13. Kusanāḷivaggo
121. Kusanāḷijātakaṃ
121.
Kare sarikkho atha vāpi seṭṭho , nihīnako vāpi kareyya eko ;
Kareyyumete [ kareyyuṃ te ( sī . pī .)] byasane uttamatthaṃ , yathā ahaṃ kusanāḷi rucāyanti .
Kusanāḷijātakaṃ paṭhamaṃ .
122. Dummedhajātakaṃ
122.
Yasaṃ
T1.40M1.29 laddhāna dummedho , anatthaṃ carati attano ;Attano ca paresañca , hiṃsāya paṭipajjatīti .
Dummedhajātakaṃ dutiyaṃ .
123. Naṅgalīsajātakaṃ
123.
Asabbatthagāmiṃ vācaṃ , bālo sabbattha bhāsati ;
Nāyaṃ dadhiṃ vedi na [ na vedi ( ka .)] naṅgalīsaṃ , dadhippayaṃ [ dadhimpayaṃ ( sī . pī .)] maññati naṅgalīsanti .
Naṅgalīsajātakaṃ tatiyaṃ .
124. Ambajātakaṃ
124.
Vāyametheva
V1.28 puriso , na nibbindeyya paṇḍito ;Vāyāmassa phalaṃ passa , bhuttā ambā anītihanti .
Ambajātakaṃ catutthaṃ .
125. Kaṭāhakajātakaṃ
125.
Bahumpi so vikattheyya , aññaṃ janapadaṃ gato ;
Anvāgantvāna dūseyya , bhuñja bhoge kaṭāhakāti .
Kaṭāhakajātakaṃ pañcamaṃ .
126. Asilakkhaṇajātakaṃ
126.
Tadevekassa
T1.41 [ tathevekassa ( sī . syā . pī . aṭṭha . mūlapāṭho )] kalyāṇaṃ , tadevekassa pāpakaṃ ;Tasmā sabbaṃ na kalyāṇaṃ , sabbaṃ vāpi na pāpakanti .
Asilakkhaṇajātakaṃ chaṭṭhaṃ .
127. Kalaṇḍukajātakaṃ
127.
Te desā tāni vatthūni , ahañca vanagocaro ;
Anuvicca kho taṃ gaṇheyyuṃ , piva [ pipa ( sī . pī .)] khīraṃ kalaṇḍukāti .
Kalaṇḍukajātakaṃ sattamaṃ .
128. Biḷāravatajātakaṃ
128.
Yo
M1.30 ve dhammaṃ dhajaṃ [ dhammadhajaṃ ( syā . pī . ka .)] katvā , nigūḷho pāpamācare ;Vissāsayitvā bhūtāni , biḷāraṃ nāma taṃ vatanti .
Biḷāravatajātakaṃ aṭṭhamaṃ .
129. Aggikabhāradvājajātakaṃ
129.
Nāyaṃ sikhā puññahetu , ghāsahetu ayaṃ sikhā ;
Nāṅguṭṭhagaṇanaṃ yāti , alaṃ te hotu aggikāti .
Aggikabhāradvājajātakaṃ navamaṃ .
130. Kosiyajātakaṃ
130.
Yathā
T1.42V1.29 vācā ca bhuñjassu , yathā bhuttañca byāhara ;Ubhayaṃ te na sameti , vācā bhuttañca kosiyeti .
Kosiyajātakaṃ dasamaṃ .
Kusanāḷivaggo [ sarikkhavaggo ( ka .)] terasamo .
Tassuddānaṃ –
Kusanāḷisirivhayano ca yasaṃ , dadhi mamba kaṭāhakapañcamako ;
Atha pāpaka khīra biḷāravataṃ , sikhi kosiyasavhayanena dasāti .