9. Gūthakhādakapetivatthu

Author： _System_Pali_VRI_ @ Administrator

774.

‘‘ GūthakūpatoP0.90 uggantvā , kā nu dīnā patiṭṭhasi ;

Nissaṃsayaṃ pāpakammantā , kiṃ nu saddahase tuvan ’’ ti .

775.

‘‘ Ahaṃ bhadante petīmhi , duggatā yamalokikā ;

Pāpakammaṃ karitvāna , petalokaṃ ito gatā ’’ ti .

776.

‘‘ Kiṃ nu kāyena vācāya , manasā dukkaṭaṃ kataṃ ;

Kissa kammavipākena , idaṃ dukkhaṃ nigacchasī ’’ ti .

777.

‘‘ Ahu āvāsiko mayhaṃ , issukī kulamaccharī ;

Ajjhosito mayhaṃ ghare , kadariyo paribhāsako .

778.

‘‘ Tassāhaṃ vacanaṃ sutvā , bhikkhavo paribhāsisaṃ ;

Tassa kammavipākena , petalokaṃ ito gatā ’’ ti .

779.

‘‘ AmittoT0.254 mittavaṇṇena , yo te āsi kulūpako ;

Kāyassa bhedā duppañño , kiṃ nu pecca gatiṃ gato ’’ ti .

780.

‘‘ Tassevāhaṃ pāpakammassa , sīse tiṭṭhāmi matthake ;

So ca paravisayaṃ patto , mameva paricārako .

781.

‘‘ YaṃV0.157 bhadante hadantaññe , etaṃ me hoti bhojanaṃ ;

Ahañca kho yaṃ hadāmi , etaṃ so upajīvatī ’’ ti .

Gūthakhādakapetivatthu navamaṃ .