5. Vakkalisuttaṃ

Author： _System_Pali_VRI_ @ Administrator

5. Vakkalisuttaṃ

87. Ekaṃ samayaṃ bhagavā rājagahe viharati veḷuvane kalandakanivāpe .

Tena kho pana samayenaV2.109 āyasmā vakkali kumbhakāranivesane viharati ābādhiko dukkhito bāḷhagilāno .

Atha kho āyasmā vakkali upaṭṭhāke āmantesi –

‘‘ etha tumhe , āvuso , yena bhagavā tenupasaṅkamatha ;

upasaṅkamitvā mama vacanena bhagavato pāde sirasā vandatha –

‘ vakkali , bhante , bhikkhu ābādhiko dukkhito bāḷhagilāno , so bhagavato pāde sirasā vandatī ’ ti .

Evañca vadetha –

‘ sādhu kira , bhante , bhagavā yena vakkali bhikkhu tenupasaṅkamatu ;

anukampaṃ upādāyā ’’’ ti .

‘‘ Evamāvuso ’’ ti kho te bhikkhū āyasmato vakkalissa paṭissutvā yenaM2.98 bhagavā tenupasaṅkamiṃsu ;

upasaṅkamitvā bhagavantaṃ abhivādetvā ekamantaṃ nisīdiṃsu .

Ekamantaṃ nisinnā kho te bhikkhū bhagavantaṃ etadavocuṃ –

‘‘ vakkali , bhante , bhikkhu ābādhiko dukkhito bāḷhagilāno , so bhagavato pāde sirasā vandati ;

evañca pana vadeti –

‘ sādhu kira , bhante , bhagavā yena vakkali bhikkhu tenupasaṅkamatu ;

anukampaṃ upādāyā ’’’ ti .

Adhivāsesi bhagavā tuṇhībhāvena .

AthaT3.146 kho bhagavā nivāsetvā pattacīvaramādāya yenāyasmā vakkali tenupasaṅkami .

AddasāP3.120 kho āyasmā vakkali bhagavantaṃ dūratova āgacchantaṃ .

Disvāna mañcake samadhosi [ samañcosi ( sī .), samañcopi ( syā . kaṃ .) saṃ + dhū + ī = samadhosi ].

Atha kho bhagavā āyasmantaṃ vakkaliṃ etadavoca –

‘‘ alaṃ , vakkali , mā tvaṃ mañcake samadhosi .

Santimāni āsanāni paññattāni ;

tatthāhaṃ nisīdissāmī ’’ ti .

Nisīdi bhagavā paññatte āsane .

Nisajja kho bhagavā āyasmantaṃ vakkaliṃ etadavoca –

‘‘ kacci te , vakkali , khamanīyaṃ , kacci yāpanīyaṃ , kacci dukkhā vedanā paṭikkamanti , no abhikkamanti ;

paṭikkamosānaṃ paññāyati , no abhikkamo ’’ ti ?

‘‘ Na me , bhante , khamanīyaṃ , na yāpanīyaṃ ;

bāḷhā me dukkhā vedanā abhikkamanti , no paṭikkamanti ;

abhikkamosānaṃ paññāyati , no paṭikkamo ’’ ti .

‘‘ Kacci te , vakkali , na kiñci kukkuccaṃ , na koci vippaṭisāro ’’ ti ?

‘‘ Taggha me , bhante , anappakaṃ kukkuccaṃ , anappako vippaṭisāro ’’ ti .

‘‘ Kacci pana taṃ , vakkali , attā sīlato na upavadatī ’’ ti ?

‘‘ Na kho maṃ , bhante , attā sīlato upavadatī ’’ ti .

‘‘ No ce kira taṃ , vakkali , attā sīlato upavadati ;

atha kiñca te kukkuccaṃ ko ca vippaṭisāro ’’ ti ?

