Nigamanakathā
1400.
Abhidhammāvatāro yaṃ , varo paramagambhīro ;
Icchatā nipuṇaṃ buddhiṃ , bhikkhunā pana sotabbo .
1401.
Sumatimativicārabodhano ,
Vimativimohavināsano ayaṃ ;
Kumatimatimahātamonāso ,
Paṭumatibhāsakaro mato mayā .
1402.
Yato
V0.179 sumati nā mato nāmato ,Āyācitasammānato mānato ;
Tato hi racito sadā tosadā ,
Mayā hitavibhāvanā bhāvanā .
1403.
Atthato
M0.185 ganthato cāpi , yuttito cāpi ettha ca ;Ayuttaṃ vā viruddhaṃ vā , yadi dissati kiñcipi .
1404.
Pubbāparaṃ viloketvā , vicāretvā punappunaṃ ;
Dhīmatā saṅgahetabbaṃ , gahetabbaṃ na dosato .
1405.
Tividhā byappathānañhi , gatiyo dubbidhāpi ce ;
Tasmā upaparikkhitvā , veditabbaṃ vibhāvinā .
1406.
Nikāyantaraladdhīhi , asammisso anākulo ;
Mahāvihāravāsīnaṃ , vācanāmagganissito .
1407.
Madhurakkharasaṃyutto , attho yasmā pakāsito ;
Tasmā hitatthakāmena , kātabbo ettha ādaro .
1408.
Saddhammaṭṭhitikāmena , karontena ca yaṃ mayā ;
Puññamadhigataṃ tena , sukhaṃ pappontu pāṇino .
1409.
Antarāyaṃ vinā cāyaṃ , yathāsiddhimupāgato ;
Tathā kalyāṇasaṅkappā , siddhiṃ gacchantu pāṇinaṃ .
1410.
Naranārigaṇākiṇṇe
P0.138 , asaṃkiṇṇakulākule ;Phīte sabbaṅgasampanne , supasannasitodake .
1411.
Nānāratanasampuṇṇe , vividhāpaṇasaṅkaṭe ;
Kāvera paṭṭane ramme , nānārāmopasobhite .
1412.
Kelāsasikharākārapāsādapaṭimaṇḍite ;
Kārite kaṇhadāsena , dassanīye manorame .
1413.
Vihāre
V0.180 vividhākāracārupākāragopure ;Tattha pācīnapāsāde , mayā nivasatā sadā .
1414.
Asallekhamasākhalye , sīlādiguṇasobhinā ;
Ayaṃ sumati nā sādhu , yācitena kato satā .
1415.
Devā
M0.186 kālena vassantu , vassaṃ vassavalāhakā ;Pālayantu mahīpālā , dhammato sakalaṃ mahiṃ .
1416.
Yāva tiṭṭhati lokasmiṃ , himavā pabbatuttamo ;
Tāva tiṭṭhatu saddhammo , dhammarājassa satthunoti .
Uragapura nivasanena ācariyena bhadantabuddhadattena sīlācārasampannena kato abhidhammāvatāro nāmāyaṃ .
Abhidhammāvatāro niṭṭhito .
Namo tassa bhagavato arahato sammāsambuddhassa