2. Pupphasuttaṃ
94. Sāvatthinidānaṃ .
‘‘ Nāhaṃ , bhikkhave , lokena vivadāmi , lokova mayā vivadati .
Na , bhikkhave , dhammavādī kenaci lokasmiṃ vivadati .
Yaṃ , bhikkhave , natthisammataṃ loke paṇḍitānaṃ , ahampi taṃ ‘ natthī ’ ti vadāmi .
Yaṃ , bhikkhave , atthisammataṃ loke paṇḍitānaṃ , ahampi taṃ ‘ atthī ’ ti vadāmi ’’.
‘‘ Kiñca , bhikkhave , natthisammataṃ loke paṇḍitānaṃ , yamahaṃ ‘ natthī ’ ti vadāmi ?
Rūpaṃ
P3.139 , bhikkhave , niccaṃ dhuvaṃ sassataṃ avipariṇāmadhammaṃ natthisammataṃ loke paṇḍitānaṃ ;ahampi taṃ ‘ natthī ’ ti vadāmi .
Vedanā … saññā … saṅkhārā … viññāṇaṃ niccaṃ dhuvaṃ sassataṃ avipariṇāmadhammaṃ natthisammataṃ loke paṇḍitānaṃ ;
ahampi taṃ ‘ natthī ’ ti vadāmi .
Idaṃ kho , bhikkhave , natthisammataṃ loke paṇḍitānaṃ ;
ahampi taṃ ‘ natthī ’ ti vadāmi ’’.
‘‘ Kiñca , bhikkhave , atthisammataṃ loke paṇḍitānaṃ , yamahaṃ ‘ atthī ’ ti vadāmi ?
Rūpaṃ , bhikkhave , aniccaṃ dukkhaṃ vipariṇāmadhammaṃ atthisammataṃ loke paṇḍitānaṃ ;
ahampi taṃ ‘ atthī ’ ti vadāmi .
Vedanā aniccā … pe … viññāṇaṃ aniccaṃ
T3.170 dukkhaṃ vipariṇāmadhammaṃ atthisammataṃ loke paṇḍitānaṃ ;ahampi taṃ ‘ atthī ’ ti vadāmi .
Idaṃ kho , bhikkhave , atthisammataṃ loke paṇḍitānaṃ ;
ahampi taṃ ‘ atthī ’ ti vadāmi ’’.
‘‘ Atthi , bhikkhave , loke lokadhammo , taṃ tathāgato abhisambujjhati abhisameti ;
abhisambujjhitvā abhisametvā taṃ ācikkhati deseti paññapeti paṭṭhapeti vivarati vibhajati uttānīkaroti .
‘‘ Kiñca
V2.126 , bhikkhave , loke lokadhammo , taṃ tathāgato abhisambujjhati abhisameti , abhisambujjhitvā abhisametvā ācikkhati deseti paññapeti paṭṭhapeti vivarati vibhajati uttānīkaroti ?Rūpaṃ , bhikkhave , loke lokadhammo taṃ tathāgato abhisambujjhati abhisameti .
Abhisambujjhitvā
M2.114 abhisametvā ācikkhati deseti paññapeti paṭṭhapeti vivarati vibhajati uttānīkaroti .‘‘ Yo , bhikkhave , tathāgatena evaṃ ācikkhiyamāne desiyamāne paññapiyamāne paṭṭhapiyamāne vivariyamāne
P3.140 vibhajiyamāne uttānīkariyamāne na jānāti na passati tamahaṃ , bhikkhave , bālaṃ puthujjanaṃ andhaṃ acakkhukaṃ ajānantaṃ apassantaṃ kinti karomi !Vedanā , bhikkhave , loke lokadhammo … pe … saññā , bhikkhave … saṅkhārā , bhikkhave … viññāṇaṃ , bhikkhave , loke lokadhammo taṃ tathāgato abhisambujjhati abhisameti .
Abhisambujjhitvā abhisametvā ācikkhati deseti paññapeti paṭṭhapeti vivarati vibhajati uttānīkaroti .
‘‘ Yo , bhikkhave , tathāgatena evaṃ ācikkhiyamāne desiyamāne paññapiyamāne paṭṭhapiyamāne vivariyamāne vibhajiyamāne uttānīkariyamāne na
T3.171 jānāti na passati tamahaṃ , bhikkhave , bālaṃ puthujjanaṃ andhaṃ acakkhukaṃ ajānantaṃ apassantaṃ kinti karomi !‘‘ Seyyathāpi , bhikkhave , uppalaṃ vā padumaṃ vā puṇḍarīkaṃ vā udake jātaṃ udake saṃvaḍḍhaṃ udakā accuggamma ṭhāti [ tiṭṭhantaṃ ( ka .)] anupalittaṃ udakena ;
evameva kho , bhikkhave , tathāgato loke jāto loke saṃvaḍḍho lokaṃ abhibhuyya viharati anupalitto lokenā ’’ ti .
Dutiyaṃ .