‘‘ Cirapaṭikāhaṃ , bhante , bhagavantaṃ dassanāya upasaṅkamitukāmo , natthi ca me kāyasmiṃ tāvatikā balamattā , yāvatāhaṃ [ yāhaṃ ( sī .), yāyāhaṃ ( pī .)] bhagavantaṃ dassanāya upasaṅkameyyan ’’ ti .

‘‘ AlaṃV2.110 , vakkali , kiṃ te iminā pūtikāyena diṭṭhena ?

YoT3.147 kho , vakkali , dhammaṃ passati so maṃ passati ;

yo maṃ passati so dhammaṃ passati .

Dhammañhi , vakkali , passanto maṃ passati ;

maṃ passanto dhammaṃ passati .

‘‘ Taṃ kiṃ maññasi , vakkali , rūpaṃ niccaṃ vā aniccaṃ vā ’’ ti ?

‘‘ AniccaṃP3.121 , bhante ’’.

‘‘ Yaṃ panāniccaṃ dukkhaṃ vā taṃ sukhaṃ vā ’’ ti ?

‘‘ Dukkhaṃ , bhante ’’.

‘‘ Yaṃ panāniccaṃ dukkhaṃ vipariṇāmadhammaṃ , kallaṃM2.99 nu taṃ samanupassituṃ –

‘ etaṃ mama , esohamasmi , eso me attā ’’’ ti ?

‘‘ No hetaṃ , bhante ’’.

‘‘ Vedanā … saññā … saṅkhārā … viññāṇaṃ niccaṃ vā aniccaṃ vā ’’ ti ?

‘‘ Aniccaṃ , bhante ’’… pe … eso me attāti ?

‘‘ No hetaṃ , bhante ’’.

‘‘ Tasmātiha … pe … evaṃ passaṃ … pe … nāparaṃ itthattāyāti pajānātī ’’ ti .

Atha kho bhagavā āyasmantaṃ vakkaliṃ iminā ovādena ovaditvā uṭṭhāyāsanā yena gijjhakūṭo pabbato tena pakkāmi .

Atha kho āyasmā vakkali acirapakkantassa bhagavato upaṭṭhāke āmantesi –

‘‘ etha maṃ , āvuso , mañcakaṃ āropetvā yena isigilipassaṃ kāḷasilā tenupasaṅkamatha .

Kathañhi nāma mādiso antaraghare kālaṃ kattabbaṃ maññeyyā ’’ ti ?

‘‘ Evamāvuso ’’ ti kho te bhikkhū āyasmato vakkalissa paṭissutvā āyasmantaṃ vakkaliṃ mañcakaṃ āropetvā yena isigilipassaṃ kāḷasilā tenupasaṅkamiṃsu .

Atha kho bhagavā tañca rattiṃ tañca divāvasesaṃ gijjhakūṭe pabbate vihāsi .

AthaT3.148 kho dve devatāyo abhikkantāya rattiyā abhikkantavaṇṇā kevalakappaṃ gijjhakūṭaṃ obhāsetvā yena bhagavā tenupasaṅkamiṃsu … pe … ekamantaṃ aṭṭhaṃsu .

Ekamantaṃ ṭhitā kho ekā devatā bhagavantaṃ etadavoca –

‘‘ vakkali , bhante , bhikkhu vimokkhāya cetetī ’’ ti .

Aparā devatā bhagavantaṃ etadavocaV2.111 –

‘‘ so hi nūna , bhante , suvimutto vimuccissatī ’’ ti .

Idamavocuṃ tā devatāyo .

Idaṃ vatvā bhagavantaṃ abhivādetvā padakkhiṇaṃ katvā tatthevantaradhāyiṃsu .

Atha kho bhagavā tassā rattiyā accayena bhikkhū āmantesi –

‘‘ etha tumhe , bhikkhave , yena vakkali bhikkhu tenupasaṅkamatha ;

upasaṅkamitvā vakkaliṃ bhikkhuṃ evaṃ vadetha –

‘‘‘ Suṇāvuso tvaṃ , vakkali , bhagavato vacanaṃ dvinnañcaP3.122 devatānaṃ .

