107.

‘‘ LūnakesīM0.110 paṅkadharī , ekasāṭī pure cariṃ ;

Avajje vajjamatinī , vajje cāvajjadassinī .

108.

‘‘ Divāvihārā nikkhamma , gijjhakūṭamhi pabbate ;

Addasaṃ virajaṃ buddhaṃ , bhikkhusaṅghapurakkhataṃ .

109.

‘‘ Nihacca jāṇuṃ vanditvā , sammukhā añjaliṃ akaṃ ;

Ehi bhaddeti maṃ avaca , sā me āsūpasampadā .

110.

‘‘ Ciṇṇā aṅgā ca magadhā , vajjī kāsī ca kosalā ;

Anakā paṇṇāsa vassāni , raṭṭhapiṇḍaṃ abhuñjahaṃ .

111.

‘‘ Puññaṃ vata pasavi bahuṃ , sappañño vatāyaṃ upāsako ; Yo bhaddāya cīvaraṃ adāsi , vippamuttāya sabbaganthehī ’’ ti . – ImāP0.107 gāthā abhāsi .

Yena abhippasannamānasena upāsakena attano cīvaraṃ dinnaṃ , tassa puññavisesakittanamukhena aññaṃ byākarontī ‘‘ puññaṃ vata pasavī bahun ’’ ti osānagāthamāha . Sā suviññeyyāva .

Tattha lūnakesīti lūnā luñcitā kesā mayhanti lūnakesī , nigaṇṭhesu pabbajjāya tālaṭṭhinā luñcitakesā , taṃ sandhāya vadati . Paṅkadharīti dantakaṭṭhassa akhādanena dantesu malapaṅkadhāraṇato paṅkadharī . Ekasāṭīti nigaṇṭhacārittavasena ekasāṭikā . Pure carin ti pubbe nigaṇṭhī hutvā evaṃ vicariṃ . Avajje vajjamatinīti nhānucchādanadantakaṭṭhakhādanādike anavajje sāvajjasaññī . Vajje cāvajjadassinīti mānamakkhapalāsavipallāsādike sāvajje anavajjadiṭṭhī . Divāvihārā nikkhammāti attano divāvihāraṭṭhānato nikkhamitvā . Ayampi ṭhitamajjhanhikavelāyaṃV0.120 therena samāgatā tassa pañhassa vissajjanena dhammadesanāya ca nihatamānadabbā pasannamānasā hutvā satthu santikaṃ upasaṅkamitukāmāva attano vasanaṭṭhānaṃ gantvā divāṭṭhāne nisīditvā sāyanhasamaye satthu santikaṃ upasaṅkamitvā . Nihacca jāṇuṃ vanditvāti jāṇudvayaṃ pathaviyaṃ nihantvā patiṭṭhapetvā pañcapatiṭṭhitena vanditvā . Sammukhā añjaliṃ akan ti satthu sammukhā dasanakhasamodhānasamujjalaṃ añjaliṃ akāsiṃ . Ehi , bhaddeti maṃ avaca , sā me āsūpasampadāti yaṃ maṃ bhagavā arahattaṃ patvā pabbajjañca upasampadañca yācitvā ṭhitaṃM0.111 ‘‘ ehi , bhadde , bhikkhunupassayaṃ gantvā bhikkhunīnaṃ santike pabbaja upasampajjassū ’’ ti avaca āṇāpesi . Sā satthu āṇā mayhaṃ upasampadāya kāraṇattā upasampadā āsi ahosi . Ciṇṇātiādikā dve gāthā aññābyākaraṇagāthā . Tattha ciṇṇā aṅgā ca magadhāti ye ime aṅgā ca magadhā ca vajjī ca kāsī ca kosalā ca janapadā pubbe sāṇāya mayā raṭṭhapiṇḍaṃ bhuñjantiyā ciṇṇā caritā , tesuyeva satthārā samāgamato paṭṭhāya anaṇā niddosā apagatakilesā hutvā paññāsa saṃvaccharāni raṭṭhapiṇḍaṃ abhuñjiṃP0.108 ahaṃ . Bhaddākuṇḍalakesātherīgāthāvaṇṇanā niṭṭhitā .