Sālivibhāgo
128.‘‘ Atha kho te , vāseṭṭha , sattā sannipatiṃsu , sannipatitvā anutthuniṃsu –
‘ pāpakā vata , bho , dhammā sattesu pātubhūtā .
Mayañhi pubbe manomayā ahumhā pītibhakkhā sayaṃpabhā antalikkhacarā subhaṭṭhāyino , ciraṃ dīghamaddhānaṃ aṭṭhamhā .
Tesaṃ no amhākaṃ kadāci karahaci dīghassa addhuno accayena rasapathavī udakasmiṃ samatani .
Sā ahosi vaṇṇasampannā gandhasampannā rasasampannā .
Te mayaṃ rasapathaviṃ hatthehi āluppakārakaṃ upakkamimha paribhuñjituṃ , tesaṃ no rasapathaviṃ hatthehi āluppakārakaṃ upakkamataṃ paribhuñjituṃ sayaṃpabhā antaradhāyi .
Sayaṃpabhāya antarahitāya candimasūriyā pāturahesuṃ , candimasūriyesu pātubhūtesu nakkhattāni tārakarūpāni
P3.91 pāturahesuṃ , nakkhattesu tārakarūpesu pātubhūtesu rattindivā paññāyiṃsu , rattindivesu paññāyamānesu māsaḍḍhamāsā paññāyiṃsu .Māsaḍḍhamāsesu paññāyamānesu utusaṃvaccharā paññāyiṃsu .
Te mayaṃ rasapathaviṃ paribhuñjantā taṃbhakkhā tadāhārā ciraṃ dīghamaddhānaṃ aṭṭhamhā .
Tesaṃ no pāpakānaṃyeva akusalānaṃ dhammānaṃ pātubhāvā rasapathavī antaradhāyi .
Rasapathaviyā antarahitāya bhūmipappaṭako pāturahosi .
So ahosi vaṇṇasampanno gandhasampanno rasasampanno .
Te mayaṃ bhūmipappaṭakaṃ upakkamimha paribhuñjituṃ .
Te mayaṃ taṃ paribhuñjantā taṃbhakkhā tadāhārā ciraṃ dīghamaddhānaṃ aṭṭhamhā .
Tesaṃ no pāpakānaṃyeva akusalānaṃ dhammānaṃ pātubhāvā
T3.100 bhūmipappaṭako antaradhāyi .Bhūmipappaṭake antarahite padālatā pāturahosi .
Sā ahosi vaṇṇasampannā gandhasampannā rasasampannā .
Te mayaṃ padālataṃ upakkamimha paribhuñjituṃ .
Te mayaṃ taṃ paribhuñjantā taṃbhakkhā tadāhārā ciraṃ dīghamaddhānaṃ aṭṭhamhā .
Tesaṃ no pāpakānaṃyeva akusalānaṃ dhammānaṃ pātubhāvā
M3.76 padālatā antaradhāyi .Padālatāya antarahitāya akaṭṭhapāko sāli pāturahosi akaṇo athuso suddho sugandho taṇḍulapphalo .
Yaṃ taṃ sāyaṃ sāyamāsāya āharāma , pāto taṃ hoti pakkaṃ paṭivirūḷhaṃ .
Yaṃ taṃ pāto pātarāsāya āharāma , sāyaṃ taṃ hoti pakkaṃ paṭivirūḷhaṃ .
Nāpadānaṃ paññāyittha .
Te mayaṃ akaṭṭhapākaṃ sāliṃ paribhuñjantā taṃbhakkhā tadāhārā ciraṃ dīghamaddhānaṃ aṭṭhamhā .
Tesaṃ no pāpakānaṃyeva akusalānaṃ dhammānaṃ pātubhāvā kaṇopi taṇḍulaṃ pariyonandhi , thusopi taṇḍulaṃ pariyonandhi , lūnampi nappaṭivirūḷhaṃ , apadānaṃ paññāyittha , saṇḍasaṇḍā
P3.92 sālayo ṭhitā .Yaṃnūna mayaṃ
V3.68 sāliṃ vibhajeyyāma , mariyādaṃ ṭhapeyyāmā ’ ti !Atha kho te , vāseṭṭha , sattā sāliṃ vibhajiṃsu , mariyādaṃ ṭhapesuṃ .
129.‘‘ Atha kho , vāseṭṭha , aññataro satto lolajātiko sakaṃ bhāgaṃ parirakkhanto aññataraṃ [ aññassa (?)] bhāgaṃ adinnaṃ ādiyitvā paribhuñji .
Tamenaṃ aggahesuṃ , gahetvā etadavocuṃ –
‘ pāpakaṃ vata , bho satta , karosi , yatra hi nāma sakaṃ bhāgaṃ parirakkhanto aññataraṃ bhāgaṃ adinnaṃ ādiyitvā paribhuñjasi .
Māssu , bho satta , punapi evarūpamakāsī ’ ti .
‘ Evaṃ , bho ’ ti kho , vāseṭṭha , so satto tesaṃ sattānaṃ paccassosi .
Dutiyampi kho , vāseṭṭha , so satto … pe … tatiyampi kho , vāseṭṭha , so satto sakaṃ bhāgaṃ parirakkhanto aññataraṃ bhāgaṃ adinnaṃ ādiyitvā paribhuñji .
Tamenaṃ aggahesuṃ , gahetvā etadavocuṃ –
‘ pāpakaṃ vata , bho satta , karosi , yatra hi nāma sakaṃ bhāgaṃ parirakkhanto aññataraṃ bhāgaṃ adinnaṃ
T3.101 ādiyitvā paribhuñjasi .Māssu , bho satta , punapi evarūpamakāsī ’ ti .
Aññe pāṇinā pahariṃsu , aññe leḍḍunā pahariṃsu , aññe daṇḍena pahariṃsu .
Tadagge kho , vāseṭṭha , adinnādānaṃ paññāyati , garahā paññāyati , musāvādo paññāyati , daṇḍādānaṃ paññāyati .