Corādiupamāvaṇṇanā
413. Uddisitvāti tesaṃ attānañca paṭisāmitabhaṇḍakañca dassetvā , sampaṭicchāpetvāti attho .
Vippalapantassāti ‘‘ putto me , dhītā me , dhanaṃ me ’’ ti vividhaṃ palapantassa .
Nirayapālesūti niraye kammakāraṇikasattesu .
Ye pana ‘‘ kammameva kammakāraṇaṃ karoti , natthi nirayapālā ’’ ti vadanti .
Te ‘‘ tamenaṃ , bhikkhave , nirayapālā ’’ ti devadūtasuttaṃ paṭibāhanti .
Manussaloke rājakulesu kāraṇikamanussā viya hi niraye nirayapālā honti .