1. Samādhimūlakasamāpattisuttaṃ
662. Sāvatthinidānaṃ
T3.327V2.262M2.224 .‘‘ Cattārome , bhikkhave , jhāyī .
Katame cattāro ?
Idha
P3.264 , bhikkhave , ekacco jhāyī samādhismiṃ samādhikusalo hoti , na samādhismiṃ samāpattikusalo .Idha pana , bhikkhave , ekacco jhāyī samādhismiṃ samāpattikusalo hoti , na samādhismiṃ samādhikusalo .
Idha pana , bhikkhave , ekacco jhāyī neva samādhismiṃ samādhikusalo hoti , na ca samādhismiṃ samāpattikusalo .
Idha pana , bhikkhave , ekacco jhāyī samādhismiṃ samādhikusalo ca hoti , samādhismiṃ samāpattikusalo ca .
Tatra , bhikkhave , yvāyaṃ jhāyī samādhismiṃ samādhikusalo ca hoti samādhismiṃ samāpattikusalo ca ayaṃ imesaṃ catunnaṃ jhāyīnaṃ aggo ca seṭṭho ca mokkho [ pāmokkho ( syā . kaṃ .) evamuparipi ] ca uttamo ca pavaro ca .
Seyyathāpi , bhikkhave , gavā khīraṃ , khīramhā dadhi , dadhimhā navanītaṃ , navanītamhā sappi , sappimhā sappimaṇḍo tatra aggamakkhāyati ;
evameva kho , bhikkhave , yvāyaṃ jhāyī samādhismiṃ samādhikusalo ca hoti samādhismiṃ samāpattikusalo ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro cā ’’ ti .
Paṭhamaṃ .