7. Rāhulasuttavaṇṇanā
177. Sattame
P3.152 ajjhattikāti kesādīsu vīsatiyā koṭṭhāsesu thaddhākāralakkhaṇā pathavīdhātu .Bāhirāti bahiddhā anindriyabaddhesu pāsāṇapabbatādīsu thaddhākāralakkhaṇā pathavīdhātu
V2.350 .
Imināva nayena sesāpi dhātuyo veditabbā .Netaṃ mama , nesohamasmi , na meso attāti idaṃ tayaṃ taṇhāmānadiṭṭhiggāhapaṭikkhepavasena vuttaṃ .
Sammappaññāya daṭṭhabban ti hetunā kāraṇena maggapaññāya passitabbaṃ .
Disvāti sahavipassanāya maggapaññāya passitvā .
Acchecchi taṇhan ti maggavajjhataṇhaṃ samūlakaṃ chindi .
Vivattayi saṃyojanan ti dasavidhampi saṃyojanaṃ vivattayi ubbattetvā pajahi .
Sammā mānābhisamayāti hetunā kāraṇena navavidhassa mānassa pahānābhisamayā .
Antamakāsi dukkhassāti vaṭṭadukkhaṃ paricchinnaṃ parivaṭumaṃ akāsi , katvā ṭhitoti attho .
Iti satthārā saṃyuttamahānikāye rāhulovāde ( saṃ . ni .3.91 ādayo ) vipassanā kathitā , cūḷarāhulovādepi ( ma . ni .3.416 ādayo ) vipassanā kathitā , ambalaṭṭhikarāhulovāde ( ma . ni .2.107 ādayo ) daharasseva sato musāvādā veramaṇī kathitā , mahārāhulovāde ( ma . ni .2.113 ādayo ) vipassanā kathitā .
Imasmiṃ aṅguttaramahānikāye ayaṃ catukoṭikasuññatā nāma kathitāti .