Upamāpakāsanā
Idāni
V0.12 yampi vuttaṃ ‘‘ saraṇattayametañca , upamāhi pakāsaye ’’ tiP0.21 , tampi vuccate – ettha pana puṇṇacando viya buddho , candakiraṇanikaro viya tena desito dhammo , puṇṇacandakiraṇasamuppāditapīṇito loko viya saṅgho .Bālasūriyo viya buddho , tassa rasmijālamiva vuttappakāro dhammo , tena vihatandhakāro loko viya saṅgho .
Vanadāhakapuriso viya buddho , vanadahanaggi viya kilesavanadahano dhammo , daḍḍhavanattā khettabhūto viya bhūmibhāgo daḍḍhakilesattā puññakkhettabhūto saṅgho .
Mahāmegho viya buddho , salilavuṭṭhi viya dhammo , vuṭṭhinipātūpasamitareṇu viya janapado upasamitakilesareṇu saṅgho .
Susārathi
M0.12 viya buddho , assājānīyavinayūpāyo viya dhammo , suvinītassājānīyasamūho viya saṅgho .Sabbadiṭṭhisalluddharaṇato sallakatto viya buddho , salluddharaṇūpāyo viya dhammo , samuddhaṭasallo viya jano samuddhaṭadiṭṭhisallo saṅgho .
Mohapaṭalasamuppāṭanato vā sālākiyo viya buddho , paṭalasamuppāṭanupāyo viya dhammo , samuppāṭitapaṭalo vippasannalocano viya jano samuppāṭitamohapaṭalo vippasannañāṇalocano saṅgho .
Sānusayakilesabyādhiharaṇasamatthatāya vā kusalo vejjo viya buddho , sammā payuttabhesajjamiva dhammo , bhesajjapayogena samupasantabyādhi viya janasamudāyo samupasantakilesabyādhānusayo saṅgho .
Atha vā sudesako viya buddho , sumaggo viya khemantabhūmi viya ca dhammo , maggappaṭipanno khemantabhūmippatto viya saṅgho .
Sunāviko viya buddho , nāvā viya dhammo , pārappatto sampattiko viya jano saṅgho .
Himavā viya buddho , tappabhavosadhamiva dhammo , osadhūpabhogena nirāmayo viya jano saṅgho .
Dhanado viya buddho , dhanaṃ viya dhammo , yathādhippāyaṃ laddhadhano viya jano sammāladdhaariyadhano saṅgho .
Nidhidassanako viya
P0.22 buddho , nidhi viya dhammo , nidhippatto viya jano saṅgho .Apica abhayado viya vīrapuriso buddho , abhayamiva dhammo , sampattābhayo viya jano accantasabbabhayo saṅgho .
Assāsako viya buddho , assāso viya dhammo , assatthajano viya saṅgho .
Sumitto viya buddho , hitūpadeso viya dhammo , hitūpayogena pattasadattho viya jano saṅgho .
Dhanākaro viya buddho , dhanasāro viya dhammo , dhanasārūpabhogo viya jano saṅgho .
Rājakumāranhāpako viya buddho , sīsanhānasalilaṃ viya dhammo , sunhātarājakumāravaggo viya saddhammasalilasunhāto saṅgho .
Alaṅkārakārako viya buddho , alaṅkāro viya dhammo , alaṅkatarājaputtagaṇo
V0.13 viya saddhammālaṅkato saṅgho .Candanarukkho viya buddho , tappabhavagandho viya dhammo , candanupabhogena santapariḷāho viya jano saddhammūpabhogena santapariḷāho saṅgho .
Dāyajjasampadānako viya pitā buddho , dāyajjaṃ viya dhammo , dāyajjaharo puttavaggo viya saddhammadāyajjaharo saṅgho .
Vikasitapadumaṃ
M0.13 viya buddho , tappabhavamadhu viya dhammo , tadupabhogībhamaragaṇo viya saṅgho .Evaṃ saraṇattayametañca , upamāhi pakāsaye .
Ettāvatā ca yā pubbe ‘‘ kena kattha kadā kasmā , bhāsitaṃ saraṇattayan ’’ tiādīhi catūhi gāthāhi atthavaṇṇanāya mātikā nikkhittā , sā atthato pakāsitā hotīti .
Paramatthajotikāya khuddakapāṭha-aṭṭhakathāya
Saraṇattayavaṇṇanā niṭṭhitā .