Ayaṃ catunnampi adhikaraṇānaṃ vissajjanapakkhe ekapadayojanā .
Etenānusārena sabbapadāni yojetabbāni .
343. Mūlapucchāya vissajjane dvādasa mūlānīti kodhaupanāhayugaḷakādīni cha vivādāmūlāni , lobhadosamohā tayo , alobhādosāmohā tayoti imāni ajjhattasantānappavattāni dvādasa mūlāni .
Cuddasa mūlānīti tāneva dvādasa
P7.1358 kāyavācāhi saddhiṃ cuddasa honti .Cha mūlānīti kāyādīni cha samuṭṭhānāni .
Samuṭṭhānapucchāya vissajjane aṭṭhārasa bhedakaravatthūni samuṭṭhānāni , tañhi etesu aṭṭhārasasu bhedakaravatthūsu samuṭṭhāti , etehi vā kāraṇabhūtehi samuṭṭhāti .
Tenassetāni samuṭṭhānāni vuccanti .
Esa nayo sabbattha .