512. Kumbhajātakaṃ (2)
33.
Ko
M1.361 pāturāsī tidivā nabhamhi , obhāsayaṃ saṃvariṃ candimāva ;Gattehi
T1.478 te rasmiyo niccharanti , sateratā [ sateritā ( sī . syā . ka .)] vijjurivantalikkhe . 34.
So chinnavātaṃ kamasī aghamhi , vehāyasaṃ gacchasi tiṭṭhasī ca ;
Iddhī nu te vatthukatā subhāvitā , anaddhagūnaṃ api devatānaṃ .
35.
Vehāyasaṃ gammamāgamma [ kamamāgamma ( sī . syā .)] tiṭṭhasi , kumbhaṃ kiṇāthāti yametamatthaṃ ;
Ko vā tuvaṃ kissa vā tāya kumbho , akkhāhi me brāhmaṇa etamatthaṃ .
36.
Na sappikumbho napi telakumbho , na phāṇitassa na madhussa kumbho ;
Kumbhassa vajjāni anappakāni , dose bahū kumbhagate suṇātha .
37.
Gaḷeyya
V1.268 yaṃ pitvā [ pītvā ( sī . pī .)] pate papātaṃ , sobbhaṃ guhaṃ candaniyoḷigallaṃ ;Bahumpi bhuñjeyya abhojaneyyaṃ , tassā puṇṇaṃ kumbhamimaṃ kiṇātha .
38.
Yaṃ pitvā [ yaṃ ve pītvā ( sī .)] cittasmimanesamāno , āhiṇḍatī goriva bhakkhasārī [ bhakkhasādī ( sī . syā . aṭṭha .)];
Anāthamāno
T1.479 upagāyati naccati ca , tassā puṇṇaṃ kumbhamimaṃ kiṇātha . 39.
Yaṃ
M1.362 ve pivitvā acelova naggo , careyya gāme visikhantarāni ;Sammūḷhacitto ativelasāyī , tassā puṇṇaṃ kumbhamimaṃ kiṇātha .
40.
Yaṃ pitvā uṭṭhāya pavedhamāno , sīsañca bāhuñca [ bāhañca ( pī .)] pacālayanto ;
So naccatī dārukaṭallakova , tassā puṇṇaṃ kumbhamimaṃ kiṇātha .
41.
Yaṃ ve pivitvā aggidaḍḍhā sayanti , atho sigālehipi khāditāse ;
Bandhaṃ vadhaṃ bhogajāniñcupenti , tassā puṇṇaṃ kumbhamimaṃ kiṇātha .
42.
Yaṃ pitvā bhāseyya ābhāsaneyyaṃ , sabhāyamāsīno apetavattho ;
Sammakkhito [ samakkhito ( sī .)] vantagato byasanno , tassā puṇṇaṃ kumbhamimaṃ kiṇātha .
43.
Yaṃ ve pivitvā ukkaṭṭho āvilakkho , mameva sabbā pathavīti maññe [ maññati ( sī .)];
Na
T1.480 me samo cāturantopi rājā , tassā puṇṇaṃ kumbhamimaṃ kiṇātha . 44.
Mānātimānā kalahāni pesuṇī , dubbaṇṇinī naggayinī palāyinī ;
Corāna dhuttāna gatī niketo , tassā puṇṇaṃ kumbhamimaṃ kiṇātha .
45.
Iddhāni phītāni kulāni assu , anekasāhassadhanāni loke ;
Ucchinnadāyajjakatānimāya , tassā puṇṇaṃ kumbhamimaṃ kiṇātha .
46.
Dhaññaṃ
M1.363 dhanaṃ rajataṃ jātarūpaṃ , khettaṃ gavaṃ yattha vināsayanti ;Ucchedanī vittavataṃ [ ucchedanī vittagataṃ ( syā .), ucchedanivittagataṃ ( ka .)] kulānaṃ , tassā puṇṇaṃ kumbhamimaṃ kiṇātha .
47.
Yaṃ ve pitvā dittarūpova [ duṭṭharūpova ( sī .)] poso , akkosati mātaraṃ pitarañca ;
Sassumpi gaṇheyya athopi suṇhaṃ , tassā puṇṇaṃ kumbhamimaṃ kiṇātha .
48.
Yaṃ ve pitvā dittarūpāva nārī , akkosati sasuraṃ sāmikañca ;
Dāsampi
T1.481 gaṇhe paricārakampi , tassā puṇṇaṃ kumbhamimaṃ kiṇātha . 49.
