Catutthapañcamagāthāvaṇṇanā
Evaṃ
P0.220 ‘‘ na sabbo sabbadā eva , tassa taṃ upakappatī ’’ ti vatvā idāni yehi kāraṇehi na upakappati , tāni dassento āha – 4.‘‘ Nidhi vā ṭhānā cavati , saññā vāssa vimuyhati .
Nāgā vā apanāmenti , yasmā vāpi haranti naṃ .
5.‘‘ Appiyā vāpi dāyādā , uddharanti apassato ’’ ti .
Tassattho
V0.177 – yasmiṃ ṭhāne sunihito hoti nidhi , so vā nidhi tamhā ṭhānā cavati apeti vigacchati , acetanopi samāno puññakkhayavasena aññaṃ ṭhānaṃ gacchati .Saññā vā assa vimuyhati , yasmiṃ ṭhāne nihito nidhi , taṃ na jānāti , assa puññakkhayacoditā nāgā vā taṃ nidhiṃ apanāmenti aññaṃ ṭhānaṃ gamenti .
Yakkhā vāpi haranti yenicchakaṃ ādāya
M0.187 gacchanti .Apassato vā assa appiyā vā dāyādā bhūmiṃ khaṇitvā taṃ nidhiṃ uddharanti .
Evamassa etehi ṭhānā cavanādīhi kāraṇehi so nidhi na upakappatīti .
Evaṃ ṭhānā cavanādīni lokasammatāni anupakappanakāraṇāni vatvā idāni yaṃ taṃ etesampi kāraṇānaṃ mūlabhūtaṃ ekaññeva puññakkhayasaññitaṃ kāraṇaṃ , taṃ dassento āha –
‘‘ Yadā puññakkhayo hoti , sabbametaṃ vinassatī ’’ ti .
Tassattho – yasmiṃ samaye bhogasampattinipphādakassa puññassa khayo hoti , bhogapārijuññasaṃvattanikamapuññamokāsaṃ katvā ṭhitaṃ hoti , atha yaṃ nidhiṃ nidhentena nihitaṃ hiraññasuvaṇṇādidhanajātaṃ , sabbametaṃ vinassatīti .