2. Sāṇavāsītherapetavatthu
408.
Kuṇḍināgariyo
P0.49 thero , sāṇavāsi [ sānuvāsi ( sī .), sānavāsi ( syā .)] nivāsiko ;Poṭṭhapādoti nāmena , samaṇo bhāvitindriyo .
409.
Tassa
M0.169 mātā pitā bhātā , duggatā yamalokikā ;Pāpakammaṃ
T0.208 karitvāna , petalokaṃ ito gatā . 410.
Te
V0.127 duggatā sūcikaṭṭā , kilantā naggino kisā ;Uttasantā [ ottappantā ( syā . ka .)] mahattāsā [ mahātāsā ( sī .)], na dassenti kurūrino [ kuruddino ( ka .)].
411.
Tassa bhātā vitaritvā , naggo ekapathekako ;
Catukuṇḍiko bhavitvāna , therassa dassayītumaṃ .
412.
Thero cāmanasikatvā , tuṇhībhūto atikkami ;
So ca viññāpayī theraṃ ,‘ bhātā petagato ahaṃ ’.
413.
‘‘ Mātā
P0.50 pitā ca te bhante , duggatā yamalokikā ;Pāpakammaṃ karitvāna , petalokaṃ ito gatā .
414.
‘‘ Te duggatā sūcikaṭṭā , kilantā naggino kisā ;
Uttasantā mahattāsā , na dassenti kurūrino .
415.
‘‘ Anukampassu kāruṇiko , datvā anvādisāhi no ;
Tava dinnena dānena , yāpessanti kurūrino ’’ ti .
416.
Thero caritvā piṇḍāya , bhikkhū aññe ca dvādasa ;
Ekajjhaṃ sannipatiṃsu , bhattavissaggakāraṇā .
417.
Thero sabbeva te āha ,‘‘ yathāladdhaṃ dadātha me ;
Saṅghabhattaṃ karissāmi , anukampāya ñātinaṃ ’’.
418.
Niyyādayiṃsu therassa , thero saṅghaṃ nimantayi ;
Datvā anvādisi thero , mātu pitu ca bhātuno ;
‘‘ Idaṃ me ñātīnaṃ hotu , sukhitā hontu ñātayo ’’.
419.
Samanantarānuddiṭṭhe , bhojanaṃ udapajjatha ;
Suciṃ paṇītaṃ sampannaṃ , anekarasabyañjanaṃ .
420.
Tato uddassayī [ uddisayī ( sī . ka .), uddissati ( syā . ka .)] bhātā , vaṇṇavā balavā sukhī ;
‘‘ Pahūtaṃ bhojanaṃ bhante , passa naggāmhase mayaṃ ;
Tathā bhante parakkama , yathā vatthaṃ labhāmase ’’ ti .
421.
Thero
M0.170 saṅkārakūṭamhā , uccinitvāna nantake ;Pilotikaṃ
T0.209 paṭaṃ katvā , saṅghe cātuddise adā . 422.
Datvā anvādisī thero , mātu pitu ca bhātuno ;
‘‘ Idaṃ me ñātīnaṃ hotu , sukhitā hontu ñātayo ’’.
423.
Samanantarānuddiṭṭhe , vatthāni udapajjisuṃ ;
Tato suvatthavasano , therassa dassayītumaṃ .
424.
‘‘ Yāvatā
V0.128 nandarājassa , vijitasmiṃ paṭicchadā ;Tato bahutarā bhante , vatthānacchādanāni no .
425.
‘‘ Koseyyakambalīyāni , khoma kappāsikāni ca ;
Vipulā ca mahagghā ca , tepākāsevalambare .
426.
‘‘ Te mayaṃ paridahāma , yaṃ yaṃ hi manaso piyaṃ ;
Tathā bhante parakkama , yathā gehaṃ labhāmase ’’ ti .
427.
Thero paṇṇakuṭiṃ katvā , saṅghe cātuddise adā ;
Datvā anvādisī thero , mātu pitu ca bhātuno ;
‘‘ Idaṃ me ñātīnaṃ hotu , sukhitā hontu ñātayo ’’.
428.
Samanantarānuddiṭṭhe
P0.51 , gharāni udapajjisuṃ ;Kūṭāgāranivesanā , vibhattā bhāgaso mitā .
429.
‘‘ Na manussesu īdisā , yādisā no gharā idha ;
Api dibbesu yādisā , tādisā no gharā idha .
430.
‘‘ Daddallamānā
T0.210 ābhenti [ ābhanti ( ka .)], samantā caturo disā ;‘ Tathā bhante parakkama , yathā pānīyaṃ labhāmase ’’ ti .
431.
Thero karaṇaṃ [ karakaṃ ( sī . syā . pī .)] pūretvā , saṅghe cātuddise adā ;
Datvā anvādisī thero , mātu pitu ca bhātuno ;
‘‘ Idaṃ me ñātīnaṃ hotu , sukhitā hontu ñātayo ’.
432.
Samanantarānuddiṭṭhe , pānīyaṃ udapajjatha ;
Gambhīrā caturassā ca , pokkharañño sunimmitā .
433.
Sītodikā
M0.171 suppatitthā , sītā appaṭigandhiyā ;Padumuppalasañchannā , vārikiñjakkhapūritā .
434.
Tattha nhatvā pivitvā ca , therassa paṭidassayuṃ ;
‘‘ Pahūtaṃ pānīyaṃ bhante , pādā dukkhā phalanti no ’’.
435.
‘‘ Āhiṇḍamānā khañjāma , sakkhare kusakaṇṭake ;
‘ Tathā bhante parakkama , yathā yānaṃ labhāmase ’’’ ti .
436.
Thero sipāṭikaṃ laddhā , saṅghe cātuddise adā ;
Datvā anvādisī thero , mātu pitu ca bhātuno ;
‘‘ Idaṃ me ñātīnaṃ hotu , sukhitā hontu ñātayo ’’.
437.
Samanantarānuddiṭṭhe
V0.129 , petā rathena māgamuṃ ;‘‘ Anukampitamha bhadante , bhattenacchādanena ca .
438.
‘‘ Gharena pānīyadānena , yānadānena cūbhayaṃ ;
Muniṃ kāruṇikaṃ loke , bhante vanditumāgatā ’’ ti .
Sāṇavāsītherapetavatthu dutiyaṃ .