7. Rājaputtapetavatthu
753.
Pubbe
P0.88 katānaṃ kammānaṃ , vipāko mathaye manaṃ ;Rūpe sadde rase gandhe , phoṭṭhabbe ca manorame .
754.
Naccaṃ gītaṃ ratiṃ khiḍḍaṃ , anubhutvā anappakaṃ ;
Uyyāne paricaritvā , pavisanto giribbajaṃ .
755.
Isiṃ sunetta [ sunita ( ka .)] maddakkhi , attadantaṃ samāhitaṃ ;
Appicchaṃ hirisampannaṃ , uñche pattagate rataṃ .
756.
Hatthikkhandhato oruyha , laddhā bhanteti cābravi ;
Tassa pattaṃ gahetvāna , uccaṃ paggayha khattiyo .
757.
Thaṇḍile
V0.155 pattaṃ bhinditvā , hasamāno apakkami ;‘‘ Rañño kitavassāhaṃ putto , kiṃ maṃ bhikkhu karissasi ’’.
758.
Tassa
M0.212 kammassa pharusassa , vipāko kaṭuko ahu ;Yaṃ rājaputto vedesi , nirayamhi samappito .
759.
Chaḷeva caturāsīti , vassāni navutāni ca ;
Bhusaṃ dukkhaṃ nigacchittho , niraye katakibbiso .
760.
Uttānopi ca paccittha , nikujjo vāmadakkhiṇo ;
Uddhaṃpādo ṭhito ceva , ciraṃ bālo apaccatha .
761.
Bahūni
T0.252 vassasahassāni , pūgāni nahutāni ca ;Bhusaṃ dukkhaṃ nigacchittho , niraye katakibbiso .
762.
Etādisaṃ kho kaṭukaṃ , appaduṭṭhappadosinaṃ ;
Paccanti pāpakammantā , isimāsajja subbataṃ .
763.
So tattha bahuvassāni , vedayitvā bahuṃ dukhaṃ ;
Khuppipāsahato nāma [ khuppipāsāhato nāma ( sī . pī )], peto āsi tato cuto .
764.
Etamādīnavaṃ ñatvā [ disvā ( sī .)], issaramadasambhavaṃ ;
Pahāya issaramadaṃ , nivātamanuvattaye .
765.
Diṭṭheva dhamme pāsaṃso , yo buddhesu sagāravo ;
Kāyassa bhedā sappañño , saggaṃ so upapajjatīti .
Rājaputtapetavatthu sattamaṃ .