Mahāsammatarājā
130.‘‘ Atha kho te , vāseṭṭha , sattā sannipatiṃsu , sannipatitvā anutthuniṃsu –
‘ pāpakā vata bho dhammā sattesu pātubhūtā , yatra hi nāma
M3.77 adinnādānaṃ paññāyissati , garahā paññāyissati , musāvādo paññāyissati , daṇḍādānaṃ paññāyissati .Yaṃnūna mayaṃ ekaṃ sattaṃ sammanneyyāma , yo no sammā khīyitabbaṃ khīyeyya , sammā garahitabbaṃ garaheyya , sammā pabbājetabbaṃ pabbājeyya .
Mayaṃ panassa sālīnaṃ bhāgaṃ anuppadassāmā ’ ti .
‘‘ Atha
P3.93 kho te , vāseṭṭha , sattā yo nesaṃ satto abhirūpataro ca dassanīyataro ca pāsādikataro ca mahesakkhataro ca taṃ sattaṃ upasaṅkamitvā etadavocuṃ –‘ ehi , bho satta , sammā khīyitabbaṃ khīya , sammā garahitabbaṃ garaha , sammā pabbājetabbaṃ
T3.102 pabbājehi .Mayaṃ pana te sālīnaṃ bhāgaṃ anuppadassāmā ’ ti .
‘ Evaṃ , bho ’ ti kho , vāseṭṭha , so satto tesaṃ sattānaṃ paṭissuṇitvā sammā khīyitabbaṃ khīyi , sammā garahitabbaṃ garahi , sammā pabbājetabbaṃ pabbājesi .
Te panassa sālīnaṃ bhāgaṃ anuppadaṃsu .
131.‘‘ Mahājanasammatoti
V3.69 kho , vāseṭṭha ,‘ mahāsammato , mahāsammato ’ tveva paṭhamaṃ akkharaṃ upanibbattaṃ .Khettānaṃ adhipatīti kho , vāseṭṭha ,‘ khattiyo , khattiyo ’ tveva dutiyaṃ akkharaṃ upanibbattaṃ .
Dhammena pare rañjetīti kho , vāseṭṭha ,‘ rājā , rājā ’ tveva tatiyaṃ akkharaṃ upanibbattaṃ .
Iti kho , vāseṭṭha , evametassa khattiyamaṇḍalassa porāṇena aggaññena akkharena abhinibbatti ahosi tesaṃyeva sattānaṃ , anaññesaṃ .
Sadisānaṃyeva , no asadisānaṃ .
Dhammeneva , no adhammena .
Dhammo hi , vāseṭṭha , seṭṭho janetasmiṃ diṭṭhe ceva dhamme abhisamparāyañca .