3. Rathakārapetivatthu

Author： _System_Pali_VRI_ @ Administrator

439.

‘‘ VeḷuriyathambhaṃT0.211P0.53 ruciraṃ pabhassaraṃ , vimānamāruyha anekacittaṃ ;

Tatthacchasi devi mahānubhāve , pathaddhani [ samantato ( ka .)] pannaraseva cando .

440.

‘‘ Vaṇṇo ca te kanakassa sannibho , uttattarūpo bhusa dassaneyyo ;

Pallaṅkaseṭṭhe atule nisinnā , ekā tuvaṃ natthi ca tuyha sāmiko .

441.

‘‘ Imā ca te pokkharaṇī samantā , pahūtamalyā [ pahūtamālā ( sī . syā .)] bahupuṇḍarīkā ;

Suvaṇṇacuṇṇehi samantamotthatā , na tattha paṅko paṇako ca vijjati .

442.

‘‘ HaṃsāM0.172 cime dassanīyā manoramā , udakasmimanupariyanti sabbadā ;

Samayya vaggūpanadanti sabbe , bindussarā dundubhīnaṃva ghoso .

443.

‘‘ Daddallamānā yasasā yasassinī , nāvāya ca tvaṃ avalamba tiṭṭhasi ;

ĀḷārapamheT0.212 hasite piyaṃvade , sabbaṅgakalyāṇi bhusaṃ virocasi .

444.

‘‘ IdaṃP0.54 vimānaṃ virajaṃ same ṭhitaṃ , uyyānavantaṃ [ uyyānavanaṃ ( ka .)] ratinandivaḍḍhanaṃ ;

Icchāmahaṃ nāri anomadassane , tayā saha nandane idha moditun ’’ ti .

445.

‘‘ Karohi kammaṃ idha vedanīyaṃ , cittañca te idha nihitaṃ bhavatu [ natañca hotu ( ka .), nitañca hotu ( syā .)];

Katvāna kammaṃ idha vedanīyaṃ , evaṃ mamaṃ lacchasi kāmakāminin ’’ ti .

446.

‘‘ Sādhū ’’ ti so tassā paṭissuṇitvā , akāsi kammaṃ tahiṃ vedanīyaṃ ;

Katvāna kammaṃ tahiṃ vedanīyaṃ , upapajji so māṇavo tassā sahabyatanti .

Rathakārapetivatthu tatiyaṃ .

Bhāṇavāraṃ dutiyaṃ niṭṭhitaṃ .