguṇūpapanno , rājā yathā vessavaṇo naḷinyā [ naḷiññaṃ ( ka .)].

1247.

‘‘ DevoM0.119 nu āsi udavāsi yakkho , udāhu devindo manussabhūto ;

Pucchanti taṃ vāṇijā satthavāhā , ācikkha ko nāma tuvaṃsi yakkho ’’ ti .

1248.

‘‘ Serīsako [ serissako ( sī . syā .)] nāma ahamhi yakkho , kantāriyo vaṇṇupathamhi gutto ;

Imaṃ padesaṃ abhipālayāmi , vacanakaro vessavaṇassa rañño ’’ ti .

1249.

‘‘ Adhiccaladdhaṃ pariṇāmajaṃ te , sayaṃ kataṃ udāhu devehi dinnaṃ ;

Pucchanti taṃ vāṇijā satthavāhā , kathaṃ tayā laddhamidaṃ manuññan ’’ ti .

1250.

‘‘ Nādhiccaladdhaṃ na pariṇāmajaṃ me , na sayaṃ kataṃ na hi devehi dinnaṃ ;

Sakehi kammehi apāpakehi , puññehiT0.148 me laddhamidaṃ manuññan ’’ ti .

1251.

‘‘ Kiṃ te vataṃ kiṃ pana brahmacariyaṃ , kissa suciṇṇassa ayaṃ vipāko ;

Pucchanti taṃ vāṇijā satthavāhā , kathaṃ tayā laddhamidaṃ vimānan ’’ ti .

1252.

‘‘ Mamaṃ pāyāsīti ahu samaññā , rajjaṃ yadā kārayiṃ kosalānaṃ ;

Natthikadiṭṭhi kadariyo pāpadhammo , ucchedavādī ca tadā ahosiṃ .

1253.

‘‘ Samaṇo ca kho āsi kumārakassapo , bahussuto cittakathī uḷāro ;

So me tadā dhammakathaṃ abhāsi [ akāsi ( sī .)], diṭṭhivisūkāni vinodayī me .

1254.

‘‘ TāhaṃM0.120 tassa [ tāhaṃ ( ka .)] dhammakathaṃ suṇitvā , upāsakattaṃ paṭivedayissaṃ ;

Pāṇātipātā virato ahosiṃ , loke adinnaṃ parivajjayissaṃ ;

AmajjapoP0.129 no ca musā abhāṇiṃ , sakena dārena ca ahosi tuṭṭho .

1255.

‘‘ TaṃT0.149 me vataṃ taṃ pana brahmacariyaṃ , tassa suciṇṇassa ayaṃ vipāko ;

Teheva kammehi apāpakehi , puññehi me laddhamidaṃ vimānan ’’ ti .

1256.

‘‘ SaccaṃV0.86 kirāhaṃsu narā sapaññā , anaññathā vacanaṃ paṇḍitānaṃ ;

Yahiṃ yahiṃ gacchati puññakammo , tahiṃ tahiṃ modati kāmakāmī .

1257.

‘‘ Yahiṃ yahiṃ sokapariddavo ca , vadho ca bandho ca parikkileso ;

Tahiṃ tahiṃ gacchati pāpakammo , na muccati duggatiyā kadācī ’’ ti .

1258.

‘‘ Sammūḷharūpova jano ahosi , asmiṃ muhutte kalalīkatova ;

Janassimassa tuyhañca kumāra , appaccayo kena nu kho ahosī ’’ ti .

1259.

‘‘ Ime ca sirīsavanā [ ime sirīsūpavanā ca ( sī .), imepi sirīsavanā ca ( pī . ka .)] tātā , dibbā [ dibbā ca ( pī . ka .)] gandhā surabhī [ surabhiṃ ( sī . ka .)] sampavanti [ sampavāyanti ( ka .)];

Te sampavāyanti imaṃ vimānaṃ , divāT0.150 ca ratto ca tamaṃ nihantvā .

1260.

‘‘ ImesañcaM0.121 kho vassasataccayena , sipāṭikā phalati ekamekā ;

Mānussakaṃ vassasataṃ atītaṃ , yadagge kāyamhi idhūpapanno .

1261.

