Dussīlaādīnavavaṇṇanā
148. Āgantvā
V2.122 vasanti ettha āgantukāti āvasatho , tadeva agāranti āha ‘‘ āvasathāgāranti āgantukānaṃ āvasathagehan ’’ ti .Dvinnaṃ
M2.137 rājūnan ti licchavirājamagadharājūnaṃ .Sahāyakāti sevakā .
Kulānīti kuṭumbike .
Santhatanti santhari , sabbaṃ santhari sabbasanthari , taṃ sabbasanthariṃ .
Bhāvanapuṃsakaniddeso cāyaṃ .
Tenāha ‘‘ yathā sabbaṃ santhataṃ hoti , evan ’’ ti .
149. Dussīloti ettha du -saddo abhāvattho ‘‘ duppañño ’’ tiādīsu ( ma . ni .1.449; a . ni .5.10) viya , na garahatthoti āha ‘‘ asīlo nissīlo ’’ ti .
Bhinnasaṃvaroti ettha yo samādinnasīlo kenaci kāraṇena sīlabhedaṃ patto , so tāva bhinnasaṃvaro hoti .
Yo pana sabbena sabbaṃ asamādinnasīlo ācārahīno , so kathaṃ bhinnasaṃvaro nāma hotīti ?
Sopi sādhusamācārassa parihāniyassa bheditattā bhinnasaṃvaro eva nāma .
Vissaṭṭhasaṃvaro saṃvararahitoti hi vuttaṃ hoti .
Taṃ taṃ sippaṭṭhānaṃ .
Māghātakāleti ‘‘ mā ghātetha pāṇino ’’ ti evaṃ māghātāti ghosanaṃ ghositadivase .
Abbhuggacchati pāpako kittisaddo .
Ajjhāsayena maṅku hotiyeva vippaṭisāribhāvato .
Tassāti
P2.177 dussīlassa .Samādāya pavattiṭṭhānan ti uṭṭhāya samuṭṭhāya katakāraṇaṃ .
Āpāthaṃ āgacchatīti taṃ manaso upaṭṭhāti .
Ummīletvā idhalokan ti ummīlanakāle attano puttadārādidassanavasena idha lokaṃ passati .
Nimīletvā paralokan ti nimīlanakāle gatinimittupaṭṭhānavasena paralokaṃ passati .
Tenāha ‘‘ cattāro apāyā ’’ tiādi .
Pañcamapadan ti ‘‘ kāyassa bhedā ’’ tiādinā vutto pañcamo ādīnavakoṭṭhāso .