Uṇhīsasīsalakkhaṇavaṇṇanā
230. Pubbaṅgamoti ettha pubbaṅgamatā nāma pamukhatā , jeṭṭhaseṭṭhakabhāvo bahujanassa anuvattanīyatāti āha ‘‘ gaṇajeṭṭhako ’’ tiādi .
Pubbaṅgamatāti pubbaṅgamassa kammaṃ .
Yassa hi kāyasucaritādikammassa vasena mahāpuriso bahujanassa pubbaṅgamo ahosi , tadassa kammaṃ ‘‘ pubbaṅgamatā ’’ ti adhippetaṃ , na pubbaṅgamabhāvo .
Tenāha ‘‘ idha kammaṃ nāma pubbaṅgamatā ’’ ti .
Pītipāmojjena
M3.122 paripuṇṇasīsoti pītiyā ,V3.110 pāmojjena ca sampuṇṇapaññāsīso bahulaṃ somanassasahagatañāṇasampayuttacittasamaṅgīP3.157 eva hutvā vicarati .
Mahāpurisoti mahāpurisajātiko . 231. Bahujanan ti sāmiatthe upayogavacananti āha ‘‘ bahujanassā ’’ ti .
Paribhuñjanaṭṭhena paṭibhogo , upayogavatthu paṭibhogo , tassa hitāti paṭibhogiyā .
Desakālaṃ ñatvā tadupakaraṇūpaṭṭhānādi veyyāvaccakarā sattā .
Abhiharantīti byāharanti .
Tassa tassa veyyāvaccassa paṭiharaṇato pavattanakaraṇato paṭihāro , veyyāvaccakaro , tassa bhāvo paṭihārakan ti āha ‘‘ veyyāvaccakarabhāvan ’’ ti .
Visavanaṃ visavo , kāmakāro vasitā , so etassa atthīti visavīti āha ‘‘ ciṇṇavasī ’’ ti .