5-10.Anusayasuttādivaṇṇanā
176-181.
Thāmagataṭṭhenāti sattasantāne thirabhāvūpagamanabhāvena .
Thāmagatan ti ca aññehi asādhāraṇo kāmarāgādīnaṃyeva āveṇiko sabhāvo daṭṭhabbo .
Kāmarāgovāti kāmarāgo
V2.122 eva appahīno .So sati paccayalābhe uppajjanārahatāya santāne anusetīti anusayo .
Sesesupīti paṭighānusayādīsu .
Orambhāgo vuccati kāmadhātu rūpārūpabhāvato heṭṭhābhūtattā .
Tattha pavattiyā paccayabhāvato orambhāgiyāni yathā ‘‘ pacchiyo goduhako ’’ ti .
Saṃyojentīti saṃyojanāni , heṭṭhā viya attho vattabbo .
Uddhambhāgo mahaggatabhāgo , tassa hitānīti sabbaṃ heṭṭhā vuttanayattā na vuttanti adhippāyo .
Anusayasuttādivaṇṇanā niṭṭhitā .
Oghavaggavaṇṇanā niṭṭhitā .
Maggasaṃyuttavaṇṇanā niṭṭhitā .