Kittisaddaabbhuggamanavaṇṇanā
311. Anupurohite ṭhapesīti anupurohite katvā ṭhapesi , anupurohite vā ṭhāne ṭhapesi .
Tisavanaṃ karonte sandhāya ‘‘ divasassa tikkhattun ’’ ti vuttaṃ .
Dvīsu sandhīsu savanaṃ karonte sandhāya ‘‘ sāyaṃ , pāto vā ’’ ti vuttaṃ .
Tato paṭṭhāyāti vatacariyaṃ matthakaṃ pāpetvā nhātakālato pabhuti .
312. Abhiuggacchīti uṭṭhahi udapādi .
Acintetvāti ‘‘ kathaṃ kho ahaṃ brahmunā saddhiṃ manteyyan ’’ ti acintetvā evaṃ cittampi anuppādetvā .
Tena samāgamanasseva abhāvato amantetvā .
Taṃ disvāti taṃ karuṇābrahmavihārabhāvanaṃ brahmadassanūpāyaṃ disvā ñāṇacakkhunā .
313. Evan ti
M2.227 evaṃ rañño ārocetvā paṭisallānaṃ upagate .Sabbatthāti sabbesu channaṃ khattiyānaṃ , sattannaṃ brāhmaṇamahāsālānaṃ
P2.289 , sattannaṃ nāṭakasatānaṃ , cattārīsāya ca bhariyānaṃ āpucchanavāresu . 316. Sādisiyoti jātiyā sādisiyoti āha ‘‘ samavaṇṇā samajātikā ’’ ti .
317. Santhāgāran ti jhānamanasikārena bahi visaṭavitakkavūpasamanena cittassa santhambhanaṃ
V2.209 agāraṃ , jhānasālanti attho .Gahitāvāti bhāvanānuyogena mahāsattena attano cittasantāne uppādanavasena gahitā eva .
Natthi jhāneneva vikkhambhitattā .
Visesato hissa karuṇāya bhāvitattā anabhirati ukkaṇṭhanā natthi , mettāya bhāvitattā bhayaparitassanā natthi .
Ukkaṇṭhanāti pana brahmadassane ussukkaṃ , paritassanāti tadabhipatthanāti āha ‘‘ brahmuno panā ’’ tiādi .