6. Kaṇhapetavatthu
207.
‘‘ Uṭṭhehi
P0.25 kaṇha kiṃ sesi , ko attho supanena te ;Yo ca tuyhaṃ sako bhātā , hadayaṃ cakkhu ca [ cakkhuṃva ( aṭṭha .)] dakkhiṇaṃ ;
Tassa vātā balīyanti , sasaṃ jappati [ ghaṭo jappati ( ka .)] kesavā ’’ ti .
208.
‘‘ Tassa
V0.110 taṃ vacanaṃ sutvā , rohiṇeyyassa kesavo ;Taramānarūpo vuṭṭhāsi , bhātusokena aṭṭito .
209.
‘‘ Kiṃ nu ummattarūpova , kevalaṃ dvārakaṃ imaṃ ;
Saso sasoti lapasi , kīdisaṃ sasamicchasi .
210.
‘‘ Sovaṇṇamayaṃ maṇimayaṃ , lohamayaṃ atha rūpiyamayaṃ ;
Saṅkhasilāpavāḷamayaṃ , kārayissāmi te sasaṃ .
211.
‘‘ Santi aññepi sasakā , araññavanagocarā ;
Tepi te ānayissāmi , kīdisaṃ sasamicchasī ’’ ti .
212.
‘‘ Nāhamete sase icche , ye sasā pathavissitā ;
Candato sasamicchāmi , taṃ me ohara kesavā ’’ ti .
213.
‘‘ So nūna madhuraṃ ñāti , jīvitaṃ vijahissasi ;
Apatthiyaṃ patthayasi , candato sasamicchasī ’’ ti .
214.
‘‘ Evaṃ ce kaṇha jānāsi , yathaññamanusāsasi ;
Kasmā
T0.182 pure mataṃ puttaṃ , ajjāpi manusocasi . 215.
‘‘ Na yaṃ labbhā manussena , amanussena vā pana ;
Jāto me mā mari putto , kuto labbhā alabbhiyaṃ .
216.
‘‘ Na
M0.150 mantā mūlabhesajjā , osadhehi dhanena vā ;Sakkā ānayituṃ kaṇha , yaṃ petamanusocasi .
217.
‘‘ Mahaddhanā
P0.26 mahābhogā , raṭṭhavantopi khattiyā ;Pahūtadhanadhaññāse , tepi no [ natthetthapāṭhabhedo ] ajarāmarā .
218.
‘‘ Khattiyā brāhmaṇā vessā , suddā caṇḍālapukkusā ;
Ete caññe ca jātiyā , tepi no ajarāmarā .
219.
‘‘ Ye mantaṃ parivattenti , chaḷaṅgaṃ brahmacintitaṃ ;
Ete caññe ca vijjāya , tepi no ajarāmarā .
220.
‘‘ Isayo vāpi [ isayo cāpi ( vimānavatthu 99)] ye santā , saññatattā tapassino ;
Sarīraṃ tepi kālena , vijahanti tapassino .
221.
‘‘ Bhāvitattā arahanto , katakiccā anāsavā ;
Nikkhipanti imaṃ dehaṃ , puññapāpaparikkhayā ’’ ti .
222.
‘‘ Ādittaṃ vata maṃ santaṃ , ghatasittaṃva pāvakaṃ ;
Vārinā viya osiñcaṃ , sabbaṃ nibbāpaye daraṃ .
223.
‘‘ Abbahī
V0.111 vata me sallaṃ , sokaṃ hadayanissitaṃ ;Yo me sokaparetassa , puttasokaṃ apānudi .
224.
‘‘ Svāhaṃ
T0.183 abbūḷhasallosmi , sītibhūtosmi nibbuto ;Na socāmi na rodāmi , tava sutvāna bhātika ’’[ bhāsitaṃ ( syā .)].
225.
Evaṃ karonti sappaññā , ye honti anukampakā ;
Nivattayanti sokamhā , ghaṭo jeṭṭhaṃva bhātaraṃ .
226.
Yassa etādisā honti , amaccā paricārakā ;
Subhāsitena anventi , ghaṭo jeṭṭhaṃva bhātaranti .
Kaṇhapetavatthu chaṭṭhaṃ .