mahāpadesāti mahāapadesā, buddhādayo mahante apadisitvā vuttāni mahākāraṇānīti attho. Atha vā mahāpadesāti mahāokāsā, mahantāni dhammassa patiṭṭhānānīti vuttaṃ hoti. Tatrāyaṃ vacanattho – apadissatīti apadeso, buddho apadeso etassāti buddhāpadeso. Esa nayo sesesupi. ‘‘ Sammukhā metaṃ bhagavato suta ’’ ntiādinā kenaci ābhatassa ganthassa dhammoti vā adhammoti vā vinicchayane kāraṇaṃ. Kiṃ pana tanti? Tassa tathā ābhatassa suttotaraṇādi eva. Yadi evaṃ kathaṃ cattāroti? Apadisitappabhedato. (Netti-A, p81)

Paṭhamattho eva hi idha pāḷi āgato, vinicchayane kāraṇaṃ mahāpadesoti adhippāyo. Suttotaraṇādīti ādisaddena suttānotaraṇādipi saṅgayhati. Suttotaraṇavinayasandassanāni hi kenaci yathābhatassa ganthassa ‘‘ dhammo ’’ ti vinicchayane kāraṇaṃ. Suttānotaraṇavinayāsandassanāni ‘‘ adhammo ’’ ti. Yadi evanti yadi yathābhatassa ganthassa suttavinayehi saṃsandanaṃ ‘‘ dhammo ’’ ti, asaṃsandanaṃ ‘‘ adhammo ’’ ti vinicchayakāraṇaṃ, evaṃ santeti attho. (Netti-t, p56)

Anuttarimanussadhammena ca tikicchanena sakkā jarāya paṭikāraṃ kātuṃ, na tathā maraṇassāti evampi jarāmaraṇānaṃ atthato nānattaṃ sampaṭicchitabbanti dassetuṃ ‘‘ sakkatevā ’’ tiādi vuttaṃ. Tattha sakkateti sakyate, sakkāti attho. (နေတ္တိ-အဋ္ဌ, ၈၄)

Imesaṃ dhammānaṃ atthato ekattanti imamevatthaṃ ‘‘ na hi yujjatī ’’ tiādinā vivarati. Taṇhāya adhippāye aparipūramāneti icchitālābhamāha. Tena icchātaṇhānaṃ atthato ekattaṃ vuttaṃ hotīti. Etena na hi yujjati icchāya ca taṇhāya ca atthato aññattanti. (Netti-A, p86)

Saññāvedayitanirodhasahagatāti ‘‘ saññāvedayitanirodhaṃ upasampajja viharissāmī ’’ ti tassa parikammavasena pavattadhammā. Te pana yasmā nevasaññānāsaññāyatanasamāpattiyaṃ ṭhiteneva sakkā saññāvedayitanirodhaṃ upasampajja viharituṃ, na tato parihīnena, tasmā nevasaññānāsaññāyatanasamāpattiyā hānāya saṃvattantīti na yuttā kathā. Visesāya saṃvattantīti pana yuttā kathāti āha – ‘‘ hānāya…pe… desanā ’’ ti. (Netti-A, p90)