425. Diṭṭhāvikammavagge – diṭṭhāvikammāti diṭṭhīnaṃ āvikammāni ; laddhippakāsanāni āpattidesanāsaṅkhātānaṃ vinayakammānametaṃ adhivacanaṃ .

Anāpattiyā diṭṭhiṃ āvi karotīti anāpattimeva āpattīti desetīti atthoM0.219 . Adesanāgāminiyāti garukāpattiyā diṭṭhiṃ āvikaroti ; saṅghādisesañca pārājikañca desetīti attho . Desitāyāti lahukāpattiyāpi desitāya diṭṭhiṃ āvikaroti ; desitaṃ puna desetītiP7.1375 attho . Catūhi pañcahi diṭṭhin ti yathā catūhi pañcahi diṭṭhi āvikatā hoti , evaṃ āvikaroti ; cattāro pañca janā ekato āpattiṃ desentīti attho . Manomānasenāti manasaṅkhātena mānasena diṭṭhiṃ āvikaroti ; vacībhedaṃ akatvā citteneva āpattiṃ desetīti attho .

Nānāsaṃvāsakassāti laddhinānāsaṃvāsakassa vā kammanānāsaṃvāsakassa vā santike diṭṭhiṃ āvikaroti ; āpattiṃ desetīti attho . Nānāsīmāyāti samānasaṃvāsakassāpi nānāsīmāya ṭhitassa santike āvikaroti . Māḷakasīmāya hi ṭhitena sīmantarikāya ṭhitassa sīmantarikāya vā ṭhitena avippavāsasīmāya ṭhitassāpi āpattiṃ desetuṃ na vaṭṭati . Apakatattassāti ukkhittakassa vā , yassa vā uposathapavāraṇā ṭhapitā honti , tassa santike desetīti attho .

430. Nālaṃ okāsakammaṃ kātun ti na pariyattaṃ kātuṃ ; na kātabbanti attho .

Idhāpi apakatatto ukkhittako ca ṭhapitauposathapavāraṇo ca . Cāvanādhippāyoti sāsanato cāvetukāmo .

432. MandattāV0.223 momūhattāti mandabhāvena momūhabhāvena vissajjitampi jānituṃ asamattho , kevalaṃ attano momūhabhāvaṃ pakāsentoyeva pucchati ummattako viya . Pāpicchoti ‘‘ evaṃ maṃ jano sambhāvessatī ’’ ti pāpikāya icchāya pucchati . Paribhavāti paribhavaṃ āropetukāmo hutvā pucchati . Aññabyākaraṇesupi eseva nayo . Sesaṃ sabbattha uttānamevāti . Attādānavagge ca dhutaṅgavagge ca yaṃ vattabbaṃ siyā , taṃ sabbaṃ heṭṭhā vuttameva . Diṭṭhāvikammavaggavaṇṇanā niṭṭhitā . Musāvādavaggavaṇṇanā