1. Pattakammasuttavaṇṇanā
61. Dutiyassa
V2.305P3.98 paṭhame aniṭṭhapaṭikkhepena iṭṭhā .Mane kamanti pavisantīti kantā .
Manaṃ appāyanti pavaḍḍhentīti manāpā .
Dullabhāti paramadullabhā .
Bhogāti bhuñjitabbā rūpādayo visayā .
Sahadhammenāti dhammeneva saddhiṃ uppajjantu , mā dhammūpaghātaṃ katvā adhammenāti .
Athavā sahadhammenāti sakāraṇena , tena tena senāpatiseṭṭhiṭṭhānādikāraṇena saddhiṃyeva uppajjantūti attho .
Yasoti parivārasampatti .
Saha
M2.313 ñātībhīti ñātakehi saddhiṃ .
Saha upajjhāyehīti sukhadukkhesu upanijjhāyitabbattā upajjhāyasaṅkhātehi sandiṭṭhasambhattehi saddhiṃ .Akiccaṃ karotīti akātabbaṃ karoti .
Kiccaṃ aparādhetīti kattabbayuttakaṃ kiccaṃ akaronto taṃ aparādheti nāma .
Dhaṃsatīti patati parihāyati .
Abhijjhāvisamalobhan ti abhijjhāsaṅkhātaṃ visamalobhaṃ .
Pajahatīti nudati nīharati .
Mahāpaññoti mahantapañño .
Puthupaññoti puthulapañño .
Āpātadasoti taṃ taṃ atthaṃ āpāteti tameva passati , sukhumampissa atthajātaṃ āpātaṃ āgacchatiyevāti attho .
Uṭṭhānavīriyādhigatehīti
P3.99 uṭṭhānasaṅkhātena vīriyena adhigatehi .
Bāhābalaparicitehīti bāhābalena paricitehi vaḍḍhitehi .
Sedāvakkhittehīti avakkhittasedehi , sedaṃ muñcitvā vāyāmena payogena samadhigatehīti attho .
Dhammikehīti dhammayuttehi .
Dhammaladdhehīti dasakusalakammapathadhamme akopetvā laddhehi .
Pattakammānīti yuttakammāni anucchavikakammāni .Sukhetīti sukhitaṃ karoti .
Pīṇetīti pīṇitaṃ balasampannaṃ karoti .
Ṭhānagataṃ hotīti kāraṇagataṃ hoti .
Kiṃ pana tanti ?
Catūsu pattakammesu ekaṃ bhogehi kattabbakammaṃ bhogajātameva ṭhānagataṃ .
Pattagatan ti yuttappattaṭṭhānagataṃ .
Āyatanaso paribhuttan ti kāraṇeneva paribhuttaṃ bhogajātaṃ hoti .
Pariyodhāya
V2.306 saṃvattatīti pidahitvā vattati .
Yathā aggiādīhi uppannāsu āpadāsu , evaṃ ādittagehanibbāpanādīnaṃ atthāya dhanapariccāgaṃ katvā tāsaṃ āpadānaṃ maggaṃ pidahati nivāreti .Sotthiṃ attānaṃ karotīti nirupaddavaṃ khemaṃ attānaṃ karoti .
Ñātibalin ti ñātakānaṃ baliṃ .
Atithibalin ti āgantukānaṃ baliṃ .
Pubbapetabalin ti
P3.100 paralokagatānaṃ ñātakānaṃ baliṃ .
Rājabalin ti rañño kattabbayuttakaṃ rājabaliṃ .
Devatābalin ti devatānaṃ kattabbabaliṃ .
Sabbametaṃ tesaṃ tesaṃ yathānucchavikavasena dātabbadānassa adhivacanaṃ .Khantisoracce niviṭṭhāti adhivāsanakkhantiyañca susīlatāya ca niviṭṭhā .
Ekamattānaṃ damentīti ekaṃ attanova attabhāvaṃ indriyadamena damenti .
Samentīti attano cittaṃ kilesavūpasamanena samenti .
Parinibbāpentīti kilesaparinibbāneneva
M2.314 parinibbāpenti .
Uddhaggikan tiādīsu uparūparibhūmīsu phaladānavasena uddhamaggamassāti uddhaggikā .
Saggassa hitāti tatrupapattijananato sovaggikā .
Nibbattanibbattaṭṭhāne sukhova vipāko assāti sukhavipākā .
Suṭṭhu aggānaṃ dibbavaṇṇādīnaṃ dasannaṃ visesānaṃ nibbattanato saggasaṃvattanikā , evarūpaṃ dakkhiṇaṃ patiṭṭhāpetīti attho .Ariyadhamme ṭhitoti pañcasīladhamme patiṭṭhito .
Pecca sagge pamodatīti paralokaṃ gantvā yattha sagge paṭisandhiṃ gaṇhāti , tattha modati .
Sotāpannasakadāgāmino vā hontu anāgāmī vā , sabbesaṃ ayaṃ paṭipadā labbhatevāti .