Iddhipāṭihāriyakathā

20.‘‘ AthaP3.16 khvāhaṃ [ atha kho svāhaṃ ( syā .)], bhaggava , pubbaṇhasamayaṃ nivāsetvā pattacīvaramādāya vesāliṃ piṇḍāya pāvisiṃ .

Vesāliyaṃ piṇḍāya caritvā pacchābhattaṃ piṇḍapātappaṭikkanto yena acelassa pāthikaputtassa ārāmo tenupasaṅkamiṃ divāvihārāya .

Atha kho , bhaggava , sunakkhatto licchaviputto taramānarūpo vesāliṃ pavisitvā yena abhiññātā abhiññātā licchavī tenupasaṅkami ;

upasaṅkamitvā abhiññāte abhiññāte licchavī etadavoca –

‘ esāvuso , bhagavā vesāliyaṃ piṇḍāya caritvā pacchābhattaṃ piṇḍapātappaṭikkanto yena acelassa pāthikaputtassa ārāmo tenupasaṅkami divāvihārāya .

Abhikkamathāyasmanto abhikkamathāyasmanto , sādhurūpānaṃ samaṇānaṃ uttarimanussadhammā iddhipāṭihāriyaṃ bhavissatī ’ tiM3.13 .

Atha kho , bhaggava , abhiññātānaṃ abhiññātānaṃ licchavīnaṃ etadahosi –

‘ sādhurūpānaṃ kira , bho , samaṇānaṃ uttarimanussadhammāT3.17 iddhipāṭihāriyaṃ bhavissati ;

handa vata , bho , gacchāmā ’ ti .

Yena ca abhiññātā abhiññātā brāhmaṇamahāsālā gahapatinecayikā nānātitthiyā [ nānātitthiya ( syā .)] samaṇabrāhmaṇā tenupasaṅkami .

Upasaṅkamitvā abhiññāte abhiññāte nānātitthiye [ nānātitthiya ( syā .)] samaṇabrāhmaṇe etadavoca –

‘ esāvuso , bhagavā vesāliyaṃ piṇḍāya caritvā pacchābhattaṃ piṇḍapātappaṭikkanto yena acelassa pāthikaputtassa ārāmo tenupasaṅkami divāvihārāya .

Abhikkamathāyasmanto abhikkamathāyasmanto , sādhurūpānaṃ samaṇānaṃ uttarimanussadhammā iddhipāṭihāriyaṃ bhavissatī ’ ti .

AthaV3.12 kho , bhaggava , abhiññātānaṃ abhiññātānaṃ nānātitthiyānaṃ samaṇabrāhmaṇānaṃ etadahosi –

‘ sādhurūpānaṃ kira , bho , samaṇānaṃ uttarimanussadhammā iddhipāṭihāriyaṃ bhavissati ;

handa vata , bho , gacchāmā ’ ti .

‘‘ AthaP3.17 kho , bhaggava , abhiññātā abhiññātā licchavī , abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā yena acelassa pāthikaputtassa ārāmo tenupasaṅkamiṃsu .

Sā esā , bhaggava , parisā mahā hoti [ parisā hoti ( sī . syā . pī .)] anekasatā anekasahassā .

21.‘‘ Assosi kho , bhaggava , acelo pāthikaputto –

‘ abhikkantā kira abhiññātā abhiññātā licchavī , abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā .

Samaṇopi gotamo mayhaṃ ārāme divāvihāraṃ nisinno ’ ti .

Sutvānassa bhayaṃ chambhitattaṃ lomahaṃso udapādi .

Atha kho , bhaggava , acelo pāthikaputtoT3.18 bhīto saṃviggo lomahaṭṭhajāto yena tindukakhāṇuparibbājakārāmo tenupasaṅkami .

‘‘ Assosi kho , bhaggava , sā parisā –

‘ acelo kira pāthikaputto bhīto saṃviggo lomahaṭṭhajāto yena tindukakhāṇuparibbājakārāmoM3.14 tenupasaṅkanto ’ ti [ tenupasaṅkamanto ( sī . pī . ka .)].

