Nidānasodhanaṃ
Tassa
V0.4 cāyamādi ‘‘ buddhaṃ saraṇaṃ gacchāmi , dhammaṃ saraṇaṃ gacchāmi , saṅghaṃ saraṇaṃ gacchāmī ’’ ti .Tassāyaṃ atthavaṇṇanāya mātikā –
‘‘ Kena kattha kadā kasmā , bhāsitaṃ saraṇattayaṃ ;
Kasmā cidhādito vutta , mavuttamapi ādito .
‘‘ Nidānasodhanaṃ katvā , evamettha tato paraṃ ;
Buddhaṃ saraṇagamanaṃ , gamakañca vibhāvaye .
‘‘ Bhedābhedaṃ phalañcāpi , gamanīyañca dīpaye ;
Dhammaṃ saraṇamiccādi , dvayepesa nayo mato .
‘‘ Anupubbavavatthāne , kāraṇañca viniddise ;
Saraṇattayametañca , upamāhi pakāsaye ’’ ti .
Tattha paṭhamagāthāya tāva idaṃ saraṇattayaṃ kena bhāsitaṃ , kattha bhāsitaṃ , kadā bhāsitaṃ , kasmā bhāsitaṃ
P0.14 avuttamapicādito tathāgatena kasmā idhādito vuttanti pañca pañhā .Tesaṃ
M0.4 vissajjanā kena bhāsitan ti bhagavatā bhāsitaṃ , na sāvakehi , na isīhi , na devatāhi .Katthāti bārāṇasiyaṃ isipatane migadāye .
Kadāti āyasmante yase saddhiṃ sahāyakehi arahattaṃ patte ekasaṭṭhiyā arahantesu bahujanahitāya loke dhammadesanaṃ karontesu .
Kasmāti pabbajjatthañca upasampadatthañca .
Yathāha –
‘‘ Evañca pana , bhikkhave , pabbājetabbo upasampādetabbo .
Paṭhamaṃ kesamassuṃ ohāretvā kāsāyāni vatthāni acchādāpetvā ekaṃsaṃ uttarāsaṅgaṃ kārāpetvā bhikkhūnaṃ pāde vandāpetvā ukkuṭikaṃ nisīdāpetvā añjaliṃ paggaṇhāpetvā ‘ evaṃ vadehī ’ ti vattabbo ‘ buddhaṃ saraṇaṃ gacchāmi , dhammaṃ saraṇaṃ gacchāmi , saṅghaṃ saraṇaṃ gacchāmī ’’’ ti ( mahāva .34).
Kasmā
V0.5 cidhādito vuttan ti idañca navaṅgaṃ satthusāsanaṃ tīhi piṭakehi saṅgaṇhitvā vācanāmaggaṃ āropentehi pubbācariyehi yasmā iminā maggena devamanussā upāsakabhāvena vā pabbajitabhāvena vā sāsanaṃ otaranti , tasmā sāsanotārassa maggabhūtattā idha khuddakapāṭhe ādito vuttanti ñātabbaṃ .Kataṃ nidānasodhanaṃ .