5. Aññatitthiyapeyyālavaggavaṇṇanā
41-48.
Aparāparaṃ
V2.117 parivattamānena vattasampannena saṃsāraddhānapariññāvaseneva nibbānassa pattabbattā vuttaṃ –‘‘ nibbānaṃ patvā pariññātaṃ nāma hotī ’’ ti .
Nibbānaṃ patvāti nibbānappattihetu .
Hetuattho hi ayaṃ tvā -saddo yathā –
‘‘ ghataṃ pivitvā balaṃ hoti , sīhaṃ disvā bhayaṃ hotī ’’ ti .
Tasmāti yasmā apariññeyyaparijānanakiccena nibbānassa pattiyā addhānapariññāsiddhi ñāyati , tasmā upacāravasena nibbānaṃ ‘‘ addhānapariññā ’’ ti vuccati yathā ‘‘ himasanti sūriyaṃ uggametī ’’ ti .
Vijjāvimuttiphalasacchikiriyatthan ti ettha vijjāti aggamaggavijjā .
Vimuttīti aggamaggasamādhi adhippeto
M2.409 .Tesaṃ phalaṃ aññāti āha –
‘‘ vijjāvimuttiphalena arahattaṃ kathitan ’’ ti .
Yāthāvato jānanato paccakkhato dassanato ca ñāṇadassananti idha phalanibbānapaccavekkhaṇā adhippetāti āha –
‘‘ ñāṇadassanena paccavekkhaṇā kathitā ’’ ti .
Sesehīti rāga-virāga-saṃyojanappahāna-anusayasamugghāta-addhānapariññā- āsavakkhaya-vijjā-vimutti-phalasacchikiriyā-ñāṇadassana-anupādāparinibbānapadehi .
Aññatitthiyapeyyālavaggavaṇṇanā niṭṭhitā .