Atha kho , bhaggava , sā parisā aññataraṃ purisaṃ āmantesi –

‘ Ehi tvaṃ , bho purisa , yena tindukakhāṇuparibbājakārāmo , yena acelo pāthikaputto tenupasaṅkama .

Upasaṅkamitvā acelaṃ pāthikaputtaṃ evaṃ vadehi – abhikkamāvuso , pāthikaputta , abhikkantā abhiññātā abhiññātā licchavī , abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā , samaṇopi gotamo āyasmato ārāme divāvihāraṃ nisinno ;

bhāsitā kho pana te esā , āvuso pāthikaputta , vesāliyaṃ parisati vācā samaṇopi gotamo ñāṇavādo , ahampi ñāṇavādo .

Ñāṇavādo kho pana ñāṇavādena arahati uttarimanussadhammā iddhipāṭihāriyaṃ dassetuṃ .

SamaṇoP3.18 gotamo upaḍḍhapathaṃ āgaccheyya ahampi upaḍḍhapathaṃ gaccheyyaṃ .

Te tattha ubhopi uttarimanussadhammā iddhipāṭihāriyaṃ kareyyāma .

Ekaṃ ce samaṇo gotamo uttarimanussadhammā iddhipāṭihāriyaṃ karissati , dvāhaṃ karissāmi .

Dve ce samaṇo gotamo uttarimanussadhammā iddhipāṭihāriyāni karissati , cattārāhaṃ karissāmi .

Cattāri ce samaṇo gotamoT3.19 uttarimanussadhammā iddhipāṭihāriyāni karissatiV3.13 , aṭṭhāhaṃ karissāmi .

Iti yāvatakaṃ yāvatakaṃ samaṇo gotamo uttarimanussadhammā iddhipāṭihāriyaṃ karissati , taddiguṇaṃ taddiguṇāhaṃ karissāmī ’ ti abhikkamasseva [ abhikkamayeva ( sī . syā . pī .)] kho ;

āvuso pāthikaputta , upaḍḍhapathaṃ .

Sabbapaṭhamaṃyeva āgantvā samaṇo gotamo āyasmato ārāme divāvihāraṃ nisinno ’ ti .

22.‘‘ Evaṃ , bhoti kho , bhaggava , so puriso tassā parisāya paṭissutvā yena tindukakhāṇuparibbājakārāmo , yena acelo pāthikaputto tenupasaṅkami .

Upasaṅkamitvā acelaṃ pāthikaputtaṃ etadavoca –

‘ abhikkamāvuso pāthikaputta , abhikkantā abhiññātā abhiññātā licchavī , abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā .

Samaṇopi gotamo āyasmato ārāme divāvihāraṃ nisinno .

BhāsitāM3.15 kho pana te esā , āvuso pāthikaputta , vesāliyaṃ parisati vācā – samaṇopi gotamo ñāṇavādo ;

ahampi ñāṇavādo .

Ñāṇavādo kho pana ñāṇavādena arahati uttarimanussadhammā iddhipāṭihāriyaṃ dassetuṃ … pe … taddiguṇaṃ taddiguṇāhaṃ karissāmīti .

Abhikkamasseva kho , āvuso pāthikaputta , upaḍḍhapathaṃ .

Sabbapaṭhamaṃyeva āgantvā samaṇo gotamo āyasmato ārāme divāvihāraṃ nisinno ’ ti .

‘‘ Evaṃ vutte , bhaggava , acelo pāthikaputto ‘ āyāmi āvuso , āyāmiP3.19 āvuso ’ ti vatvā tattheva saṃsappati [ saṃsabbati ( ka .)], na sakkoti āsanāpi vuṭṭhātuṃ .

Atha kho so , bhaggava , puriso acelaṃ pāthikaputtaṃ etadavoca –

‘ kiṃ su nāma te , āvuso pāthikaputta , pāvaḷā su nāma te pīṭhakasmiṃ allīnā , pīṭhakaṃ su nāma te pāvaḷāsu allīnaṃ ?

