11. Antavaggo
1. Antasuttaṃ
103. Sāvatthinidānaṃ
T3.192 .‘‘ Cattārome , bhikkhave , antā .
Katame cattāro ?
Sakkāyanto
P3.158 , sakkāyasamudayanto , sakkāyanirodhanto , sakkāyanirodhagāminippaṭipadanto .Katamo ca , bhikkhave , sakkāyanto ?
Pañcupādānakkhandhātissa vacanīyaṃ .
Katame pañca ?
Seyyathidaṃ – rūpupādānakkhandho , vedanupādānakkhandho , saññupādānakkhandho , saṅkhārupādānakkhandho , viññāṇupādānakkhandho – ayaṃ vuccati , bhikkhave , sakkāyanto ’’.
‘‘ Katamo
V2.142 ca , bhikkhave , sakkāyasamudayanto ?Yāyaṃ taṇhā ponobhavikā nandirāgasahagatā tatratatrābhinandinī , seyyathidaṃ – kāmataṇhā , bhavataṇhā , vibhavataṇhā .
Ayaṃ
M2.129 vuccati , bhikkhave , sakkāyasamudayanto .‘‘ Katamo ca , bhikkhave , sakkāyanirodhanto ?
Yo tassāyeva taṇhāya asesavirāganirodho cāgo paṭinissaggo mutti anālayo – ayaṃ vuccati , bhikkhave , sakkāyanirodhanto .
‘‘ Katamo ca , bhikkhave , sakkāyanirodhagāminippaṭipadanto ?
Ayameva ariyo aṭṭhaṅgiko maggo .
Seyyathidaṃ – sammādiṭṭhi , sammāsaṅkappo , sammāvācā , sammākammanto , sammāājīvo , sammāvāyāmo , sammāsati , sammāsamādhi .
Ayaṃ vuccati , bhikkhave , sakkāyanirodhagāminippaṭipadanto
T3.193 .Ime kho , bhikkhave , cattāro antā ’’ ti .
Paṭhamaṃ .
2. Dukkhasuttaṃ
104. Sāvatthinidānaṃ .
‘‘ Dukkhañca vo , bhikkhave , desessāmi dukkhasamudayañca dukkhanirodhañca dukkhanirodhagāminiñca paṭipadaṃ .
Taṃ suṇātha .
Katamañca , bhikkhave , dukkhaṃ ?
Pañcupādānakkhandhātissa vacanīyaṃ .
Katame pañca ?
Seyyathidaṃ – rūpupādānakkhandho … pe … viññāṇupādānakkhandho .
Idaṃ vuccati , bhikkhave , dukkhaṃ .
Katamo ca , bhikkhave , dukkhasamudayo ?
Yāyaṃ taṇhā ponobhavikā … pe … kāmataṇhā , bhavataṇhā , vibhavataṇhā – ayaṃ vuccati , bhikkhave , dukkhasamudayo .
Katamo ca , bhikkhave , dukkhanirodho ?
Yo tassāyeva taṇhāya asesavirāganirodho cāgo paṭinissaggo mutti anālayo – ayaṃ vuccati , bhikkhave , dukkhanirodho .
Katamā
P3.159 ca , bhikkhave , dukkhanirodhagāminī paṭipadā ?Ayameva ariyo aṭṭhaṅgiko maggo .
Seyyathidaṃ – sammādiṭṭhi … pe … sammāsamādhi .
Ayaṃ vuccati , bhikkhave , dukkhanirodhagāminī paṭipadā ’’ ti .
Dutiyaṃ .
3. Sakkāyasuttaṃ
105. Sāvatthinidānaṃ .
‘‘ Sakkāyañca vo , bhikkhave , desessāmi sakkāyasamudayañca sakkāyanirodhañca
V2.143 sakkāyanirodhagāminiñca paṭipadaṃ .Taṃ suṇātha .
Katamo ca , bhikkhave , sakkāyo ?
Pañcupādānakkhandhātissa vacanīyaṃ
T3.194 .Katame pañca ?
Seyyathidaṃ – rūpupādānakkhandho , vedanupādānakkhandho , saññupādānakkhandho , saṅkhārupādānakkhandho , viññāṇupādānakkhandho .
Ayaṃ vuccati , bhikkhave , sakkāyo .
Katamo ca , bhikkhave , sakkāyasamudayo ?
Yāyaṃ taṇhā ponobhavikā … pe … kāmataṇhā , bhavataṇhā , vibhavataṇhā – ayaṃ vuccati , bhikkhave , sakkāyasamudayo .
Katamo ca , bhikkhave , sakkāyanirodho ?
Yo tassāyeva taṇhāya … pe … ayaṃ vuccati
M2.130 , bhikkhave , sakkāyanirodho .Katamā ca , bhikkhave , sakkāyanirodhagāminī paṭipadā ?
Ayameva ariyo aṭṭhaṅgiko maggo .
Seyyathidaṃ – sammādiṭṭhi … pe … sammāsamādhi .
Ayaṃ vuccati , bhikkhave , sakkāyanirodhagāminī paṭipadā ’’ ti .
Tatiyaṃ .
4. Pariññeyyasuttaṃ
106. Sāvatthinidānaṃ .
‘‘ Pariññeyye ca , bhikkhave , dhamme desessāmi pariññañca pariññātāviñca puggalaṃ .
Taṃ suṇātha .
Katame ca , bhikkhave , pariññeyyā dhammā ?
Rūpaṃ , bhikkhave , pariññeyyo dhammo .