Yaṃ ve pivitvāna [ yañce pītvāna ( pī .)] haneyya poso , dhamme ṭhitaṃ samaṇaṃ brāhmaṇaṃ vā ;
Gacche apāyampi tatonidānaṃ , tassā puṇṇaṃ kumbhamimaṃ kiṇātha .
50.
Yaṃ ve pivitvā duccaritaṃ caranti , kāyena vācāya ca cetasā ca ;
Nirayaṃ vajanti duccaritaṃ caritvā , tassā puṇṇaṃ kumbhamimaṃ kiṇātha .
51.
Yaṃ
V1.269 yācamānā na labhanti pubbe , bahuṃ hiraññampi pariccajantā ;So taṃ pivitvā alikaṃ bhaṇāti , tassā puṇṇaṃ kumbhamimaṃ kiṇātha .
52.
Yaṃ ve pitvā pesane pesiyanto , accāyike karaṇīyamhi jāte ;
Atthampi so nappajānāti vutto , tassā puṇṇaṃ kumbhamimaṃ kiṇātha .
53.
Hirīmanāpi
M1.364 ahirīkabhāvaṃ , pātuṃ karonti madanāya [ madirāya ( pī .)] mattā ;Dhīrāpi
T1.482 santā bahukaṃ bhaṇanti , tassā puṇṇaṃ kumbhamimaṃ kiṇātha . 54.
Yaṃ ve pitvā ekathūpā sayanti , anāsakā thaṇḍiladukkhaseyyaṃ ;
Dubbaṇṇiyaṃ āyasakyañcupenti , tassā puṇṇaṃ kumbhamimaṃ kiṇātha .
55.
Yaṃ ve pitvā pattakhandhā sayanti , gāvo kuṭahatāva na hi vāruṇiyā ;
[ yaṃ ve pitvā pattakkhandhā , sayanti gāvo kūṭahatāriva ; na hi vāruṇiyā vego , narena sussahoriva ;( sī .)] Vego narena susahoriva [ yaṃ ve pitvā pattakkhandhā , sayanti gāvo kūṭahatāriva ; na hi vāruṇiyā vego , narena sussahoriva ;( sī .)], tassā puṇṇaṃ kumbhamimaṃ kiṇātha .
56.
Yaṃ manussā vivajjenti , sappaṃ ghoravisaṃ miva [ visamiva ( syā .), visaṃ iva ( ka .), visāmiva (?)];
Taṃ loke visasamānaṃ , ko naro pātumarahati .
57.
Yaṃ ve pitvā andhakaveṇḍaputtā , samuddatīre paricārayantā [ andhakaveṇhuputtā ( sī . pī .), aṇḍakaveṇḍaputtā ( ka .)];
Upakkamuṃ musalehaññamaññaṃ , tassā puṇṇaṃ kumbhamimaṃ kiṇātha .
58.
Yaṃ ve pitvā pubbadevā pamattā , tidivā cutā sassatiyā samāya ;
Taṃ
T1.483 tādisaṃ majjamimaṃ niratthakaṃ , jānaṃ mahārāja kathaṃ piveyya . 59.
Nayimasmiṃ kumbhasmiṃ dadhi vā madhu vā , evaṃ abhiññāya kiṇāhi rāja ;
Evañhimaṃ kumbhagatā mayā te , akkhātarūpaṃ tava sabbamitta .
60.
Na
M1.365 me pitā vā athavāpi mātā , etādisā yādisako tuvaṃsi ;Hitānukampī paramatthakāmo , sohaṃ karissaṃ vacanaṃ tavajja .
61.
Dadāmi te gāmavarāni pañca , dāsīsataṃ satta gavaṃ satāni ;
Ājaññayutte ca rathe dasa ime , ācariyo hosi mamatthakāmo .
62.
Taveva dāsīsatamatthu rāja , gāmā ca gāvo ca taveva hontu ;
Ājaññayuttā ca rathā taveva , sakkohamasmī tidasānamindo .
63.
Maṃsodanaṃ sappipāyāsaṃ [ sappipāyañca ( sī .)] bhuñja , khādassu ca tvaṃ madhumāsapūve ;
Evaṃ
T1.484 tuvaṃ dhammarato janinda , anindito saggamupehi ṭhānanti .Kumbhajātakaṃ dutiyaṃ .