Āyāmi āvuso , āyāmi āvusoti vatvā tattheva saṃsappasi , na sakkosi āsanāpi vuṭṭhātun ’ ti .

Evampi kho , bhaggava , vuccamāno acelo pāthikaputto ‘ āyāmi āvuso , āyāmi āvuso ’ ti vatvā tattheva saṃsappatiT3.20 , na sakkoti āsanāpi vuṭṭhātuṃ .

23.‘‘ Yadā kho so , bhaggava , puriso aññāsi –

‘ parābhūtarūpo ayaṃ acelo pāthikaputto .

Āyāmi āvuso , āyāmi āvusoti vatvā tattheva saṃsappati , na sakkoti āsanāpi vuṭṭhātun ’ ti .

Atha taṃ parisaṃ āgantvā evamārocesi –

‘ parābhūtarūpo , bho [ parābhūtarūpo bho ayaṃ ( syā . ka .), parābhūtarūpo ( sī . pī .)], acelo pāthikaputto .

Āyāmi āvuso , āyāmi āvusoti vatvā tattheva saṃsappati , na sakkoti āsanāpi vuṭṭhātun ’ ti .

Evaṃ vutte , ahaṃ , bhaggava , taṃ parisaṃ etadavocaṃ –

‘ abhabbo kho , āvuso , acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvāV3.14 mama sammukhībhāvaṃ āgantuṃ .

Sacepissa evamassa –

‘ ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyan ’ ti , muddhāpi tassa vipateyyāti .

Paṭhamabhāṇavāro niṭṭhito .

24.‘‘ AthaM3.16 kho , bhaggava , aññataro licchavimahāmatto uṭṭhāyāsanā taṃ parisaṃ etadavoca –

‘ tena hi , bho , muhuttaṃ tāva āgametha , yāvāhaṃ gacchāmiP3.20 [ paccāgacchāmi (?)].

Appeva nāma ahampi sakkuṇeyyaṃ acelaṃ pāthikaputtaṃ imaṃ parisaṃ ānetun ’ ti .

‘‘ Atha kho so , bhaggava , licchavimahāmatto yena tindukakhāṇuparibbājakārāmo , yena acelo pāthikaputto tenupasaṅkami .

Upasaṅkamitvā acelaṃ pāthikaputtaṃ etadavoca –

‘ abhikkamāvuso pāthikaputta , abhikkantaṃ te seyyo , abhikkantā abhiññātā abhiññātāT3.21 licchavī , abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā .

Samaṇopi gotamo āyasmato ārāme divāvihāraṃ nisinno .

Bhāsitā kho pana te esā , āvuso pāthikaputta , vesāliyaṃ parisati vācā – samaṇopi gotamo ñāṇavādo … pe … taddiguṇaṃ taddiguṇāhaṃ karissāmīti .

Abhikkamasseva kho , āvuso pāthikaputta , upaḍḍhapathaṃ .

Sabbapaṭhamaṃyeva āgantvā samaṇo gotamo āyasmato ārāme divāvihāraṃ nisinno .

Bhāsitā kho panesā , āvuso pāthikaputta , samaṇena gotamena parisati vācā – abhabbo kho acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ .

Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti , muddhāpi tassa vipateyyāti .

Abhikkamāvuso pāthikaputta , abhikkamaneneva te jayaṃ karissāma , samaṇassa gotamassa parājayan ’ ti .

‘‘ Evaṃ vutte , bhaggava , acelo pāthikaputto ‘ āyāmi āvuso , āyāmi āvuso ’ ti vatvā tattheva saṃsappati , na sakkotiP3.21 āsanāpi vuṭṭhātuṃ .

Atha kho so , bhaggava , licchavimahāmatto acelaṃ pāthikaputtaṃ etadavoca –

‘ kiṃ su nāma te , āvuso pāthikaputta , pāvaḷā su nāma te pīṭhakasmiṃ allīnā , pīṭhakaṃ su nāma te pāvaḷāsu allīnaṃM3.17 ?