Imaṃ , āvuso , rattiṃ dve devatāyo abhikkantāya rattiyā abhikkantavaṇṇā kevalakappaṃ gijjhakūṭaṃ obhāsetvā yena bhagavā tenupasaṅkamiṃsu ;

upasaṅkamitvā bhagavantaṃ abhivādetvā ekamantaṃ aṭṭhaṃsu .

Ekamantaṃ ṭhitā kho , āvuso , ekā devatā bhagavantaṃ etadavoca – vakkali , bhante , bhikkhu vimokkhāya cetetīti .

Aparā devatā bhagavantaṃ etadavoca – so hi nūna , bhante , suvimutto vimuccissatīti .

Bhagavā ca taṃ , āvuso vakkali , evamāha – mā bhāyi , vakkali ;

mā bhāyi , vakkali !

Apāpakaṃ te maraṇaṃ bhavissati , apāpikā kālakiriyā ’’’ ti .

‘‘ Evaṃ , bhante ’’ ti kho teM2.100 bhikkhūT3.149 bhagavato paṭissutvā yenāyasmā vakkali tenupasaṅkamiṃsu ;

upasaṅkamitvā āyasmantaṃ vakkaliṃ etadavocuṃ –

‘‘ suṇāvuso vakkali , bhagavato vacanaṃ dvinnañca devatānan ’’ ti .

Atha kho āyasmā vakkali upaṭṭhāke āmantesi –

‘‘ etha maṃ , āvuso , mañcakā oropetha .

Kathañhi nāma mādiso ucce āsane nisīditvā tassa bhagavato sāsanaṃ sotabbaṃ maññeyyā ’’ ti !

‘‘ Evamāvuso ’’ ti kho te bhikkhū āyasmato vakkalissa paṭissutvā āyasmantaṃ vakkaliṃ mañcakā oropesuṃ .

‘‘ Imaṃ , āvuso , rattiṃ dve devatāyo abhikkantāya rattiyā … pe … ekamantaṃ aṭṭhaṃsu .

Ekamantaṃ ṭhitā kho , āvuso , ekā devatā bhagavantaṃ etadavoca –

‘ vakkali , bhante , bhikkhu vimokkhāya cetetī ’ ti .

Aparā devatā bhagavantaṃ etadavoca –

‘ so hi nūna , bhante , suvimutto vimuccissatī ’ ti .

Bhagavā ca taṃ , āvuso vakkali , evamāha –

‘ mā bhāyi , vakkali ;

mā bhāyi , vakkali !

Apāpakaṃ te maraṇaṃ bhavissati , apāpikā kālakiriyā ’’’ ti .

‘‘ Tena hāvuso , mama vacanena bhagavato pāde sirasā vandatha –

‘ vakkali , bhante , bhikkhu ābādhiko dukkhito bāḷhagilāno .

So bhagavato pāde sirasā vandatī ’ ti .

Evañca vadetha –

‘ rūpaṃ aniccaṃ .

Tāhaṃ , bhante , na kaṅkhāmi .

Yadaniccaṃ taṃ dukkhanti na vicikicchāmi .

Yadaniccaṃ dukkhaṃ vipariṇāmadhammaṃ , natthi me tattha chando vā rāgo vā pemaṃ vāti na vicikicchāmi .

VedanāP3.123 aniccā .

Tāhaṃ , bhante , na kaṅkhāmiV2.112 .

Yadaniccaṃ taṃ dukkhanti naT3.150 vicikicchāmi .

Yadaniccaṃ dukkhaṃ vipariṇāmadhammaṃ , natthi me tattha chando vā rāgo vā pemaṃ vāti na vicikicchāmi .

Saññā … saṅkhārā aniccā .

Tāhaṃ , bhante , na kaṅkhāmi .

Yadaniccaṃ taṃ dukkhanti na vicikicchāmi .

