5. Ānandasuttaṃ
37. Sāvatthinidānaṃ .
Atha kho āyasmā ānando yena bhagavā tenupasaṅkami ;
upasaṅkamitvā bhagavatā saddhiṃ sammodi .
Sammodanīyaṃ kathaṃ sāraṇīyaṃ vītisāretvā ekamantaṃ nisīdi .
Ekamantaṃ nisinnaṃ kho āyasmantaṃ ānandaṃ bhagavā etadavoca –
‘‘ Sace
M2.31 taṃ , ānanda , evaṃ puccheyyuṃ –‘ katamesaṃ , āvuso ānanda , dhammānaṃ uppādo paññāyati , vayo paññāyati , ṭhitassa [ ṭhitānaṃ ( syā . kaṃ . pī . ka .)] aññathattaṃ paññāyatī ’ ti ?
Evaṃ puṭṭho tvaṃ , ānanda , kinti byākareyyāsī ’’ ti ?
‘‘ Sace
P3.38 maṃ , bhante , evaṃ puccheyyuṃ –‘ katamesaṃ , āvuso ānanda , dhammānaṃ uppādo paññāyati , vayo paññāyati , ṭhitassa aññathattaṃ paññāyatī ’ ti ?
Evaṃ puṭṭhohaṃ , bhante , evaṃ byākareyyaṃ –
‘ rūpassa kho , āvuso , uppādo paññāyati , vayo paññāyati , ṭhitassa aññathattaṃ paññāyati .
Vedanāya … saññāya … saṅkhārānaṃ … viññāṇassa uppādo paññāyati , vayo paññāyati , ṭhitassa aññathattaṃ paññāyati .
Imesaṃ kho , āvuso , dhammānaṃ uppādo paññāyati , vayo paññāyati , ṭhitassa
T3.47 aññathattaṃ paññāyatī ’ ti .Evaṃ puṭṭhohaṃ , bhante , evaṃ byākareyyan ’’ ti .
‘‘ Sādhu sādhu , ānanda !
Rūpassa kho , ānanda , uppādo paññāyati , vayo paññāyati , ṭhitassa aññathattaṃ paññāyati .
Vedanāya … saññāya … saṅkhārānaṃ … viññāṇassa uppādo paññāyati , vayo paññāyati , ṭhitassa aññathattaṃ paññāyati .
Imesaṃ kho , ānanda , dhammānaṃ uppādo paññāyati , vayo paññāyati , ṭhitassa aññathattaṃ paññāyatīti .
Evaṃ puṭṭho tvaṃ , ānanda , evaṃ byākareyyāsī ’’ ti .
Pañcamaṃ .