Vedanā … pe … saññā … saṅkhārā … viññāṇaṃ pariññeyyo dhammo .
Ime vuccanti , bhikkhave , pariññeyyā dhammā .
Katamā
P3.160 ca , bhikkhave , pariññā ?Rāgakkhayo , dosakkhayo , mohakkhayo – ayaṃ vuccati , bhikkhave , pariññā .
Katamo
T3.195 ca , bhikkhave , pariññātāvī puggalo ?Arahātissa vacanīyaṃ .
Yvāyaṃ āyasmā evaṃnāmo evaṃgotto – ayaṃ vuccati , bhikkhave , pariññātāvī puggalo ’’ ti .
Catutthaṃ .
5. Samaṇasuttaṃ
107. Sāvatthinidānaṃ .
‘‘ Pañcime , bhikkhave , upādānakkhandhā .
Katame pañca ?
Seyyathidaṃ – rūpupādānakkhandho … pe … viññāṇupādānakkhandho .
Ye hi keci , bhikkhave , samaṇā vā brāhmaṇā vā imesaṃ pañcannaṃ upādānakkhandhānaṃ assādañca ādīnavañca nissaraṇañca yathābhūtaṃ nappajānanti … pe … pajānanti , sayaṃ abhiññā sacchikatvā upasampajja viharantī ’’ ti .
Pañcamaṃ .
6. Dutiyasamaṇasuttaṃ
108. Sāvatthinidānaṃ
V2.144 .‘‘ Pañcime , bhikkhave , upādānakkhandhā .
Katame pañca ?
Seyyathidaṃ
T3.196 – rūpupādānakkhandho , vedanupādānakkhandho , saññupādānakkhandho , saṅkhārupādānakkhandho , viññāṇupādānakkhandho .Ye hi keci , bhikkhave , samaṇā vā brāhmaṇā vā imesaṃ pañcannaṃ upādānakkhandhānaṃ samudayañca atthaṅgamañca assādañca ādīnavañca nissaraṇañca yathābhūtaṃ nappajānanti … pe … pajānanti , sayaṃ abhiññā sacchikatvā upasampajja viharantī ’’ ti .
Chaṭṭhaṃ .
7. Sotāpannasuttaṃ
109. Sāvatthinidānaṃ
M2.131 .‘‘ Pañcime , bhikkhave , upādānakkhandhā .
Katame pañca ?
Seyyathidaṃ – rūpupādānakkhandho … pe … viññāṇupādānakkhandho .
Yato kho , bhikkhave , ariyasāvako imesaṃ pañcannaṃ upādānakkhandhānaṃ samudayañca atthaṅgamañca assādañca
P3.161 ādīnavañca nissaraṇañca yathābhūtaṃ pajānāti .Ayaṃ vuccati , bhikkhave , ariyasāvako sotāpanno avinipātadhammo niyato sambodhiparāyano ’’ ti .
Sattamaṃ .
8. Arahantasuttaṃ
110. Sāvatthinidānaṃ .
‘‘ Pañcime , bhikkhave , upādānakkhandhā .
Katame pañca ?
Seyyathidaṃ – rūpupādānakkhandho … pe … viññāṇupādānakkhandho .
Yato kho , bhikkhave , bhikkhu imesaṃ pañcannaṃ upādānakkhandhānaṃ samudayañca atthaṅgamañca assādañca ādīnavañca nissaraṇañca yathābhūtaṃ viditvā anupādāvimutto hoti .
Ayaṃ vuccati , bhikkhave , bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññāvimutto ’’ ti .
Aṭṭhamaṃ .
9. Chandappahānasuttaṃ
111. Sāvatthinidānaṃ
V2.145 .‘‘ Rūpe , bhikkhave , yo chando yo rāgo yā nandī yā taṇhā , taṃ pajahatha .
Evaṃ taṃ rūpaṃ pahīnaṃ bhavissati ucchinnamūlaṃ
T3.197 tālāvatthukataṃ anabhāvaṃkataṃ āyatiṃ anuppādadhammaṃ .Vedanāya … pe … saññāya … saṅkhāresu … viññāṇe yo chando yo rāgo yā nandī yā taṇhā , taṃ pajahatha .
Evaṃ taṃ viññāṇaṃ pahīnaṃ bhavissati ucchinnamūlaṃ tālāvatthukataṃ anabhāvaṃkataṃ āyatiṃ anuppādadhamman ’’ ti .
Navamaṃ .
10. Dutiyachandappahānasuttaṃ
112. Sāvatthinidānaṃ .
‘‘ Rūpe , bhikkhave , yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā , te pajahatha
P3.162 .Evaṃ taṃ rūpaṃ pahīnaṃ bhavissati ucchinnamūlaṃ … pe … vedanāya … saññāya … saṅkhāresu yo chando … pe … evaṃ te saṅkhārā pahīnā bhavissanti ucchinnamūlā tālāvatthukatā anabhāvaṃkatā āyatiṃ
M2.132 anuppādadhammā .Viññāṇe yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā , te pajahatha .
Evaṃ taṃ viññāṇaṃ pahīnaṃ bhavissati ucchinnamūlaṃ tālāvatthukataṃ anabhāvaṃkataṃ āyatiṃ anuppādadhamman ’’ ti .
Dasamaṃ .
Antavaggo ekādasamo .
Tassuddānaṃ –
Anto dukkhañca sakkāyo , pariññeyyā samaṇā duve ;
Sotāpanno arahā ca , duve ca chandappahānāti .