Āyāmi āvuso , āyāmi āvusoti vatvā tattheva saṃsappasi , na sakkosi āsanāpi vuṭṭhātun ’ tiV3.15 .

Evampi kho , bhaggava , vuccamāno acelo pāthikaputto ‘ āyāmi āvuso , āyāmi āvuso ’ ti vatvā tattheva saṃsappati , na sakkoti āsanāpi vuṭṭhātuṃ .

25.‘‘ Yadā kho so , bhaggava , licchavimahāmatto aññāsi –

‘ parābhūtarūpo ayaṃ acelo pāthikaputto āyāmi āvuso , āyāmiT3.22 āvusoti vatvā tattheva saṃsappati , na sakkoti āsanāpi vuṭṭhātun ’ ti .

Atha taṃ parisaṃ āgantvā evamārocesi –

‘ parābhūtarūpo , bho [ parābhūtarūpo ( sī . pī .), parābhūtarūpo ayaṃ ( syā .)], acelo pāthikaputto āyāmi āvuso , āyāmi āvusoti vatvā tattheva saṃsappati , na sakkoti āsanāpi vuṭṭhātun ’ ti .

Evaṃ vutte , ahaṃ , bhaggava , taṃ parisaṃ etadavocaṃ –

‘ abhabbo kho , āvuso , acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ .

Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti , muddhāpi tassa vipateyya .

Sace pāyasmantānaṃ licchavīnaṃ evamassa – mayaṃ acelaṃ pāthikaputtaṃ varattāhi [ yāhi varattāhi ( syā . ka .)] bandhitvā goyugehi āviñcheyyāmāti [ āviñjeyyāmāti ( syā .), āvijjheyyāmāti ( sī . pī .)], tā varattā chijjeyyuṃ pāthikaputto vā .

Abhabbo pana acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ .

SacepissaP3.22 evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti , muddhāpi tassa vipateyyā ’ ti .

26.‘‘ Atha kho , bhaggava , jāliyo dārupattikantevāsī uṭṭhāyāsanā taṃ parisaṃ etadavoca –

‘ tena hi , bho , muhuttaṃ tāva āgametha , yāvāhaṃ gacchāmi ;

appeva nāma ahampi sakkuṇeyyaṃ acelaṃ pāthikaputtaṃ imaṃ parisaṃ ānetun ’’ ti .

‘‘ AthaM3.18 kho , bhaggava , jāliyo dārupattikantevāsī yena tindukakhāṇuparibbājakārāmo , yena acelo pāthikaputto tenupasaṅkami .

Upasaṅkamitvā acelaṃ pāthikaputtaṃT3.23 etadavoca –

‘ abhikkamāvuso pāthikaputta , abhikkantaṃ te seyyo .

Abhikkantā abhiññātā abhiññātā licchavī , abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā .

Samaṇopi gotamo āyasmato ārāme divāvihāraṃ nisinno .

Bhāsitā kho pana te esā , āvuso pāthikaputta , vesāliyaṃ parisati vācā – samaṇopi gotamo ñāṇavādo … pe … taddiguṇaṃ taddiguṇāhaṃ karissāmīti .

Abhikkamasseva , kho āvuso pāthikaputta , upaḍḍhapathaṃ .

Sabbapaṭhamaṃyeva āgantvā samaṇo gotamo āyasmato ārāme divāvihāraṃV3.16 nisinno .

Bhāsitā kho panesā , āvuso pāthikaputta , samaṇena gotamena parisati vācā – abhabbo acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ .

Sace pāyasmantānaṃ licchavīnaṃ evamassa – mayaṃ acelaṃ pāthikaputtaṃ varattāhi bandhitvā goyugehi āviñcheyyāmāti .

Tā varattā chijjeyyuṃ pāthikaputto vā .

Abhabbo pana acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ .

Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ āgaccheyyanti , muddhāpi tassa vipateyyāti .

Abhikkamāvuso pāthikaputta , abhikkamaneneva te jayaṃ karissāma , samaṇassa gotamassa parājayan ’ ti .

