411. Ime bho , kassapa , candimasūriyāti so kira therena pucchito cintesi ‘‘ ayaṃ samaṇo paṭhamaṃ candimasūriye upamaṃ āhari , candimasūriyasadiso bhavissati paññāya , anabhibhavanīyoP3.809 aññena , sace panāhaṃ ‘ candimasūriyā imasmiṃ loke ’ ti bhaṇissāmi ,‘ kiṃ nissitā ete , kittakapamāṇā , kittakaṃ uccā ’ tiādīhi paliveṭhessati . Ahaṃ kho panetaṃ nibbeṭhetuṃ na sakkhissāmi ,‘ parasmiṃ loke ’ iccevassa kathessāmī ’’ ti . Tasmā evamāha .

BhagavāM2.398 pana tato pubbe na cirasseva sudhābhojanīyajātakaṃ kathesi . Tattha ‘‘ cande cando devaputto , sūriye sūriyo devaputto ’’ ti āgataṃ . Bhagavatā ca kathitaṃ jātakaṃ vā suttantaṃ vā sakalajambudīpeV2.359 patthaṭaṃ hoti , tena so ‘‘ ettha nivāsino devaputtā natthī ’’ ti na sakkā vattunti cintetvā devā te na manussāti āha .

412. Atthi pana , rājañña , pariyāyoti atthi pana kāraṇanti pucchati .

Ābādhikāti visabhāgavedanāsaṅkhātena ābādhena samannāgatā . Dukkhitāti dukkhappattā . Bāḷhagilānāti adhimattagilānā .

Saddhāyikāti ahaṃ tumhe saddahāmi , tumhe mayhaṃ saddhāyikā saddhāyitabbavacanāti attho . Paccayikāti ahaṃ tumhe pattiyāmi , tumhe mayhaṃ paccayikā pattiyāyitabbāti attho .