‘‘ Disvānahaṃ vassasatāni pañca , asmiṃ vimāne ṭhatvāna tātā ;

Āyukkhayā puññakkhayā cavissaṃ , teneva sokena pamucchitosmī ’’ ti [ samucchitosmīti ( pī . ka .)].

1262.

‘‘ Kathaṃ nu soceyya tathāvidho so , laddhā vimānaṃ atulaṃ cirāya ;

Ye cāpi kho ittaramupapannā , te nūna soceyyuṃ parittapuññā ’’ ti .

1263.

‘‘ Anucchaviṃ ovadiyañca me taṃ , yaṃ maṃ tumhe peyyavācaṃ vadetha ;

Tumhe ca kho tātā mayānuguttā , yenicchakaṃ tena paletha sotthin ’’ ti .

1264.

‘‘ GantvāP0.130 mayaṃ sindhusovīrabhūmiṃ , dhanatthikā uddayaṃ patthayānā ;

Yathāpayogā paripuṇṇacāgā , kāhāmaT0.151 serīsamahaṃ uḷāran ’’ ti .

1265.

‘‘ Mā ceva serīsamahaṃ akattha , sabbañca vo bhavissati yaṃ vadetha ;

Pāpāni kammāni vivajjayātha , dhammānuyogañca adhiṭṭhahātha .

1266.

‘‘ Upāsako atthi imamhi saṅghe , bahussuto sīlavatūpapanno ;

Saddho ca cāgī ca supesalo ca , vicakkhaṇo santusito mutīmā .

1267.

‘‘ SañjānamānoM0.122 na musā bhaṇeyya , parūpaghātāya na cetayeyya ;

Vebhūtikaṃ pesuṇaṃ no kareyya , saṇhañca vācaṃ sakhilaṃ bhaṇeyya .

1268.

‘‘ Sagāravo sappaṭisso vinīto , apāpako adhisīle visuddho ;

So mātaraṃ pitarañcāpi jantu , dhammena poseti ariyavutti .

1269.

‘‘ Maññe so mātāpitūnaṃ kāraṇā , bhogāni pariyesati na attahetu ;

Mātāpitūnañca yo [ so (?)] accayena , nekkhammapoṇoT0.152 carissati brahmacariyaṃ .

1270.

‘‘ Ujū avaṅko asaṭho amāyo , na lesakappena ca vohareyya ;

So tādiso sukatakammakārī , dhamme ṭhito kinti labhetha dukkhaṃ .

1271.

‘‘ TaṃV0.87 kāraṇā pātukatomhi attanā , tasmā dhammaṃ passatha vāṇijāse ;

Aññatra teniha bhasmī [ bhasmi ( syā .), bhasma ( ka .)] bhavetha , andhākulā vippanaṭṭhā araññe ;

Taṃ khippamānena lahuṃ parena , sukho have sappurisena saṅgamo ’’ ti .

1272.

‘‘ Kiṃ nāma so kiñca karoti kammaṃ ,

Kiṃ nāmadheyyaṃ kiṃ pana tassa gottaṃ ;

Mayampi naṃ daṭṭhukāmamha yakkha , yassānukampāya idhāgatosi ;

Lābhā hi tassa , yassa tuvaṃ pihesī ’’ ti .

1273.

‘‘ YoM0.123P0.131 kappako sambhavanāmadheyyo ,

Upāsako kocchaphalūpajīvī ;

Jānātha naṃ tumhākaṃ pesiyo so ,

MāT0.153 kho naṃ hīḷittha supesalo so ’’ ti .

1274.

‘‘ Jānāmase yaṃ tvaṃ pavadesi [ vadesi ( sī .)] yakkha ,

Na kho naṃ jānāma sa edisoti ;

Mayampi naṃ pūjayissāma yakkha ,

Sutvāna tuyhaṃ vacanaṃ uḷāran ’’ ti .

1275.

‘‘ Ye keci imasmiṃ satthe manussā ,

Daharā mahantā athavāpi majjhimā ;

Sabbeva te ālambantu vimānaṃ ,

Passantu puññānaṃ phalaṃ kadariyā ’’ ti .

1276.

Te tattha sabbeva ‘ ahaṃ pure ’ ti ,

Taṃ kappakaṃ tattha purakkhatvā [ purakkhipitvā ( sī .)];

Sabbeva te ālambiṃsu vimānaṃ ,

Masakkasāraṃ viya vāsavassa .