‘‘ EvaṃP3.23 vutte , bhaggava , acelo pāthikaputtoT3.24 ‘ āyāmi āvuso , āyāmi āvuso ’ ti vatvā tattheva saṃsappati , na sakkoti āsanāpi vuṭṭhātuṃ .

Atha kho , bhaggava , jāliyo dārupattikantevāsī acelaṃ pāthikaputtaṃ etadavoca –

‘ kiṃ su nāma te , āvuso pāthikaputta , pāvaḷā su nāma te pīṭhakasmiṃ allīnā , pīṭhakaṃ su nāma te pāvaḷāsu allīnaṃ ?

Āyāmi āvuso , āyāmi āvusoti vatvā tatthevaM3.19 saṃsappasi , na sakkosi āsanāpi vuṭṭhātun ’ ti .

Evampi kho , bhaggava , vuccamāno acelo pāthikaputto ‘‘ āyāmi āvuso , āyāmi āvuso ’’ ti vatvā tattheva saṃsappati , na sakkoti āsanāpi vuṭṭhātunti .

27.‘‘ Yadā kho , bhaggava , jāliyo dārupattikantevāsī aññāsi –

‘ parābhūtarūpo ayaṃ acelo pāthikaputto ‘ āyāmi āvuso , āyāmi āvusoti vatvā tattheva saṃsappati , na sakkoti āsanāpi vuṭṭhātun ’ ti , atha naṃ etadavoca –

‘ Bhūtapubbaṃ , āvuso pāthikaputta , sīhassa migarañño etadahosi – yaṃnūnāhaṃ aññataraṃ vanasaṇḍaṃ nissāya āsayaṃ kappeyyaṃ .

Tatrāsayaṃ kappetvā sāyanhasamayaṃ āsayā nikkhameyyaṃ , āsayā nikkhamitvā vijambheyyaṃ , vijambhitvā samantā catuddisā anuvilokeyyaṃ , samantā catuddisā anuviloketvā tikkhattuṃ sīhanādaṃ nadeyyaṃ , tikkhattuṃ sīhanādaṃ naditvā gocarāya pakkameyyaṃ .

So varaṃ varaṃ migasaṃghe [ migasaṃghaṃ ( syā . ka .)] vadhitvā mudumaṃsāni mudumaṃsāni bhakkhayitvā tameva āsayaṃ ajjhupeyyan ’ ti .

‘ AthaV3.17 kho , āvuso , so sīho migarājā aññataraṃ vanasaṇḍaṃ nissāya āsayaṃ kappesi .

Tatrāsayaṃ kappetvā sāyanhasamayaṃT3.25 āsayā nikkhami , āsayā nikkhamitvā vijambhi , vijambhitvā samantā catuddisā anuvilokesi , samantā catuddisā anuviloketvā tikkhattuṃ sīhanādaṃ nadi , tikkhattuṃ sīhanādaṃ naditvā gocarāya pakkāmi .

So varaṃ varaṃ migasaṅghe vadhitvā mudumaṃsāni mudumaṃsāni bhakkhayitvā tameva āsayaṃ ajjhupesi .

28.‘ TassevaP3.24 kho , āvuso pāthikaputta , sīhassa migarañño vighāsasaṃvaḍḍho jarasiṅgālo [ jarasigālo ( sī . syā . pī .)] ditto ceva balavā ca .

Atha kho , āvuso , tassa jarasiṅgālassa etadahosi – ko cāhaṃ , ko sīho migarājā .

Yaṃnūnāhampi aññataraṃ vanasaṇḍaṃ nissāya āsayaṃ kappeyyaṃ .

Tatrāsayaṃ kappetvā sāyanhasamayaṃ āsayā nikkhameyyaṃ , āsayāM3.20 nikkhamitvā vijambheyyaṃ , vijambhitvā samantā catuddisā anuvilokeyyaṃ , samantā catuddisā anuviloketvā tikkhattuṃ sīhanādaṃ nadeyyaṃ , tikkhattuṃ sīhanādaṃ naditvā gocarāya pakkameyyaṃ .

