Parisuddhaphegguppattakathā
72.‘‘ Kittāvatā pana , bhante , tapojigucchā aggappattā ca hoti sārappattā ca ?
Sādhu me , bhante , bhagavā tapojigucchāya aggaññeva
T3.53 pāpetu , sāraññeva pāpetū ’’ ti .‘‘ Idha , nigrodha , tapassī cātuyāmasaṃvarasaṃvuto hoti .
Kathañca , nigrodha , tapassī cātuyāmasaṃvarasaṃvuto hoti … pe … yato kho , nigrodha , tapassī cātuyāmasaṃvarasaṃvuto hoti , aduṃ cassa hoti tapassitāya .
So abhiharati no hīnāyāvattati .
So vivittaṃ senāsanaṃ bhajati … pe … so ime pañca nīvaraṇe pahāya cetaso upakkilese paññāya dubbalīkaraṇe mettāsahagatena cetasā … pe … karuṇāsahagatena cetasā … pe … muditāsahagatena cetasā … pe … upekkhāsahagatena cetasā vipulena mahaggatena appamāṇena averena abyāpajjena pharitvā viharati .
So anekavihitaṃ pubbenivāsaṃ anussarati seyyathidaṃ – ekampi jātiṃ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṃsampi jātiyo cattālīsampi
M3.42 jātiyo paññāsampi jātiyo jātisatampi jātisahassampiP3.51 jātisatasahassampi anekepi saṃvaṭṭakappe anekepi vivaṭṭakappe anekepi saṃvaṭṭavivaṭṭakappe –‘ amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto , so tato cuto amutra udapādiṃ , tatrāpāsiṃ evaṃnāmo
V3.37 evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto , so tato cuto idhūpapanno ’ ti .Iti sākāraṃ sauddesaṃ anekavihitaṃ pubbenivāsaṃ anussarati .
‘‘ Taṃ kiṃ maññasi , nigrodha , yadi evaṃ sante tapojigucchā parisuddhā vā hoti aparisuddhā vā ’’ ti ?
‘‘ Addhā kho , bhante , evaṃ sante tapojigucchā parisuddhā
T3.54 hoti , no aparisuddhā , aggappattā ca sārappattā cā ’’ ti .‘‘ Na kho , nigrodha , ettāvatā tapojigucchā aggappattā ca hoti sārappattā ca ;
api ca kho phegguppattā hotī ’’ ti .