Ekadesavivattiasamāsa
219.
Pādadvandaṃ munindassa , dadātu vijayaṃ tava ;
Nakharaṃsī paraṃ kantā , yassa pāpajayaddhajā .
219.‘‘ Pāda ’’ iccādi .
Munindassa vijayino pādadvandaṃ tava vijayaṃ paṭipakkhaparābhavaṃ dadātu .
Kīdisaṃ ?
Yassa para maccantaṃ kantā manuññā nakharaṃsī pāpānaṃ lobhādīnaṃ jaye ussitā dhajā ketavoti .
Idamekadesavivattiasamāsarūpakaṃ .
219.‘‘ Pāde ’’ ccādi .
M0.222 Yassa sambuddhassa paraṃ atisayena kantā manuññā nakharaṃsī caraṇanakhakantiyo pāpajayaddhajā pāpavijaye ussāpitadhajāyeva honti , tassa munindassa pādadvandaṃ caraṇayugaḷaṃ tava tuyhaṃ vijayaṃ paṭipakkhaparābhavaṃ dadātūti .Nakharaṃsīnaṃ upamābhūtadhajehi abhedamāropetvā ‘‘ pādadvanda ’’ miti anirūpitattā ekadesavivattiasamāsarūpakaṃ nāma .
Pāpānaṃ jayoti ca , tasmiṃ dhajāti ca viggaho .