So varaṃ varaṃ migasaṅghe vadhitvā mudumaṃsāni mudumaṃsāni bhakkhayitvā tameva āsayaṃ ajjhupeyyan ’ ti .

‘ Atha kho so , āvuso , jarasiṅgālo aññataraṃ vanasaṇḍaṃ nissāya āsayaṃ kappesi .

Tatrāsayaṃ kappetvā sāyanhasamayaṃ āsayā nikkhami , āsayā nikkhamitvā vijambhi , vijambhitvā samantā catuddisā anuvilokesi , samantā catuddisā anuviloketvā tikkhattuṃ sīhanādaṃ nadissāmīti siṅgālakaṃyeva anadi bheraṇḍakaṃyeva [ bhedaṇḍakaṃyeva ( ka .)] anadi , ke ca chave siṅgāle , ke pana sīhanādeti [ sīhanāde (?)].

‘ Evameva kho tvaṃ , āvuso pāthikaputta , sugatāpadānesu jīvamāno sugatātirittāni bhuñjamāno tathāgateT3.26 arahante sammāsambuddhe āsādetabbaṃ maññasi .

Ke ca chave pāthikaputte , kā ca tathāgatānaṃ arahantānaṃ sammāsambuddhānaṃ āsādanā ’ ti .

29.‘‘ Yato kho , bhaggava , jāliyo dārupattikantevāsī iminā opammena neva asakkhi acelaṃ pāthikaputtaṃ tamhā āsanā cāvetuṃ .

Atha naṃ etadavoca –

‘ SīhotiP3.25 attānaṃ samekkhiyāna ,

Amaññi kotthu migarājāhamasmi ;

Tatheva [ tameva ( syā .)] so siṅgālakaṃ anadi ,

Ke ca chave siṅgāle ke pana sīhanāde ’ ti .

‘ EvamevaV3.18 kho tvaṃ , āvuso pāthikaputta , sugatāpadānesu jīvamāno sugatātirittāni bhuñjamāno tathāgate arahante sammāsambuddhe āsādetabbaṃ maññasi .

Ke ca chave pāthikaputte , kā ca tathāgatānaṃ arahantānaṃ sammāsambuddhānaṃ āsādanā ’ ti .

30.‘‘ Yato kho , bhaggava , jāliyo dārupattikantevāsī imināpi opammena neva asakkhi acelaṃ pāthikaputtaṃ tamhā āsanā cāvetuṃ .

Atha naṃ etadavoca –

‘ AññaṃM3.21 anucaṅkamanaṃ , attānaṃ vighāse samekkhiya ;

Yāva attānaṃ na passati , kotthu tāva byagghoti maññati .

TathevaT3.27 so siṅgālakaṃ anadi ;

Ke ca chave siṅgāle ke pana sīhanāde ’ ti .

‘ Evameva kho tvaṃ , āvuso pāthikaputta , sugatāpadānesu jīvamāno sugatātirittāni bhuñjamāno tathāgate arahante sammāsambuddhe āsādetabbaṃ maññasi .

Ke ca chave pāthikaputte , kā ca tathāgatānaṃ arahantānaṃ sammāsambuddhānaṃ āsādanā ’ ti .

31.‘‘ Yato kho , bhaggava , jāliyo dārupattikantevāsī imināpiP3.26 opammena neva asakkhi acelaṃ pāthikaputtaṃ tamhā āsanā cāvetuṃ .

Atha naṃ etadavoca –

‘ Bhutvāna bheke [ bhiṅge ( ka .)] khalamūsikāyo ,

Kaṭasīsu khittāni ca koṇapāni [ kūṇapāni ( syā .)];

Mahāvane suññavane vivaḍḍho ,

Amaññi kotthu migarājāhamasmi .

Tatheva so siṅgālakaṃ anadi ;

Ke ca chave siṅgāle ke pana sīhanāde ’ ti .

‘ Evameva kho tvaṃ , āvuso pāthikaputta , sugatāpadānesu jīvamāno sugatātirittāni bhuñjamānoV3.19 tathāgate arahante sammāsambuddhe āsādetabbaṃ maññasi .

