9. Codakena upaṭṭhāpetabbakathā
Codakena upaṭṭhāpetabbadhammakathāvaṇṇanā
400.‘‘ Kālena vakkhāmī ’’ tiādīsu codanāya kālaakālādiṃ dassento āha ‘‘ eko ekan ’’ tiādi .
Tattha ekoti ekako codako .
Ekan ti ekakaṃ cuditakaṃ .
Saṅghamajjha … pe … asanasālādīsu vā parivāritakkhaṇe vāti yojanā .
Tattha ‘‘ saṅghamajjha … pe … asanasālādīsū ’’ ti iminā ṭhānābhāvaṃ dasseti ,‘‘ upaṭṭhākehi parivāritakkhaṇe ’’ ti iminā kālābhāvaṃ dasseti .
Imehi padehi ṭhānampi kālena saṅgahetvā ‘‘ kālena
V2.170 vakkhāmī ’’ ti vuttanti dasseti .
400. No dosantaroti ettha cittapariyāyo antara -saddoti āha ‘‘ na duṭṭhacitto hutvā ’’ ti .Tacchenāti saccena .
Hambhoti nipāto pacchimapadesu paccekaṃ yojetabbo .
Hambho mahallaka , hambho parisāvacara , hambho paṃsukūlika , hambho dhammakathikāti hi attho .
Idan ti kammaṃ .
Kāraṇanissitan ti mahallakabhāvakāraṇādīsu
M0.535 nissitaṃ .
‘‘ Bhante ’’ ti nipātopi paccekaṃ yojetabbo .
Ettha ca ‘‘ hambho ’’ ti nipātena lokavohāravasena anādarassa pakāsakattā pharusena vadati nāma ,‘‘ bhante ’’ ti nipātena sādarassa pakāsakattā saṇhena vadati nāma .Kāraṇanissitaṃ katvāti imasmiṃ vītikkame ayaṃ nāma dosoti kāraṇanissitaṃ katvā .
‘‘ Mettacittaṃ upaṭṭhapetvā ’’ ti iminā mettacittoti padassa ‘‘ vakkhāmī ’’ ti pade kiriyāvisesanabhāvaṃ dasseti .
No dosantaroti ettha antarasaddassa cittavācakabhāvaṃ dassento āha ‘‘ na duṭṭhacitto ’’ ti .
‘‘ Hutvā ’’ ti iminā kiriyāvisesanabhāvaṃ dasseti .
10. Codakacuditakapaṭisaṃyuttakathā