Yadaniccaṃ dukkhaṃ vipariṇāmadhammaṃ , natthi me tattha chando vā rāgo vā pemaṃ vāti na vicikicchāmi .

Viññāṇaṃ aniccaṃ .

Tāhaṃ , bhante , na kaṅkhāmi .

Yadaniccaṃ taṃ dukkhanti na vicikicchāmi .

Yadaniccaṃ dukkhaṃ vipariṇāmadhammaṃ , natthi me tattha chando vā rāgo vā pemaṃ vāti na vicikicchāmī ’’’ ti .

‘‘ Evamāvuso ’’ ti kho te bhikkhū āyasmato vakkalissa paṭissutvā pakkamiṃsu .

Atha kho āyasmā vakkali acirapakkantesu tesu bhikkhūsu satthaṃ āharesi .

Atha kho te bhikkhū yena bhagavā tenupasaṅkamiṃsu ;

upasaṅkamitvā ekamantaṃ nisīdiṃsu .

Ekamantaṃ nisinnā kho te bhikkhū bhagavantaṃ etadavocuṃ –

‘‘ vakkali , bhante , bhikkhu ābādhiko dukkhito bāḷhagilāno ;

so bhagavatoM2.101 pāde sirasā vandati ;

evañca vadeti –

‘ rūpaṃ aniccaṃ .

Tāhaṃ , bhante , na kaṅkhāmi .

Yadaniccaṃ taṃ dukkhanti na vicikicchāmi .

Yadaniccaṃ dukkhaṃ vipariṇāmadhammaṃ , natthi me tattha chando vā rāgo vā pemaṃ vāti na vicikicchāmi .

Vedanā … saññā … saṅkhārāT3.151 … viññāṇaṃ aniccaṃ .

Tāhaṃ , bhante , na kaṅkhāmi .

Yadaniccaṃ taṃ dukkhanti na vicikicchāmi .

Yadaniccaṃ dukkhaṃ vipariṇāmadhammaṃ , natthi me tattha chando vā rāgo vā pemaṃ vāti na vicikicchāmī ’’’ ti .

Atha kho bhagavā bhikkhū āmantesi –

‘‘ āyāma , bhikkhave , yena isigilipassaṃ kāḷasilā tenupasaṅkamissāma ;

yattha vakkalinā kulaputtena satthamāharitan ’’ ti .

‘‘ Evaṃ , bhante ’’ ti kho te bhikkhū bhagavato paccassosuṃ .

Atha kho bhagavā sambahulehi bhikkhūhi saddhiṃ yena isigilipassaṃ kāḷasilā tenupasaṅkami .

Addasā kho bhagavā āyasmantaṃ vakkaliṃ dūratova mañcake vivattakkhandhaṃ semānaṃ .

TenaP3.124 kho pana samayena dhūmāyitattaṃ timirāyitattaṃ gacchateva purimaṃ disaṃ , gacchati pacchimaṃ disaṃ , gacchati uttaraṃ disaṃ , gacchati dakkhiṇaṃ disaṃ , gacchati uddhaṃ disaṃ , gacchati adhoV2.113 disaṃ , gacchati anudisaṃ .

Atha kho bhagavā bhikkhū āmantesi –

‘‘ passatha no tumhe , bhikkhave , etaṃ dhūmāyitattaṃ timirāyitattaṃ gacchateva purimaṃ disaṃ … pe … gacchati anudisan ’’ ti .

‘‘ Evaṃ , bhante ’’.

‘‘ Eso kho , bhikkhave , māro pāpimā vakkalissa kulaputtassa viññāṇaṃ samanvesati [ samannesati ( ka . sī . pī .)]–

‘ kattha vakkalissa kulaputtassa viññāṇaṃ patiṭṭhitan ’ ti ?

Appatiṭṭhitena ca , bhikkhave , viññāṇena vakkali kulaputto parinibbuto ’’ ti .

Pañcamaṃ .

Issues

Select Version

Khandhavaggo

Khandhavaggo