1277.

TeT0.154 tattha sabbeva ‘ ahaṃ pure ’ ti , upāsakattaṃ paṭivedayiṃsu ;

Pāṇātipātā viratā ahesuṃ , loke adinnaṃ parivajjayiṃsu ;

Amajjapā no ca musā bhaṇiṃsu , sakena dārena ca ahesuṃ tuṭṭhā .

1278.

Te tattha sabbeva ‘ ahaṃ pure ’ ti , upāsakattaṃ paṭivedayitvā ;

Pakkāmi sattho anumodamāno , yakkhiddhiyā anumato punappunaṃ .

1279.

‘‘ GantvānaM0.124 te sindhusovīrabhūmiṃ , dhanatthikā uddayaṃ [ udaya ( pī . ka .)] patthayānā ;

Yathāpayogā paripuṇṇalābhā , paccāgamuṃ pāṭaliputtamakkhataṃ .

1280.

‘‘ GantvānaV0.88 te saṅgharaṃ sotthivanto ,

Puttehi dārehi samaṅgibhūtā ;

Ānandī vittā [ ānandacittā ( syā .), ānandīcittā ( ka .)] sumanā patītā ,

Akaṃsu serīsamahaṃ uḷāraṃ ;

Serīsakaṃ te pariveṇaṃ māpayiṃsu .

1281.

Etādisā sappurisāna sevanā ,

Mahatthikā dhammaguṇāna sevanā ;

Ekassa atthāya upāsakassa ,

Sabbeva sattā sukhitā [ sukhino ( pī . ka .)] ahesunti .

Serīsakavimānaṃ dasamaṃ .

11. Sunikkhittavimānavatthu

1282.

‘‘ UccamidaṃP0.134 maṇithūṇaṃ vimānaṃ , samantato dvādasa yojanāni ;

KūṭāgārāT0.155 sattasatā uḷārā , veḷuriyathambhā rucakatthatā subhā .

1283.

‘‘ Tatthacchasi pivasi khādasi ca , dibbā ca vīṇā pavadanti vagguṃ ;

Dibbā rasā kāmaguṇettha pañca , nāriyo ca naccanti suvaṇṇachannā .

1284.

‘‘ Kena tetādiso vaṇṇo , kena te idha mijjhati ;

Uppajjanti ca te bhogā , ye keci manaso piyā .

1285.

‘‘ PucchāmiM0.125 ‘ taṃ deva mahānubhāva , manussabhūto kimakāsi puññaṃ ;

Kenāsi evaṃ jalitānubhāvo , vaṇṇo ca te sabbadisā pabhāsatī ’’ ti .

1286.

SoP0.135 devaputto attamano , moggallānena pucchito ;

Pañhaṃ puṭṭho viyākāsi , yassa kammassidaṃ phalaṃ .

1287.

‘‘ Dunnikkhittaṃ mālaṃ sunikkhipitvā , patiṭṭhapetvā sugatassa thūpe ;

Mahiddhiko camhi mahānubhāvo , dibbehi kāmehi samaṅgibhūto .

1288.

‘‘ Tena metādiso vaṇṇo ,

Tena me idha mijjhati ;

Uppajjanti ca me bhogā ,

Ye keci manaso piyā .

1289.

‘‘ Akkhāmi te bhikkhu mahānubhāva ,

Manussabhūto yamahaṃ akāsiṃ ;

TenamhiT0.156 evaṃ jalitānubhāvo ,

Vaṇṇo ca me sabbadisā pabhāsatī ’’ ti .

Sunikkhittavimānaṃ ekādasamaṃ .

Sunikkhittavaggo sattamo niṭṭhito .

TassuddānaṃV0.89 –

Dve daliddā vanavihārā , bhatako gopālakaṇḍakā ;

Anekavaṇṇamaṭṭhakuṇḍalī , serīsako sunikkhittaṃ ;

Purisānaṃ tatiyo vaggo pavuccatīti .

Bhāṇavāraṃ catutthaṃ niṭṭhitaṃ .

Vimānavatthupāḷi niṭṭhitā .

Issues

ဗားရှင်းရွေးချယ်ပါ

Vimānavatthupāḷi

Vimānavatthupāḷi