Ke ca chave pāthikaputte , kā ca tathāgatānaṃ arahantānaṃ sammāsambuddhānaṃ āsādanā ’ ti .

32.‘‘ Yato kho , bhaggava , jāliyo dārupattikantevāsī imināpi opammena neva asakkhiT3.28 acelaṃ pāthikaputtaṃ tamhā āsanā cāvetuṃ .

Atha taṃ parisaṃ āgantvā evamārocesi –

‘ parābhūtarūpo , bho , acelo pāthikaputto āyāmi āvuso , āyāmi āvusoti vatvā tattheva saṃsappati , na sakkoti āsanāpi vuṭṭhātun ’ ti .

33.‘‘ EvaṃM3.22 vutte , ahaṃ , bhaggava , taṃ parisaṃ etadavocaṃ –

‘ abhabbo kho , āvuso , acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ .

Sacepāyasmantānaṃ licchavīnaṃ evamassa – mayaṃ acelaṃ pāthikaputtaṃ varattāhi bandhitvā nāgehi [ goyugehi ( sabbattha ) aṭṭhakathā passitabbā ] āviñcheyyāmātiP3.27 .

Tā varattā chijjeyyuṃ pāthikaputto vā .

Abhabbo pana acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ .

Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti , muddhāpi tassa vipateyyā ’ ti .

34.‘‘ Atha khvāhaṃ , bhaggava , taṃ parisaṃ dhammiyā kathāya sandassesiṃ samādapesiṃ samuttejesiṃ sampahaṃsesiṃ , taṃ parisaṃ dhammiyā kathāya sandassetvā samādapetvā samuttejetvā sampahaṃsetvā mahābandhanā mokkhaṃ karitvā caturāsītipāṇasahassāni mahāviduggā uddharitvā tejodhātuṃ samāpajjitvā sattatālaṃ vehāsaṃ abbhuggantvā aññaṃ sattatālampi acciṃ [ aggiṃ ( syā .)] abhinimminitvā pajjalitvā dhūmāyitvāT3.29 [ dhūpāyitvā ( sī . pī .)] mahāvane kūṭāgārasālāyaṃ paccuṭṭhāsiṃ .

35.‘‘ Atha kho , bhaggava , sunakkhatto licchaviputto yenāhaṃ tenupasaṅkami ;

upasaṅkamitvā maṃ abhivādetvā ekamantaṃ nisīdi .

Ekamantaṃ nisinnaṃ kho ahaṃ , bhaggava , sunakkhattaṃ licchaviputtaṃ etadavocaṃ –

‘ taṃ kiṃ maññasi , sunakkhatta , yatheva te ahaṃ acelaṃ pāthikaputtaṃ ārabbha byākāsiṃ , tatheva taṃ vipākaṃ aññathā vā ’ ti ?

‘ Yatheva me , bhante , bhagavā acelaṃ pāthikaputtaṃ ārabbha byākāsi , tatheva taṃ vipākaṃ , no aññathā ’ ti .

‘ TaṃV3.20 kiṃ maññasi , sunakkhatta , yadi evaṃ sante kataṃ vā hoti uttarimanussadhammā iddhipāṭihāriyaṃ , akataṃ vā ’ ti ?

‘ Addhā kho , bhante , evaṃ sante kataṃ hoti uttarimanussadhammā iddhipāṭihāriyaṃ , no akatan ’ ti .

‘ Evampi khoM3.23 maṃ tvaṃ , moghapurisa , uttarimanussadhammāP3.28 iddhipāṭihāriyaṃ karontaṃ evaṃ vadesi – na hi pana me , bhante , bhagavā uttarimanussadhammā iddhipāṭihāriyaṃ karotīti .

Passa , moghapurisa , yāvañca te idaṃ aparaddhaṃ ’ ti .

‘‘ Evampi kho , bhaggava , sunakkhatto licchaviputto mayā vuccamāno apakkameva imasmā dhammavinayā , yathā taṃ āpāyiko nerayiko .

Select Version

Pāthikavaggapāḷi

Pāthikavaggapāḷi