Suddamaṇḍalaṃ
134.‘‘ Tesaññeva kho , vāseṭṭha , sattānaṃ ye te sattā avasesā te luddācārā khuddācārā ahesuṃ .
Luddācārā khuddācārāti kho , vāseṭṭha ,‘ suddā , suddā ’ tveva akkharaṃ upanibbattaṃ .
Iti kho , vāseṭṭha , evametassa suddamaṇḍalassa porāṇena aggaññena akkharena abhinibbatti ahosi tesaṃyeva sattānaṃ anaññesaṃ , sadisānaṃyeva no asadisānaṃ , dhammeneva , no adhammena .
Dhammo hi , vāseṭṭha , seṭṭho janetasmiṃ diṭṭhe ceva dhamme abhisamparāyañca .
135.‘‘ Ahu kho so , vāseṭṭha , samayo , yaṃ khattiyopi sakaṃ dhammaṃ garahamāno agārasmā anagāriyaṃ pabbajati –
‘ samaṇo bhavissāmī ’ ti .
Brāhmaṇopi kho , vāseṭṭha … pe … vessopi kho , vāseṭṭha … pe … suddopi kho , vāseṭṭha , sakaṃ dhammaṃ garahamāno
P3.96 agārasmā anagāriyaṃ pabbajati –‘ samaṇo bhavissāmī ’ ti .
Imehi kho , vāseṭṭha , catūhi maṇḍalehi samaṇamaṇḍalassa abhinibbatti ahosi , tesaṃyeva sattānaṃ anaññesaṃ , sadisānaṃyeva no asadisānaṃ , dhammeneva no adhammena .
Dhammo hi , vāseṭṭha , seṭṭho janetasmiṃ diṭṭhe ceva dhamme abhisamparāyañca .