2. Upaṭṭhānasuttavaṇṇanā
222. Kāyadaratho hotiyeva niyamena , na cittadaratho tassa maggeneva samugghāṭitattā .
Jarāturoti jarābhibhavanena āturoyeva .
Padadvayepi eseva nayo .
Upariṭṭhatāya parito dīghaputhulatāya ativiya vijjhatīti sattisallaggahaṇaṃ .
Evaṃ hissa taṇhāsallassa sadisatā .
Avijjāya pana sammohāpādanena
M1.298 dukkhāpādanena ca visasadisatā .Ruppatoti vikāraṃ āpādiyamānassa pīḷiyamānassāti atthoti āha ‘‘ ghaṭṭiyamānassā ’’ ti .
Etthāti sesagāthāsu .
Devatāya hītiādi vuttasseva atthassa pākaṭakaraṇaṃ .
Atthassa vuttanayattā ‘‘ anuttānapadavaṇṇanā ’’ ti āha .
Vinayāti hetumhi nissakkavacananti tassa hetumhi karaṇavacanena atthamāha ‘‘ vinayenā ’’ ti .
Tathā ‘‘ samatikkamā ’’ ti etthāpi .
Paramaparisuddhaṃ saṃkilesasamucchindanato .
Pabbajitan ti
V1.261 sasantānato pabbajitaṃ vā rāgādimalato pabbajitaṃ vā .Āraddhavīriyan ti sambhāvitavīriyaṃ .
Sambhāvanañcassa paggaṇhanaṃ paripūraṇañcāti āha ‘‘ paggahitavīriyaṃ paripuṇṇavīriyan ’’ ti .
Upaṭṭhānasuttavaṇṇanā niṭṭhitā .