Abyapetapaṭhamapādādiyamakavaṇṇanā
27.
Sujanā ’ sujanā sabbe , guṇenāpi vivekino ;
Vivekaṃ na samāyanti , avivekijanantike .
27.‘‘ Sujanā ’’ iccādi .
Sujanā sajjanā , asujanā asajjanāti ete sabbe ubhayapakkhapātino visesā janā guṇena sīlādinā karaṇabhūtena , hetubhūtena vā vivekinopi sādhūsu labbhamānānamasādhūsvanupalabbhanato puthubhūtāpi avivekīnaṃ janānaṃ antike samīpe tesaṃ sannidhāne vivekaṃ vibhāgaṃ na samāyanti napāpuṇanti , vibhāgavijānanapaññāvekallena ca vivekinopi janā te ekato katvā passantīti .
Idaṃ paṭhamapādādiyamakamabyapetaṃ .
27. Idāni abyapetapaṭhamapādādiyamakassa mukhamattaṃ dassetumāha ‘‘ sujani ’’ ccādi .
Sujanā sādhujanā , asujanā asādhujanā ceti sabbe ubhayapakkhikā sīlādinā , pāṇātipātādinā guṇena hetunā vivekino api sādhūsu
M0.51 pāṇātipātādīnaṃ , asādhūsu sīlādīnaṃ appavattito guṇena puthubhūtāpi avivekijanantike vivekañāṇarahitānaṃ janānaṃ santike vivekaṃ vibhāgaṃ na samāyanti na pāpuṇanti .Viveko vinābhavanametesamatthīti vivekino .
Ettha visayopacārena vivekoti paññā , na vivekinoti avivekino , teyeva janā , tesaṃ antikamiti ca viggaho .
Idaṃ abyapetapaṭhamapādādiyamakaṃ .