အထခေါ၊ ၌။ မလ္လပုတ္တော၊ သော။ အာယသ္မာ ဒဗ္ဗော၊ သည်။ အာသနာ၊ နေရာမှ။ ဥဋ္ဌာယ၊ ထ၍။ ဘဂဝန္တံ၊ ကို။ အဘိဝါဒေတွာ၊ ရှိခိုး၍။ ပဒက္ခိဏံ ကတွာ၊ အရိုအသေပြု၍။ ဝေဟာသံ-ဝေဟာသေ၊ ကောင်းကင်သို့။ အဗ္ဘုဂ္ဂန္တွာ၊ ပျံတက်၍။ အန္တလိက္ခေ၊ အကြားအပေါက်ဖြင့် ကြည့်ရှုအပ်သော။ အာကာသေ၊ ရေးခြစ်မထင် ထက်ကောင်းကင်၌။ ပထဝိံ နိမ္မိနိတွာ၊ မြေဖန်ဆင်း၍(ထည့်)။ ပလ္လင်္ကေန၊ ထက်ဝယ်ပလ္လင်ဖြင့်။ နိသီဒိတွာ၊ ထိုင်နေ၍။ တေဇောဓါတုံ၊ တေဇော ကသိုဏ်းလျှင်အာရုံရှိသော စတုတ္ထဇ္ဈာန်သမာပတ်ကို။ သမာပဇ္ဇိတွာ၊ ဝင်စား၍။ ဝုဋ္ဌဟိတွာ၊ ထိုသမာပတ်မှ ထ၍။ ပရိနိဗ္ဗာယိ၊ ရာဂစသော တစ်ဆယ့်တစ်မီးငြိမ်းလေပြီ။

မလ္လပုတ္တော။လ။ ပရိနိဗ္ဗာယိ။ ။ ဤပါဠိ၌ ဥဋ္ဌာယ အဘိဝါဒေတွာ ပဒက္ခိဏံ အဗ္ဘုဂ္ဂန္တွာ နိသီဒိတွာ သမာပဇ္ဇိတွာ ဝုဋ္ဌာယ-ဟူသော တွာပစ္စယန္တ ကြိယာဝိသေသနများစွာဖြင့် ပရိနိဗ္ဗာယိ-ပုဒ်ကို အထူးပြု၏။ပါဠိ၌ ပါရှိသော တွာပစ္စယန္တပုဒ်တို့အပြင် ပရိကမ္မံ ကတွာ, သမာပတ္တိံ သမာပဇ္ဇိတွာ , ဝုဋ္ဌာယ (သရီရံ) အာဝဇ္ဇိတွာ ပုနသမာပတ္တိံ သမာပဇ္ဇိတွာ အဓိဋ္ဌတွာ-ဟူသော တွာပစ္စယန္တပုဒ် ထပ်မံ ဖြည့်စွက်ကာ အဋ္ဌကထာဖွင့်တော်မူ၏။ထို့ကြောင့် ထိုပါဠိအဋွဌကထာလာ တွာပစ္စယန္တပုဒ်တို့ အလို

"အရှင်ဒဗ္ဗသည် ဘုရားရှင်ကို ရှိခိုး၍ အရိုအသေပြုကာ ဘုရားရှေ့၌ ထိုင်နေစဉ် ဘုရားရှင်ကိုယ်တော်မြတ်က အရှင်ဒဗ္ဗအား တန်ခိုးပြာဋိဟာပြရန် တိုက်တွန်းတော်မူသောကြောင့် တစ်ဖန် ဘုရားရှင်ကို ရှိခိုးကာ ကောင်းကင်သို့ တက်ပြီးလျှင် ကောင်းကင်၌ မြေကြီးဖန်ဆင်း၍ တင်ပလ္လင်ခွေကာ ထိုင်နေစဉ် တေဇောကသိဏသမာပတ်မဝင်စားမီ ပရိကံပြု၏။ထို့နောက် တေဇောကသိုဏ်းလျှင် အာရုံရှိသော စတုတ္ထဈာန်ကို ဝင်စား၏။ထို့နောက် သရိရဈာပန တေဇောကသိုဏ်းကို အဓိဋ္ဌာန်တော်မူကာ ပရိနိဗ္ဗာန်ပြုတော်မူပြီ"ဟူသော ဤအဓိပ္ပါယ်သည် ဤအဖြေဖြစ်ပေါ်လာသည်။